Idi Mayo 24, 2022, adda nakaro a trahedia a napasamak iti bassit nga ili ti Uvalde, Texas, U.S.A. Sigun iti The New York Times, “ti lalaki a nagpaltopaltog napapatayna ti 19 nga ubbing ken dua a titser . . . iti Robb Elementary School.”

 Makapaladingit ta gagangayen dagiti kasta a naranggas a pasamak. Inreport ti USA Today nga iti laeng United States, “addan 249 a panagpaltopaltog iti eskuelaan idi napan a tawen—ad-adu ngem iti aniaman a tawen manipud 1970.”

 Apay a mapaspasamak dagitoy a kinaranggas? Kasanotayo a sanguen dagitoy a dakes nga aramid? Adda kadi namnama nga agpatingganto ti kinaranggas? Ibaga ti Biblia ti sungbat.

•   Deskribiren ti Biblia ti kaaldawantayo kas “maudi nga al-aldaw” a dagiti tattao ket “awanan iti ayat iti padada a tao” ken ‘nauyongda,’ isu nga agaramidda iti naranggas wenno bayolente nga aramid. “Ad-addanto pay a dumakes” dagiti kasta a tattao. (2 Timoteo 3:1-5, 13) Tapno maammuam ti ad-adu pay, basaem ti artikulo nga “Impakpakauna Kadi ti Biblia ti Kababalin ken Ar-aramid Dagiti Tattao Ita?”

 Adu a tattao ti mangpampanunot, ‘Apay nga ipalpalubos ti Dios dagiti nakaro a trahedia a kas iti panagpaltopaltog iti eskuelaan?’ Tapno makitam ti sungbat ti Biblia, basaem ti artikulo nga “Apay a Mapasamak ti Dakes Kadagiti Naimbag a Tattao?”

•   “Ta amin a naisurat ket nasaksakbay a naisurat a pakasursuruantayo, tapno maaddaantayo koma iti namnama . . . babaen ti liwliwa manipud iti Kasuratan.”—Roma 15:4.

 Makatulong dagiti prinsipio ti Biblia tapno kayatayo a sanguen dagiti kinaranggas iti lubong. Para iti ad-adu pay nga impormasion, kitaem ti magasin nga Agriingkayo! a napauluan “Agpatingganto Pay Ngata ti Kinaranggas?”

 Para iti suhestion no kasano a matulongan dagiti nagannak dagiti annakda a saan a maapektaran kadagiti nakabutbuteng a report, basaen ti artikulo a “Makapadanag a Damdamag—Makaapektar Kadi iti Annakyo?”

•   “Isalakannanto ida iti pannakairurumen ken iti kinaranggas.”—Salmo 72:14.

•   “Pitpitendanto ti espadada a pagbalinen a subsob ti arado ken dagiti pikada a pagbalinen a kumpay. Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.”—Mikias 4:3.

 Aramidento ti Dios ti saan a kabaelan nga aramiden ti tao. Ti nailangitan a Pagarianna dadaelennanto ti amin nga armas ken pasardengenna ti amin a kinaranggas. Tapno maammuam no anianto pay ti aramiden ti Pagarian ti Dios, basaem ti artikulo nga “‘Agsaknapto ti Talna’ Babaen iti Pagarian ti Dios.”