“Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”—Daniel 2:44.

Ti Pagarian ti Dios ket nailangitan a gobierno. Ti napili nga Agturay, ni Jesu-Kristo, sukatannanto amin a turay ti tao ken siguraduenna a maaramid ti pagayatan ti Dios idiay langit ken kasta met ditoy daga. (Mateo 6:9, 10) Daytoy a gobierno ket saanto a sukatan ti aniaman a gobierno ti tao ta daytoy ti “agnanayon a pagarian ti Apo ken Manangisalakantayo a ni Jesu-Kristo.” Sigurado nga addanto manayon a talna.—2 Pedro 1:11.

“Ni Satanas a mismo pagbalbalinenna ti bagina a kasla anghel ti lawag. Saan ngarud a banag a naindaklan no dagiti ministrona pagbalbalinenda met ti bagbagida a kasla ministro ti kinalinteg. Ngem ti panungpalanda maitunosto iti ar-aramidda.”—2 Corinto 11:14, 15.

Maibutaktakto ti palso a relihion kas aramid ti Diablo ket maikkatto ditoy daga. Awanton ti panangidumduma iti relihion ken pammapatay. Addanto gundaway dagiti mangay-ayat iti “sibibiag ken pudno a Dios” a mangidayaw kenkuana iti “maysa a pammati” ken “buyogen ti espiritu ken kinapudno.” Addanto met talna ken panagkaykaysa!—1 Tesalonica 1:9; Efeso 4:5; Juan 4:23.

“Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:3, 4.

 Aramiden ni Jehova a Dios daytoy babaen ti Anakna a ni Jesus a nangted iti biagna para kadagiti tattao. (Juan 3:16) Babaen iti panangidalan ni Jesus agbalinto a perpekto ti tao. Awanton ti panagsagaba gapu ta “ti Dios a mismo addanto kadakuada” ken punasennanto “ti amin a lua kadagiti matada.” Awanton ti kinaimperpekto ken panagsagaba dagiti tattao; “dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29.

“Kinemmegna [ni Jesu-Kristo] ti dragon, ti kadaanan a serpiente, nga isu ti Diablo ken Satanas, ket pinarautanna iti las-ud ti sangaribu a tawen. Ket inggarangugongna iti mangliwengliweng ket rinikpanna dayta ken sinelioanna dayta iti rabawna, tapno saannan a mayaw-awan dagiti nasion.”—Apocalipsis 20:2, 3.

Awanton ti impluensia ni Satanas ken dagiti demoniona inton maitapuakda iti “mangliwengliweng,” ti kasasaad nga awanen ti maaramidanda. Saandanton a makontrol ti ar-aramid ti tao. Makapabang-ar la ketdi ti agbiag iti lubong nga awan ti impluensia ni Satanas ken dagiti dakes nga espiritu.

“Ti maudi nga al-aldaw” ket agpatingga inton dumteng ti dinakamat ni Jesus a “dakkel a rigat.” Kinunana: “Addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.”—Mateo 24:21.

Agtungpalto daytoy “iti gubat ti naindaklan nga aldaw ti Dios a Mannakabalin-amin,” a pagaammo kas Armagedon.—Apocalipsis 16:14, 16.

Segseggaan dagiti mangay-ayat iti kinaimbag ti panagpatingga ti dakes a sistema ti bambanag. Usigem ti sumagmamano a bendision nga agur-uray kadakuada nga ipaay ti Pagarian ti Dios.

“Maysa a dakkel a bunggoy” ti maisalakan a sumrek iti natalna a baro a lubong: Dakamaten ti Sao ti Dios ti di mabilang a “dakkel a bunggoy” nga ‘aggapu iti dakkel a rigat’ ti agbiagto iti nalinteg a baro a lubong. (Apocalipsis 7:9, 10, 14; 2 Pedro 3:13) Bigbigendanto a naisalakanda gapu ken Jesu-Kristo, “ti Kordero ti Dios a mangikkat iti basol ti lubong.”—Juan 1:29.

Adunto ti magunggona iti edukasion manipud iti Dios: Iti baro a lubong, “ti daga sigurado a mapnonto iti pannakaammo ken Jehova.” (Isaias 11:9) Ti edukasion manipud iti Dios ramanenna ti instruksion no kasano ti agbiag a sitatalna a kadua ti amin a kita ti tao ken no kasano nga aywanan ti aglawlaw. Inkari ti Dios: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.”—Isaias 48:17.

Mapagungarto dagiti natay nga ipatpateg: Idi adda ditoy daga ni Jesus, pinagungarna ti gayyemna a ni Lazaro. (Juan 11:1, 5, 38-44) Impakitana no anianto ti aramidenna inton agturay ti Pagarian ti Dios.—Juan 5:28, 29.

Agnanayonto ti talna ken kinalinteg: Inton agturay ni Kristo, awanton ti kinadakes. Kasanotayo nga ammo? Gapu ta mabasa ni Jesus ti linaon ti puso ken usarennanto dayta nga abilidad a mangikeddeng no asino dagiti nalinteg ken nadangkes. Dagidiay saan a mangbalbaliw iti dakes nga aramidda, saanto a mapalubosan nga agbiag iti baro a lubong ti Dios.—Salmo 37:9, 10; Isaias 11:3, 4; 65:20; Mateo 9:4.

Dagiti inusigtayo ket sumagmamano laeng kadagiti adu a padto ti Biblia maipapan iti umay a nagsayaat a tiempo. Inton agturay ti Pagarian ti Dios ditoy daga, agnanayonton ti ‘naruay a talna.’ (Salmo 37:11, 29) Awanton dagiti pakaigapuan ti rigat ken panagsagaba a mangparparigat kadagiti tattao. Sigurado dayta ta inkari ti Dios: “Adtoy! Pagbalbalinek a baro ti amin a bambanag. . . . Dagitoy a sasao matalek ken napudnoda.”—Apocalipsis 21:5.