Kada tawen, adu ti maaw-awis nga special full-time servant manipud iti intero a lubong tapno ageskuela iti Watchtower Bible School of Gilead, nga adda iti Watchtower Educational Center iti Patterson, New York. a Iti daytoy nga eskuelaan, masanay dagiti estudiante nga agbalin a mas epektibo iti nagduduma nga asaynmentda iti organisasion ni Jehova. Makatulong ti pannakasanayda tapno mapatibker ken mapabileg dagiti kongregasion ken sangay ti organisasion iti intero a lubong.

 Talaga nga internasional nga eskuelaan ti Gilead. Kas pagarigan, dagiti 56 nga estudiante iti maika-147 a klase, idi 2019, ket naggapu iti 29 a nasion. Dagiti maawis nga ageskuela iti Gilead ket dagiti agserserbi iti special full-time kas kadagiti Bethelite, manangaywan iti sirkito, misionero, wenno special pioneer.

 Mabayag pay sakbay a mangrugi ti klase, addan dagiti maisagsagana. Kas pagarigan, agi-book ti World Headquarters Travel Department (WHQ Travel) kadagiti flight para kadagiti naawis nga ageskuela. Iti maika-147 a klase ti Gilead, nasurok a ₱51,000 ($1,075 U.S.) ti average a nagasto para iti maysa nga estudiante manipud iti sabali a nasion a mapan iti Patterson ken inton agawid. Tapno makadanon iti Patterson dagiti estudiante manipud iti Solomon Islands, masapul nga agbiaheda iti uppat a connecting flight ken tallo a connecting flight no agawidda—nasurok a 35,400 a kilometro (22,000 mi) ti distansia dayta! Isu a nasurok a ₱110,000 ($2,300 U.S.) ti nagasto para iti ticket ti kada estudiante. Tapno makainut iti kuarta, adda us-usaren ti WHQ Travel a computer booking tool tapno makabirokda kadagiti nalaka a ticket. Uray nai-book-en dagiti ticket, agtultuloy latta iti sumagmamano a lawas wenno bulbulan pay ketdi nga imonitor ti computer program no lumaka dagiti ticket. Us-usaren met ti WHQ Travel a paggatang kadagiti ticket dagiti naidonasion nga airline credit ken mileage.

 Kasapulan ti adu nga estudiante ti visa tapno makapanda iti United States. Tumulong ti World Headquarters Legal Department tapno makaala iti student visa dagiti estudiante. Ti bayad ti visa ken registration fee ket ag-average iti nasurok a ₱24,000 ($510 U.S.) iti kada estudiante.

 Ania ti maitulong kadatayo ti pannakasanay dagitoy nga estudiante? Ni Hendra Gunawan a maysa a panglakayen iti Southeast Asia ket adda kakongregasionna nga agassawa a naggraduar iti Gilead. Imbagana: “Awan idi ti regular pioneer iti kongregasionmi. Ngem idi simmangpet dagiti agassawa iti kongregasionmi, addan dagiti nagpayunir gapu ta makaakar ti kinaregta ken kinamanagsakripisioda. Di nagbayag, nageskuela ti maysa a sister iti kongregasionmi iti School for Kingdom Evangelizers!”

 Iti maysa a Bethel iti Southeast Asia, adda dagiti katrabahuan ni Sergio Panjaitan a naggraduar iti Gilead. Imbagana: “Saan laeng a bendision kadakuada ti pannakasanayda; bendision met dayta kadakami. Adu ti nasursuroda! Ngem imbes a pagpannakkelda dagita, isursuroda met iti dadduma. Maparparegtakami iti dayta isu a maparegtami met ti dadduma.”

 Pangal-alaan iti pondo para iti daytoy nga eskuelaan? Maala kadagiti donasion para iti sangalubongan a trabaho, nga adu kadagita ti maipatpatulod babaen ti maysa kadagiti pamay-an nga adda iti donate.ps8318.com. Pagyamanan iti nabuslon a donasionyo, isu a masupsuportaran daytoy nga internasional nga eskuelaan.