Ti organisasion dagiti Saksi ni Jehova iti moderno a panawen ket nangrugi idi ngudo ti 1800s. Iti dayta a tiempo, adda bassit a grupo dagiti estudiante iti Biblia nga agnanaed iti asideg ti Pittsburgh, Pennsylvania, iti Estados Unidos, a nangirugi iti sistematiko a panangadal iti Biblia. Indiligda dagiti doktrina nga isursuro dagiti relihion iti talaga nga isursuro ti Biblia. Dagiti nasursuroda ket impablaakda kadagiti libro, diario, ken iti magasin a maawagan itan iti Ti Pagwanawanan—Mangibumbunannag iti Pagarian ni Jehova.

 Karaman iti dayta a grupo dagiti napasnek nga estudiante iti Biblia ti lalaki nga agnagan iti Charles Taze Russell. Nupay ni Russell ti nangidaulo iti trabaho a panangisuro iti Biblia iti dayta a tiempo ken isu ti kaunaan nga editor ti The Watchtower (Ti Pagwanawanan), isu ket saan a nangbuangay iti baro a relihion. Ti panggep ni Russell ken ti dadduma pay nga Estudiante ti Biblia, kas awag iti dayta a grupo idi, ket ti panangipakaammo kadagiti pannursuro ni Jesu-Kristo ken ti panangsurot kadagiti kaugalian ti kongregasion Kristiano idi umuna a siglo. Yantangay ni Jesus ti Nangbuangay iti Kristianidad, isu ti ibilangmi a nangbuangay iti organisasionmi.—Colosas 1:18-20.