Andũ aingĩ mesilasya kana Ngũsĩ sya Yeova nĩ syĩtwa ya ndĩni nzaũ. Ĩndĩ, athũkũmi ma Ngai ũla wa w’o weka meetiwe “ngũsĩ” syake mbee wa myaka 2,700 mĩthelu. (Isaia 43:10-12) Tweesĩkĩe ta Amanyĩw’a ma Mbivilia kũvikĩĩa mwaka wa 1931. Nĩkĩ twambĩĩie kwĩtwa Ngũsĩ sya Yeova?

Syĩtwa yitũ nĩyĩmanyĩthasya Ngai witũ. Nthĩnĩ wa mavuku ma tene ma Mbivilia, syĩtwa ya Ngai, Yeova, yonekanaa mavinda maingĩ mũno. Nthĩnĩ wa Mbivilia mbingĩ, syĩtwa yĩĩ nĩyĩvetetwe na vandũ vayo vakekĩwa masyĩtwa ma ũnene ta Mwĩaĩi kana Ngai. Ĩndĩ, Ngai ũla wa w’o nĩwatũmĩie syĩtwa yake, Yeova, kwĩmanyĩthya kũla kwĩ Mose akyasya: “Yĩu nĩyo syĩtwa yakwa kũvika tene na tene.” (Kuma 3:15) Kwa nzĩa ĩsu, nĩweevathũkanisye na ngai syonthe sya ũvũngũ. Nĩtũtanaa kwĩtanĩw’a na syĩtwa ĩtheu ya Ngai.

Syĩtwa yitũ nĩyonanasya wĩa witũ. Andũ aingĩ ma tene, kwambĩĩa na mũndũ mũlũngalu Aveli, nĩmaumisye ũkũsĩ ĩũlũ wa mũĩkĩĩo woo nthĩnĩ wa Yeova. Noa, Avalaamu, Sala, Mose, Ndaviti, na angĩ methĩiwe me amwe ma ‘mũumbi mũnene wa ngũsĩ’ ũla wĩthĩĩtwe vo ĩvinda yonthe. (Aevelania 11:4–12:1) O tondũ mũndũ ũtonya kumya ũkũsĩ kotinĩ kwondũ wa mũndũ ũngĩ ũte na ĩvĩtyo, nĩtwĩyumĩtye tũtavye andũ ũw’o ĩũlũ wa Ngai witũ.

Tũatĩĩaa ngelekany’o ya Yesũ. Mbivilia ĩmwĩtaa “ngũsĩ yĩ kĩthito na ya w’o.” (Ũvuan’yo 3:14) Yesũ mwene aisye kana ‘nĩwamanyĩthisye syĩtwa ya Ngai’ na ‘nĩwaumasya ũkũsĩ wa ũla w’o’ ĩũlũ wa Ngai. (Yoana 17:26; 18:37) Kwoou, aatĩĩi ma w’o ma Klĩsto no nginya metanĩw’e na syĩtwa ya Yeova na kũyĩmanyĩthya. Ũu nĩw’o Ngũsĩ sya Yeova itataa mũno kwĩka.

• Nĩkĩ ala Amanyĩw’a ma Mbivilia meetĩkĩlile kwĩtwa Ngũsĩ sya Yeova?

• Yeova ethĩĩtwe na ngũsĩ kũũ nthĩ kwa ĩvinda yĩana ata?

• Ngũsĩ ya Yeova ĩla nene vyũ nũũ?