Dai ga san hpe san wa ai ni gaw, manu mana sum mat ai lam ni hkrum ga ai ni rai nna, mahtai lu na matu sha n-ga, shalan shabran lam ra nga ai ni re. Kaga ni bai rai yang, masha wunawng wuwa hpe sat ai lam gaw, nhkru ai lam a sawng dik htum ai lam ngu nna mu mada ma ai. Dai majaw, Karai Kasang hpe shanhte kam na matu yak nga ma ai.

 Shut ai lam: Dai zawn galaw ai lam hpe hpa majaw Karai Kasang ahkang jaw ai kun? ngu san ai gaw shut ai.

 Teng man lam: Nhkru n kaja ai lam hpe Karai Kasang hpa majaw ahkang jaw ai kun? ngu ai ga san hpe makam masham kaba ai ni san ga wa ai. Ga shadawn, myihtoi Habaku gaw, Karai Kasang hpe ndai hku san wa ai: “Nang hpa majaw n shawp n kap ai amu, ngai hpe madun dan nna, myit magaw ai lam mu shangun nga n ta? hten byak ai hte kashun kashe, nye a man e rai nga nna ndang kalang hkat ai hte, ga law ga Ia ai, law htam nga ai.” (Habaku 1:3) Karai Kasang gaw Habaku hpe mara shagun na malai, masha yawng hti lu na matu shi san wa ai ga san ni hpe, Chyum Laika hta ka shalawm da shangun ai.

 Shut ai lam: Masha ni yakhkak hkrum ai hpe Karai Kasang hpa zawn n nawn ai.

 Teng man lam: Karai Kasang gaw, nhkru ai lam hte de a majaw byin ai yakhkak jamjau ai lam ni hpe n ra sharawng ai. (Ga Shagawp 6:16-19) Noa aten hta, ginding aga hta chyam bra nga ai nhkru ai lam ni a majaw, Karai Kasang gaw “shi a kraw lawang e yawn nga ai.” (Ningpawt 6:5, 6) Dai majaw, masha wunawng wuwa sat hkrum ai hpe mu ai shaloi, Karai Kasang grai yawn ai.​—Malahki 3:6.

 Shut ai lam: Masha wunawng wuwa sat ai lam gaw, Yuda masha ni hpe Karai Kasang ari jaw ai re.

 Teng man lam: Tsa ban langai hta, Yerusalem hpe jahten kau na matu Roma ni hpe Karai Kasang ahkang jaw wa ai. (Mahte 23:37–24:2) Dai aten kaw nna, Karai Kasang gaw, gara amyu masha hpe mung, laksan hku nna ahkyak shatai ai lam (sh) ari jaw ai lam n galaw wa sai. Karai Kasang a ningmu hta “Yuda ni hte Heleni masha ni hpe lachyen lahka n nga” sai.​—Roma 10:12.

 Shut ai lam: Tsawra myit nga nna, hpung shingkang rawng ai Karai Kasang nga yang, masha wunawng wuwa hpe sat ai lam n byin hkra makawp maga ya na re.

 Teng man lam: Karai Kasang gaw yakhkak ai lam ni hpe byin shangun ai n re. Raitim, chyahkring mi gaw ahkang jaw da ai.​—Yaku 1:13; 5:11.

 Karai Kasang gaw, yakhkak jamjau ai lam hpe byin na matu ahkang jaw kau ai zawn sha, masha wunawng wuwa sat ai lam hpe mung ahkang jaw kau ai re. Hpa majaw nga yang, masha labau hpang ai aten kaw nna jaw ai, shut ai hte seng ai manghkang hpe hparan na matu re. Ya aten hta, mungkan ga hpe uphkang nga ai gaw, Karai Kasang n re ai sha, Satan re ai ngu Chyum Laika hta dan dan leng leng tsun da ai. (Luka 4:1, 2, 6; Yawhan 12:31) Yakhkak jamjau lam hpe, Karai Kasang hpa majaw ahkang jaw da ai hte seng nna Chyum Laika hta na madung lam lahkawng hpe sanglang da ya ai.

1.   Karai Kasang gaw masha ni hpe hpan ai shaloi wanglu wanglang lata lu ai ahkang jaw da ai. Adam yan Ewa kaw nna hpa myit mada ai hpe Karai Kasang tsun wa ai raitim, madat mara na matu atik anang n galaw wa ai. Shan yan gaw kaja ai hte n kaja ai hpe shan yan nan lata wa ai. Shan yan a shut ai hku lata wa ai lam hte shan zawn sha shut ai hku lata wa ai masha ni a majaw, n kaja ai lam ni byin nga ai re. (Ningpawt 2:17; 3:6; Roma 5:12) “Mungkan hta byin nga ai yakhkak jamjau ai lam law malawng gaw, anhte hpe jaw da ai wanglu wanglang lata lu ai ahkang hpe shut ai hku jailang ai majaw re” nga nna laika buk langai (Statement of Principles of Conservative Judaism) hta tsun da ai. Karai Kasang gaw wanglu wanglang lata ai ahkang hpe dawm la kau na malai, masha shada da uphkang na matu ahkang jaw kau ai.

2.   Masha wunawng wuwa sat hkrum ai majaw byin wa ai hkra machyi lam hpe Karai Kasang hparan ya lu ai. Hparan mung hparan ya na re. Masha wunawng wuwa sat ai lam hta sat hkrum ai masha ni hte hpawn, wan hku law ai si mat ai masha ni hpe, asak bai jahkrung ya na nga nna Karai Kasang ga sadi jaw da ai. Masha wunawng wuwa hpe sat ai lam kaw nna lawt wa ai masha ni a hkra machyi ai lam hpe mung yeng seng kau ya na re. (Esaia 65:17; Kasa 24:15) Shinggyim masha ni hpe tsawra ai Karai Kasang a tsawra myit a majaw, ndai ga sadi hpring tsup wa na gaw teng sha re.​—Yawhan 3:16.

 Masha wunawng wuwa sat ai lam kaw nna lawt wa ai masha law law gaw, dai zawn byin na matu Karai Kasang hpa majaw ahkang jaw ai lam hte Karai Kasang gara hku hparan ya na hpe chye wa ai. Dai zawn chye wa ai majaw, shanhte Karai Kasang hpe grau nna kam sham wa nna lachyum nga ai hku asak hkrung lu wa ai.