Yo waaĩkũlya kana ve ũndũ ũngĩ wa vata thayũnĩ eka o kũthaũka, kũthũkũma, kũtwaana kana kũtwawa, kũea syana, na ĩtina mũndũ ayĩsa kũkũa? (Yovu 14:1, 2) Mbivilia nĩyonanĩtye kana o na andũ ala maĩ oĩ vyũ nĩmaseng’aw’a nĩ ũndũ ũsu.—Soma Mũtavan’ya 2:11.

Yo ve vata wa kwĩthĩwa thayũ? Ũndũ wa mbee twaĩle kwĩkũlya nĩ, mũndũ aumie va? Ĩtina wa andũ aingĩ kũsũanĩa ũndũ mwĩĩ wa mũndũ na akili syũmbĩtwe, nĩmaĩkĩĩe kana no nginya vethĩwe ve Mũmbi mũĩ mũno ũla watũmbie. (Soma Savuli 139:14.) Na nũndũ wa ũu, no nginya ethĩwe atũmbie e na kĩtumi kĩseo! Kũmanya kĩtumi kĩu no kũtũtetheesye kwona thayũ wĩ wa vata.

Ngai nĩwaathimie Atamu na Eva na amanenga wĩa wa kwendeesya. Endaa masyaane mausũsye nthĩ, mamĩseũvye yĩthĩwe yĩ ya kwendeesya na mayĩkala vo tene na tene.—Soma Mwambĩlĩlyo 1:28, 31.

Kĩeleelo kya Ngai kĩyaaĩanĩa mwambĩĩonĩ nũndũ andũ nĩmaleanile na ũsumbĩki wake. Ĩndĩ ũu ndwaatuma Ngai alea andũ, na ayĩekana na kĩeleelo kyake kya kũmba andũ na nthĩ. Mbivilia nĩtũĩkĩĩthĩtye kana Ngai nũendeee kwĩka mĩvango ya kũtangĩĩa andũ ala aĩkĩĩku, na ayĩanĩsya kĩeleelo kyake kĩseo kya kũmba nthĩ! Kwoou endaa wĩtanĩa thayũ kwĩanana na ũndũ we wavangĩte! (Soma Savuli 37:29.) Ĩmanyĩsye kuma Mbivilianĩ ũndũ ũtonya kũtetheka kumana na kĩeleelo kya Ngai.