LESN 15

Jiizas—A Uu Im Bi?

PLIE

Jiizas—A Uu Im Bi?

Wol iip a piipl ier bout Jiizas, bot dem no nuo uu im riili bi. Bot a uu di Baibl se im bi?

1. Jiizas—A uu im bi?

Jiizas a wan powaful spirit we liv iina evn. Jeuova Gad did mek Jiizas bifuo Im mek notn els. An dat a wa mek di Baibl se “im a fos iina evriting.” (Koloshan 1:18) An it se Jiizas a Gad “wan dege-dege Bwai Pikni” kaa a Jeuova wan did mek im. (Jan 3:16) Jiizas did elp im Faada, Jeuova, fi mek evriting els. (Riid Pravorbz 8:30.) Jiizas an Jeuova stil kluos. A im Jeuova yuuz fi mek wi nuo wa Im waahn wi fi nuo, an Jiizas api fi dwi’it. An a dat mek di Baibl tel wi se im a “di Wod.”—Jan 1:14.

2. Wa mek Jiizas did kom pan di ort?

Bout 2,000 ier ago, Jeuova yuuz im spirit fi wok wan mirikl fi put Jiizas laif iina di beli a wan uman we niem Mieri we neva av seks yet wid nobadi. A so Jiizas en op baan pan di ort. (Riid Luuk 1:34, 35.) Im a di Mesaiya, di wan we Gad pramis se im a-go yuuz fi siev evribadi. a Evriting we di Baibl se bout di Mesaiya an wa di Mesaiya wuda du, a it apm tu Jiizas an a dem sitn de im did du. A so piipl kuda si se a im “a di Krais, di Gad we alaiv Bwai Pikni.”—Matyu 16:16.

3. A wich paat Jiizas de nou?

Afta Jiizas ded, Jeuova mek im kom bak alaiv az wan spirit. Den, “Faada Gad tek im op a evn an put im iina di tap-a-tap pozishan.” (Filipiyan 2:9) So a onggl Jeuova av muor powa dan Jiizas.

LORN SOM MUO

Si som ada sitn ya we a tel wi muor bout Jiizas. An wi a-go si wa mek it gud fi wi lorn bout im.

4. Jiizas a no di Muos Ai Gad

Alduo di Baibl mek wi nuo se Jiizas a wan powaful spirit we de iina evn, im stil afi ansa tu im Faada an Gad, Jeuova. Wa mek wi se so? Plie di VIDIYO an si wa di Baibl av fi se bout Jiizas an di Muos Ai Gad.

VIDIYO: Jiizas Krais A Gad? (3:22)

Dem skripcha ya a-go mek wi nuo di difrens bitwiin Jeuova an Jiizas. Riid di skripcha dem, an den wi a-go taak bout di kwestiyan dem.

Riid Luuk 1:30-32.

Wa di ienjel did se we mek wi nuo di difrens bitwiin Jeuova, di “Muos Ai Gad” an Jiizas?

Riid Matyu 3:16, 17.

Wen Jiizas did baptaiz, wa di vais fram evn did se?
A did a uufa vais dat?

Riid Jan 14:28.

A uu biga, an a uu av muor powa? Wan faada ar wan son?
Wen Jiizas kaal Jeuova im Faada, wa im did miin?

Riid Jan 12:49.

Jiizas tingk se im an im Faada a di siem sumadi? Wa yu tingk?

5. Aal a di sitn dem we apm iina Jiizas laif an wa im du, mek wi si se a im a di Mesaiya

Di Baibl tel wi wol iip a sitn we wuda apm we wuda mek wi nuo uu di Mesaiya bi—se a im Gad pik fi kom siev wi. Plie di VIDIYO fi si som sitn we di Baibl se wuda apm, an si ou a Jiizas dem apm tu wen im did de pan di ort.

VIDIYO: Aal A Di Sitn Dem We Di Baibl Se Wuda Apm Tu Di Mesaiya, A Jiizas Dem Apm Tu (3:03)

Riid bout dem sitn ya we di Baibl se wuda apm, an den wi a-go taak bout di kwestiyan dem:

Riid Maika 5:2 fi si wich paat di Mesaiya did fi baan. b

Jiizas did baan wich paat di Baibl did se di Mesaiya wuda baan?—Matyu 2:1.

Riid Saam 34:20 an Zakaraiya 12:10 fi si wa di Baibl se bout ou di Mesaiya wuda ded.

Di sitn dem we di Baibl se wuda apm, dem apm fi chuu?—Jan 19:33-37.
Yu tingk Jiizas kuda mek aal a di sitn dem we di Baibl se wuda apm tu di Mesaiya apm tu im?
Wa dis a se tu yu bout Jiizas?