“Ti pammati ket panagtalek a sigurado a mapasamak ti namnamaen. Dayta ket nalawag a pammaneknek a dagiti saan a makita ket talaga nga adda.”—Hebreo 11:1, Baro a Lubong a Patarus.

 “No adda pammatitayo, ditay agduadua a pumudno dagiti namnamaentayo ket natalgedtayo nga adda dagiti bambanag a ditay makita.”—Hebreo 11:1, Ti Baro a Naimbag a Damag Biblia.

 Mabasa iti daytoy a bersikulo ti ababa a kaipapanan ti pammati sigun iti Biblia ken ipakitana a dayta ket saan laeng a basta panangakseptar a pudno ti maysa a banag.

 “Ti pammati ket panagtalek a sigurado a mapasamak ti namnamaen.” Iti orihinal a lengguahe ti Hebreo 11:1, ti Griego a sao a naipatarus kas “pammati” kaipapananna ti kompiansa, panagtalek, wenno pannakakombinsir. Ti kasta a pammati ket saan a basta panangarapaap kadagiti mabalin a mapasamak; dayta ket “panagtalek” a sigurado a mapasamak ti maysa a banag. Ti Griego a sao a naipatarus kas “panagtalek” a ket mabalin met a maipatarus kas “titulo a dokumento.” Dayta a dokumento ket garantia a mangted iti pammasiguro wenno pammatalged iti mangig-iggem iti dayta.

 “Ti pammati ket . . . nalawag a pammaneknek [wenno, “makakombinsir nga ebidensia,” footnote] a dagiti saan a makita ket talaga nga adda.” Ti pammati ket resulta ti makakombinsir nga ebidensia. Nabileg ti kasta nga ebidensia ta makombinsirna ti maysa a tao a mangibilang nga agpaypayso ti maysa a banag uray saanna pay a nakita.

 Ti libro ti Biblia a Hebreo ket surat ni apostol Pablo kadagiti Kristiano idi umuna a siglo nga aggigian idiay Jerusalem ken iti aglawlawna. Iti daytoy a paset ti suratna, inlawlawag ni Pablo ti kinapateg ti pammati. Kas pagarigan, insuratna: “Imposible a naan-anay a maparagsak ti Dios no awan ti pammati. Ta ti asinoman nga umasideg iti Dios ket masapul a patienna nga adda Dios ken isu ti manggunggona kadagidiay napasnek a mangsapsapul kenkuana.” (Hebreo 11:6) Kalpasan nga imbagana ti kaipapanan ti pammati iti Hebreo 11:1, sinaggaysa ni Pablo nga inaganan dagiti lallaki ken babbai a nairekord iti Biblia a nangipakita iti daytoy a kualidad. Insalaysayna no kasanoda nga impakita ti pammati babaen kadagiti inaramidda maibatay iti pagayatan ti Dios.—Hebreo 11:4-38.