Chyum Laika hta tup hkrak gaw n tsun da ai. Raitim, Nazaret mare de bai n wa ai lam hte seng nna myit lawm hpa ahkri ahkrai lam nkau nga ai.

Na-um nasin byin wa nna, kasha shangai na ngu Mari hpe lamu kasa tsun ai. Dai lam hpe lamu kasa sa tsun ai shaloi, Mari hte Yosep gaw, Yosep a dai daw buga Nazaret mare hta nga nga ai. (Luk 1:26-31; 2:4) Hpang de, Egutu mung kaw na bai wa ai shaloi, Nazaret mare de bai wa ma ai. (Mat 2:19-23) Dai majaw, Yesu, Yosep, Mari ngu tsun dat ai hte Nazaret mare hpe sa mu ma ai.

Yuda mung kaw Elisabet ngu ai Mari a jinghku langai nga ai. Elisabet gaw hkinjawng Zakari a madu jan rai nna, hkalup sara Yawhan a kanu byin wa ai. (Luk 1:5, 9, 13, 36) Elisabet hpang Mari shata 3 sa chyai ai. Dai hpang, Nazaret mare de bai wa ai. (Luk 1:39, 40, 56) Dai majaw, Yuda makau grup-yin ni hpe Mari hkau nga ai re.

Dai hpang, “amying shalawm na matu” tinang a mare de wa ra na ngu Roma ni aming shapraw ai. Dai majaw, Nazaret mare kaw nna Betlehem mare de Yosep bu hkawm ai. Betlehem mare ngu ai gaw, “Dawi a mare” rai nna, Meshia shangai wa na ngu myihtoi da ai shara re. (Luk 2:3, 4; 1 Sa 17:15; 20:6; Mik 5:2) Dai mare kaw sha Yesu shangai wa ai. Sai naw hkalung nga ai Mari hte ma chyangai hpe shaga nna, grai tsan ai Nazaret mare de Yosep n kam bu hkawm ai majaw, Betlehem mare kaw sha matut nga taw ai. Betlehem mare gaw, Yerusalem mare hte deng 6 daram sha tsan ai. Dai majaw, ma chyangai hpe Yerusalem mare hta nga ai nawku htingnu de shaga mat nna, Jep Ai Tara hta hpyi shawn da ai hte maren, shagu hkungga nawng na matu loi mat ai.—Jaw 12:2, 6-8; Luk 2:22-24.

Shangai wa ai ma gaw, “Dawi a tingnyang” hpe hkringhtawng dagraw nna, “up” na ngu Mari hpe lamu kasa tsun ai. Dai majaw, Dawi a mare hta Yesu ang sha-a shangai wa ai n mai byin ai hpe Yosep hte Mari chye wa na re. (Luk 1:32, 33; 2:11, 17) Dai mare kaw matut nga let Karai Kasang lam matsun ai hpe la ai gaw hpaji rawng na re ngu myit wa ai rai na re.

Hpaji rawng ai ni du wa ai shaloi, Yosep hte nta masha ni gaw, Betlehem mare kaw kade daram na hkra nga taw sai hpe gaw tup hkrak anhte n chye ai. Raitim, tinang a dum nta hte rai taw sai. Yesu gaw ma chyangai n rai mat sai. “Ma kaji” rai taw sai. (Mat 2:11) Nazaret mare de n wa ai sha, Betlehem mare kaw nga taw ai gaw tsawmra na sai lachyum re.

Herod gaw “Betlehem . . . e rawng nga ai, ni ning kaw nna lawu grit re ai lasha ma kaji nlang hte hpe” sat kau shangun ai. (Mat 2:16) Dai lam lamu kasa sadi jaw ai ai shaloi, Yosep hte Mari gaw Yesu hpe woi nna Egutu mung de hprawng mat ai. Herod si ai du hkra dai kaw nga ai. Hpang de, dinghku nawng Nazaret de htawt mat ai. Betlehem de hpa majaw n wa ai kun? Yuda mung kaw Herod a kasha, grai nhkru ai Arkela-u up nga ai majaw re. Dai hta n-ga, dai de n wa na matu lamu kasa bai sadi jaw ai majaw mung re. Nazaret mare gaw Yehowa hpe nawku wa hkra, Yesu hpe bau maka na matu shimlum ai shara re.—Mat 2:19-22; 13:55; Luk 2:39, 52.

Sumsing lamu de lung na ni a matu Yesu lam n hpaw ya shi yang, Yosep si mat ai. Kade n na yang, mungkan ga ntsa hta bai hkrung rawt wa na re. Yesu shangai ngut ai hpang, Betlehem mare kaw hpa majaw matut nga ai hpe ahkri ahkrai chye lu na matu, dai shaloi she Yosep hte masha nan hkrum nna san yu ga.