“Chyum Laika hpe gara hku atsawm hti mai ai lam n chye da yang, Chyum Laika hti mayu na n re” ngu ramma Wi tsun ai.

Chyum Laika hti ai shaloi, pyaw hkra gara hku galaw mai na lam hpe chye mayu ai kun? Ndai sumhpa gaw karum ya na re.

•  Hti nga ai chyum daw ni hpe kaja wa byin taw ai zawn shingran yu u

•  Tam sawk sagawn u!

•  Ramma shada tsun ai lam

Hti nga ai lam hta tinang nan shang lawm u. Ndai hku galaw mai ai:

1. Chyum Laika labau langai hpe lata u. Nang hkaja mayu ai labau hpe lata u. Ga shaka ningnan kaw na mabyin langai (sh) jw.org kaw na madat na matu Chyum Laika maumwi langai lata mai ai.

2. Chyum Laika labau hpe hti u. Tinang hkrai hti mai ai. Shing nrai, manang ni, nta masha ni hte arau hti mai ai. Langai gaw labau tsun ai wa a shara hta hti nna, kaga langai gaw labau hta lawm ai ni a shara hta hti mai ai.

3. Lawu hta hpaji jaw da ai ni kaw na langai (sh) langai hta n-ga galaw yu u:

   • Labau hpe hkrang shala da ai sumla ni soi u. Shing nrai, mabyin ni hpe shi mabyin hte shi sumla soi u. Mabyin langai hpra a sumla hta laika ka u.

   • Hkrang sumla soi u. Ga shadawn, Chyum Laika hta lawm ai sadi dung ai wa a lam hti taw ai rai yang, shi a atsam ningja ni hte shi hpe shaman chyeju lu shangun ai lailen ni hpe matut mahkai ya u.

   • Labau langai hpe, shiga langai hku nna galaw kau u. Mabyin hpe ningmu amyu myu hte shingran yu u. Mabyin hta madung hku nna lawm ai ni, sakse ni hte “hkrum san shaga” ai zawn galaw mai ai.

   • Dai labau hta lawm ai wa a daw dan lam shut mat yang, shi a jatum gaw gara hku byin na hpe shingran yu u. Ga shadawn, Yesu hpe n chye ai ngu Petru nyet wa ai hpe bai myit yu u. (Marku 14:66-72) Shadut ai lam ni hpe Petru gara hku bai htang mai ai kun?

   • Nang gaw sawn shapraw chye ai wa rai yang, Chyum Laika labau langai hta madung tawn nna kaga hkrang shala langai hpe bai shapraw yu u. Dai labau kaw na sharin la lu ai lam ni hpe mung shalawm u.​—Roma 15:4.

Labau langai hpe ahkri ahkrai hkaja ai shaloi, moi n chye wa ai manu dan ai lam ni hpe mu wa chye ai. Chyum Laika labau langai kaw na ga hkaw mi, hkaw lahkawng ram sha lu dat yang pyi manu dan ai.

Ga Shadawn, Mahte 28:7 hte Marku 16:7 hpe shingdaw yu u

•  Sape ni “hte Petru hpe” Yesu hkum shadan dan na lam ahkri ahkrai hpe Marku hpa majaw ka shalawm wa ai kun?

• Chye wa ai lam: Marku gaw ndai mabyin ni hpe shi nan mu wa ai n re. Ndai lam ni hpe Petru kaw na chye wa ai rai na re.

• Makoi magap nga ai manu dan ai lam: Petru hpe Yesu naw mu mayu ai lam na dat ai shaloi, hpa majaw Petru n-gun lu mat ai rai na kun? (Marku 14:66-72) Yesu gaw Petru a jet ai manang re ai lam gara hku madun wa ai kun? Kaga ni a manang ajet byin na matu, Yesu hpe gara hku kasi la mai na kun?

Chyum daw hta lawm ai lam ni hpe kaja wa byin taw ai zawn byin hkra galaw nna, ahkri ahkrai lam ni hpe sawk sagawn yang, Chyum Laika hti ai shaloi grau pyaw wa na re.