Ĩsyĩtwa Mikaeli, kana kwosana na ndĩni imwe, “Mũtheu Michael,” nĩ ĩsyĩtwa Yesũ wĩtĩtwe atanamba kũka ĩũlũ wa nthĩ na ĩtina wa kũsyoka ĩtunĩ. a Mikaeli nĩwakandanĩie na Satani ĩtina wa kĩkwʼũ kya Mose na nĩwatetheeisye mũlaĩka kũtwaĩa mwathani Ndanieli ũvoo watũmĩtwe nĩ Ngai. (Ndanieli 10:13, 21; Yuta 9) Mikaeli ekalaa kwosana na ĩsyĩtwa yake, yĩla yonanasya “Nũũ Ũilyĩ ta Ngai.” Ekaa ũu kwa kũtetea Ũsumbĩ wa Ngai na kũkita amaitha make.​—Ndanieli 12:1; Ũvuanʼyo 12:7.

 Sisya maũndũ amwe matonya ũkũĩkĩĩthya kana Yesũ nĩwe Mikaeli ũla mũlaĩka mũnene.

•   Mikaeli nĩwe “ũla mũlaĩka mũnene.” (Yuta 9) Ĩsyĩtwa “mũlaĩka mũnene” yonanasya “mũnene wa alaĩka,” na yonekaa mĩsoanĩ o ĩlĩ nthĩnĩ wa Mbivilia. Mĩsoa ĩsu yelĩ ĩtũmĩĩte ndeto “mũlaĩka mũnene” kwonanyʼa no mũlaĩka ũmwe wĩ ĩsyĩtwa yĩu ĩndĩ ti aingĩ. Mũsoa ũmwe katĩ wa ĩsu ĩlĩ waĩtye kana Mwĩaĩi Yesũ ũla wathayũũkiwʼe “akatheea kuma ĩtunĩ, na wasya mũtũlu, na wasya wa mũlaĩka mũnene.” (1 Athesalonika 4:​16) Yesũ e na “wasya wa mũlaĩka mũnene” nũndũ nĩwe Mikaeli, ũla mũlaĩka mũnene.

•   Mikaeli nĩwe ũtongoesye ita sya alaĩka. ‘Mikaeli na alaĩka make nĩmokitie na ũla mũkũnga mũnene,’ Satani. (Ũvuanʼyo 12:7) Mikaeli e ũkũmũ mũnene ĩtunĩ, o na etĩtwe “ũmwe wa anene” na “ũla mũnene wĩ mbee mũno ũsumbĩnĩ.” (Ndanieli 10:13, 21; 12:1) Masyĩtwa aa meonanyʼa kana Mikaeli nĩwe “mũnene wa ita sya alaĩka,” o tondũ mũsomi ũmwe wa mavuku ma Ũtianĩo Mweũ wĩtawa David E. Aune waĩtye.

   Mbivilia ĩwetete o ĩsyĩtwa yĩngĩ yĩmwe ya ũla ũtongoesye ita sya alaĩka. Yĩeleetye “ĩvinda yĩla Mwĩaĩi Yesũ ũkavuanwʼa kuma ĩtunĩ vamwe na alaĩka ma vinya wake ũlĩlĩnzĩnĩ wa mwaki, akĩĩvanĩsya.” (2 Athesalonika 1:​7, 8; Mathayo 16:27) Yesũ ‘nĩwaendie ĩtunĩ, na alaĩka na mokũmũ na mavinya manyivwʼa kwake.’ (1 Vetelo 3:​21, 22) Vaitonyeka Ngai akethĩwa anyuvie Yesũ na Mikaeli methĩwe na kĩanda o kĩla kĩmwe kya kũtongoesya ita sya alaĩka. Ĩndĩ, nĩ ũndũ ũkwosana na kĩlĩko kwasya kana masyĩtwa asu elĩ meweta mũndũ o ũmwe.

•   Mikaeli “nũkaũngama” ‘ĩvindanĩ ya thĩna’ ũtaaĩthĩwa ĩngĩ. (Ndanieli 12:1) Ĩvukunĩ ya Ndanieli, ndeto ‘kũũngama’ ĩtũmĩĩtwe mavinda maingĩ kwonanyʼa mũsumbĩ ayĩũngama eke ũndũ wa mwanya. (Ndanieli 11:​2-4, 21) Yesũ Klĩsto, ũla wĩtĩtwe “Ndeto ya Ngai,” e ‘Mũsumbĩ wa Asumbĩ,’ akoosa ĩtambya ya mwanya anange amaitha onthe ma Ngai na aivonokya andũ ma Ngai. (Ũvuanʼyo 19:11-​16) Akeeka ũu ĩvindanĩ ya ũla “thĩna mũnene, ũndũ ũtaaĩthĩwa kuma mwambĩlĩlyo wa nthĩ.”​—Mathayo 24:21, 42.