Yesũ amanyĩisye andũ kwĩkalanasya na mũuo. Ĩndĩ ĩvinda yĩmwe atavisye atũmwa make atĩĩ: “Mũikasũanĩe kana nookie kũete mũuo kũũ nthĩ; ndyaaũka kũete mũuo ĩndĩ nĩ ũvyũ. Nookie kũete mũaanĩko: mũndũ akookĩlĩla ĩthe, mwĩĩtu akookĩlĩla inyia, na kĩveti kĩkookĩlĩla inyia wa mũũme.” (Mt. 10:34, 35) We oonanasya ata?

Yesũ ndeendaa kũaany’a mĩsyĩ, ĩndĩ nĩweesĩ kana momanyĩsyo make makaete mũaanĩko mĩsyĩnĩ ĩmwe. Kwoou ala mekwenda kũtw’ĩka amanyĩw’a ma Klĩsto na maivatiswa, no nginya maelewe kana mavinda amwe andũ moo ma mũsyĩ maikendeeaw’a nĩ ũtwi woo. Mavinda amwe, ala matwaanĩte namo kana andũ angĩ ma mũsyĩ nĩmatonya kũmavĩnga, na kĩu no kĩtume mona ve vinya kũendeea kũlũmany’a na momanyĩsyo ma Klĩsto.

Mbivilia yĩkĩĩte vinya Aklĩsto ‘methĩawe na mũuo na andũ onthe.’ (Alo. 12:18) Ĩndĩ momanyĩsyo ma Yesũ no methĩwe ta “ũvyũ” mĩsyĩnĩ ĩmwe. Ũu wĩthĩawa yĩla ũmwe weetĩkĩla momanyĩsyo ma Yesũ, ĩndĩ ala angĩ maileana namo. Vekala ũu, andũ ma mũsyĩ metw’ĩkĩthasya “amaitha” ma ũla ũendeee kwĩmanyĩsya ũw’o.—Mt. 10:36.

Mavinda amwe, amanyĩw’a ma Klĩsto ala mekalaa mĩsyĩnĩ ĩaanĩkĩte kĩ-ndĩni nĩmethĩawa maĩle kũtw’a memũtanĩthya Yeova na Yesũ kana nĩ andũ moo ma mũsyĩ. Kwa ngelekany’o, andũ ma mũsyĩ mate Ngũsĩ no mamathing’ĩĩsye matanĩe sikũkũ ya kĩ-ndĩni. Yĩla vathi ũu, no nginya matw’e memwendeesya ũũ. Yesũ aisye: “Mũndũ o na wĩva ũla wendaa ĩthe kana inyia kwĩ nyie ndambaĩle.” (Mt. 10:37) Nĩ w’o kana Yesũ ndoonanasya ethĩwa mũndũ nũkwenda kũtalwa ta ũmwaĩle no nginya aeke kwenda asyai make mũno. Ĩndĩ oonanasya kana no nginya mũndũ atw’e nĩ maũndũ meva ũkwona me ma vata thayũnĩ wake. Kwoou ethĩwa andũ ma mũsyĩ nĩmeũtũvĩnga, nĩtũendeeaa kũmenda, o twĩsĩ kana Ngai nĩwe twaĩle kũmwenda mũnango.

Vate nzika, nĩtũũmĩaa mũno yĩla twavĩngwa nĩ andũ ma mũsyĩ. Ĩndĩ amanyĩw’a ma Yesũ nĩmalilikanaa ndeto ii wawetie: “Mũndũ o na wĩva ũla ũtetĩkĩlaa kũkua mũtĩ wake wa mathĩna na kũngatĩĩa, ndambaĩle.” (Mt. 10:38) Kwa ndeto ingĩ, Aklĩsto monaa mathĩna amwe, ta kũvĩngwa nĩ andũ ma mũsyĩ, ne maũndũ maĩlĩte kwĩthĩwa meyũmbanĩtye kũmĩĩsya. Ĩndĩ o na vailye ũu, mekwatasya kana mwĩkalĩle woo mũseo nũũtuma andũ moo ma mũsyĩ mavĩndũa woni woo na mayenda kwĩmanyĩsya ũvoo ũla wĩ Mbivilianĩ.—1 Vet. 3:1, 2.