Adda dagiti kararag a saan a sungbatan ti Dios. Usigem ti dua a rason a saan nga ipangag ti Dios ti kararag ti maysa a tao.

1. Ti kararag ket saan a maitunos iti pagayatan ti Dios

 Saan a sungbatan ti Dios dagiti kiddaw a saan a maitunos iti pagayatanna, wenno iti kalikagumanna, a naisurat iti Biblia. (1 Juan 5:14) Kas pagarigan, mabasatayo iti Biblia a saantayo nga agbalin a naagum. Ti panagsugal itandudona ti kinaagum. (1 Corinto 6:9, 10) Saan ngarud a sungbatan ti Dios no ikararagmo a mangabakka iti lotto. Ti Dios ket saan a kas iti maysa a genie a mangtungpal iti amin a dawatmo. Kinapudnona, pagsayaatam pay ketdi dayta. Ta no saan, mabalin a pagbutngam ti aniaman a kiddawen dagiti dadduma nga aramiden ti Dios.—Santiago 4:3.

2. Ti agkarkararag ket nasukir

 Saan nga ipangag ti Dios ti kararag dagidiay mangigaggagara a mangaramid kadagiti kagurana. Kas pagarigan, kinuna ti Dios kadagidiay agkunkuna nga agserserbida kenkuana ngem nasukirda: “Uray no mamin-adu nga agkararagkayo, saanak nga umimdeng; dagiti mismo nga imayo napnoda iti panagibukbok iti dara.” (Isaias 1:15) Ngem no agbalbaliwda ken ‘ilintegda ti bambanag,’ ipangag ti Dios dagiti kararagda.—Isaias 1:18.