Daw 5
Mungkan Ga A Matu Karai Kasang A Yaw Shada Lam Gaw Hpa Rai Ta?
1. Mungkan ga hpe Karai Kasang hpa majaw hpan da ai rai?
Yehowa gaw mungkan ga hpe, shinggyim masha ni a matu hpan da ai. Adam yan Ewa hpe, sumsing lamu hta nga na matu, hpan da ai nre. Karai Kasang gaw, sumsing lamu hta, lamu kasa ni hpe hpan da ngut sai. (Yoba 38:4, 6, 7) Karai Kasang gaw, Adam hpe ngwi pyaw tsawm htap ai, Edin sun ngu ai hparadisu hta, nga shangun ai. (Ningpawt 2:15-17) Yehowa gaw, Adam hte shi a kashu kasha ni hpe, mungkan ga hta htani htana asak hte, angwi apyaw nga lu na ahkaw ahkang jaw da ai.—Shakawn Kungdawn 37:29; 115:16 hpe hti u.
Shawng nnan e gaw, Edin sun langai sha hparadisu re. Adam yan Ewa gaw, shan a kashu kasha ni hte, mungkan ting hpring hkra galaw ra na re. Aten na wa yang, shanhte gaw mungkan ting hpe atsawm sha hkang lu nna, hparadisu byin hkra galaw ra na re. (Ningpawt 1:28) Mungkan ga gaw galoi mung n jahten hkrum ai sha, shinggyim masha ni a nta, prat tup byin mat na re.—Shakawn Kungdawn 104:5 hpe hti u.
Mungkan Ga hpe Karai Kasang Hpa Majaw Hpan Da Ai Kun? ngu ai video hpe yu u.
2. Ya aten hta mungkan ga gaw hparadisu hpa majaw n byin nga ai kun?
Adam yan Ewa gaw, Yehowa a ga n madat ai majaw, Edin sun kaw na gawt shapraw kau hkrum ai. Hparadisu mung mat mat sai, dai hpe bai lu hkra kadai mung n lu galaw ai. Chyum Laika hta “Lamu ga gaw tara n lang ai ni a lata e rawng nga ai” nga nna tsun da ai.—Yoba 9:24.—Ningpawt Ninghpang 3:23, 24 hpe hti u.
Masha ni a matu Yehowa a yaw shada lam n hpring tsup sana kun? N re! Shi gaw, chyahtum chyalai n-gun rawng ai wa re ai majaw, n lu galaw ai hpa mung n nga ai. (Esaia 45:18) Shinggyim masha ni a matu yaw shada da ai hpe, byin hkra galaw ya na re.—Shakawn Kungdawn 37:11, 34 hpe hti u.
3. Hparadisu gara hku bai byin wa na ta?
Karai Mungdan a Hkawhkam hku nna, Yesu uphkang ai shaloi, mungkan ga gaw hparadisu bai byin wa na. Hara Magedon ngu ai majan hta, Yesu gaw Karai Kasang a lamu kasa ni hpe woi awn nna, Karai Kasang hpe gumlau ai ni yawng hpe jahten kau na re. Dai hpang Yesu gaw, Satan hpe shaning 1,000 gyit hkang da na re. Karai Kasang hpang de tsap nga ai ni gaw, Yesu lam matsun nna makawp maga ya ai majaw, asak hkrung lawt lu na. Shanhte gaw mungkan Hparadisu hta, htani htana asak hkrung lu na re.—Shingran 20:1-3; 21:3, 4 hpe hti u.
4. Yakhkak jamjau ai lam ni galoi htum mat na ta?
Yakhkak jamjau ai lam ni hpe, Karai Kasang galoi jahtum kau na ta? Jahtum nhtoi ni wa yang, byin na “kumla” ni hpe, Yesu tsun dan ai. Ya byin nga ai mungkan a masa ni gaw, shinggyim masha ni hpe jahkrit nga ai. Dai gaw “mungkan ga a htum wa na” nhtoi hta, anhte asak hkrung nga ai hpe madun dan nga ai.—Mahte 24:3, 7-14, 21, 22 hpe hti u.
Yesu sumsing lamu kaw na mungkan ga hpe, shaning 1,000 uphkang ai laman hta, yakhkak jamjau ai lam ni yawng hpe, jahtum kau ya na re. (Esaia 9:5, 6; 11:9) Yesu gaw Hkawhkam hku sha n ga, Hkinjawng Agyi wa hku na mung, Karai Kasang hpe tsawra ai shinggyim masha ni a yubak hpe, yeng seng kau ya na re. Karai Kasang gaw machyi makaw ni, gumgai dingla wa ai hte, si hkrung si htan hpe, Yesu hku nna yeng seng kau ya na re.—Esaia 25:8; 33:24 hpe hti u.
5. Htawm hpang na Hparadisu hta kadai ni nga lu na rai ta?
Yehowa hpe Nawku Ai Shara ni hta, shi hpe tsawra nna, shi ra sharawng hkra gara hku galaw mai ai lam, sharin la mayu ai ni hpe mu lu na
Karai Kasang a ga madat ai ni gaw, Hparadisu hta nga lu na re. (1 Yawhan 2:17) Myit sumnung ai ni hpe tam nna, Karai Kasang hpe hkap la ai ni byin wa hkra, sharin ya na matu sape ni hpe Yesu shangun dat ai. Ya aten hta masha wan law law hpe, du na ra ai Hparadisu hta nga lu na matu, Yehowa lajang ya nga ai. (Zehpani 2:3) Yehowa Sakse Ni a Nawku Ai Shara ni hta, kaja ai dinghku la hte kawa byin mai ai lam, kaja ai dinghku num hte kanu byin mai ai lam ni hpe, masha ni sharin la nga ma ai. Kashu kasha ni mung kanu kawa ni hte arau nawku nna, Chyum Laika kaw na gara hku akyu lu mai ai lam, sharin la nga ma ai.—Mihka 4:1-4 hpe hti u.
