Twĩ Ngũsĩ sya Yeova, nĩtũtanĩaa kũneenea maũndũ makonetye mũĩkĩĩo witũ na andũ ma ndĩni syonthe, ĩndĩ tũyĩthĩawa na ngwatanĩo maũndũnĩ ma ũthaithi vamwe na andũ me na mũĩkĩĩo wĩ kĩvathũkanyʼo na witũ. Mbivilia yonanĩtye kana Aklĩsto ma wʼo ‘nĩmakomanĩtwʼe nesa na kũkwatanwʼa,’ na ũndũ ũla mũnene ũtumĩte kĩu kĩthĩwa nĩ kana methĩawa na mũĩkĩĩo ũmwe. (Aeveso 4:16; 1 Akolintho 1:10; Avilivi 2:2) Nĩ kana methĩwe na ngwatanĩo ĩsu, nĩvendekaa maũndũ angĩ maingĩ eka kwĩthĩwa na wendo, tei, na kwĩthĩwa matonya kũekea. Mũĩkĩĩo witũ umanĩte na ũmanyi wa wʼo kuma Mbivilianĩ, na tũte na ũmanyi ũsu mũĩkĩĩo witũ no wa mana.​—Alomi 10:2, 3.

 Mbivilia ĩelekanĩtye kwĩthĩwa na ngwatanĩo na andũ me na mũĩkĩĩo wĩ kĩvathũkanyʼo na kwovanĩwʼa ĩsoki yĩmwe namo, na kwĩka ũu no kũlikye mũĩkĩĩo wa Mũklĩsto mũisyonĩ. (2 Akolintho 6:14-17) Nĩkyo kĩtumi Yesũ ũtaametĩkĩlya amanyĩwʼa make kwĩthĩwa na ngwatanĩo maũndũnĩ ma ũthaithi na ndĩni ingĩ. (Mathayo 12:30; Yoana 14:6) Mĩao ĩla Ngai wanenganie kwĩsĩla Mose nĩyavatĩte Aisilaeli kwĩthĩwa na ngwatanĩo maũndũnĩ ma ũthaithi na atũi moo. (Kuma 34:11-14) Ĩtina Aisilaeli ala maĩ aĩkĩĩku nĩmaleile ũtethyo ũla wesaa kũtuma methĩwa na ngwatanĩo maũndũnĩ ma ũthaithi na andũ maĩ na mũĩkĩĩo wĩ kĩvathũkanyʼo na woo.​—Esala 4:1-3.

 O ta mũtũmwa Vaulo, ĩla twĩ ũtavanyʼa nĩtwendeeawʼa nĩ kũmanya mosũanĩo na mũĩkĩĩo wa andũ “aingĩ.” (1 Akolintho 9:19-22) Tũineena namo, nĩtũtataa kũatĩĩa ũtao wa Mbivilia ũla wonanĩtye kana nĩtwaĩle kwĩthĩwa na ‘wia [kana, ndaĩa nene]’ kwa andũ ala angĩ.​—1 Vetelo 3:15.