Til að vita hvenær kemur að endalokum þessa heims er nauðsynlegt að vita hvernig orðið „heimur“ er notað í Biblíunni. Gríska orðið ko‘smos, venjulega þýtt „heimur“, vísar oftast til mannkynsins, sérstaklega þeirra sem lifa ekki í samræmi við vilja Guðs. (Jóhannes 15:18, 19; 2. Pétursbréf 2:5) Stundum vísar ko‘smos til innviða mannlegs samfélags. – 1. Korintubréf 7:31; 1. Jóhannesarbréf 2:15, 16. a

Hvað er átt við með orðunum „endalok heimsins“?

 Orðasambandið „endalok heimsins“ kemur fyrir í mörgum biblíuþýðingum og getur líka þýtt „endir þessa heims“ eða „endalok þessa tímaskeiðs“. (Matteus 24:3, English Standard Version) Þá er ekki átt við tortímingu jarðarinnar eða alls mannkyns heldur endi þess mannlega samfélags sem nú er. – 1. Jóhannesarbréf 2:17.

 Í Biblíunni kemur fram að „illvirkjum verður tortímt“ þannig að gott fólk geti notið lífsins á jörðinni. (Sálmur 37:9-11) Þessi eyðing á sér stað í ,þrengingunni miklu‘ sem nær hámarki í Harmagedónstríðinu. – Matteus 24:21, 22; Opinberunarbókin 16:14, 16.

Hvenær kemur að endalokum þessa heims?

 Jesús sagði: „En þann dag og stund veit enginn, hvorki englar á himnum né sonurinn, enginn nema faðirinn einn.“ (Matteus 24:36, 42) Hann sagði líka að endirinn kæmi óvænt „á þeirri stundu sem þér ætlið eigi“. – Matteus 24:44.

 Jafnvel þótt við getum ekki vitað nákvæmlega daginn né stundina sagði Jesús fyrir margþætt tákn eða röð atburða sem einkenndu tímabilið á undan endalokum heimsins. (Matteus 24:3, 7-14) Í Biblíunni er þetta tímabil kallað ,endalok‘ og ,síðustu dagar‘. – Daníel 12:4; 2. Tímóteusarbréf 3:1-5.

 Verður eitthvað eftir þegar endalok þessa heims eru liðin hjá?

 Já. Jörðin mun ennþá standa því að í Biblíunni segir að ,hún haggist eigi um aldur og ævi‘. (Sálmur 104:5) Jörðin verður fyllt af fólki alveg eins og er lofað í Biblíunni: „Hinir réttlátu fá landið til eignar og búa í því um aldur.“ (Sálmur 37:29) Guð ætlar að koma á þeim aðstæðum sem hann ætlaði í upphafi:

•   Paradís. – Jesaja 35:1; Lúkas 23:43.

•   Öryggi og velmegun. – Míka 4:4.

•   Mikilvæg og ánægjuleg störf fyrir alla. – Jesaja 65:21-23.

•   Lausn undan sjúkdómum og öldrun. – Jobsbók 33:25; Jesaja 33:24.