1 Yoana 3:1-24
3 Sũanĩai ũndũ Asa ũtwendete, o na nĩtwĩtawa syana sya Ngai! Na ithyĩ twĩ syana syake. Kĩu nĩkyo kĩtumi nthĩ ĩtatwĩsĩ, nũndũ ndĩmwĩsĩ.
2 Endwa, yu twĩ syana sya Ngai, ĩndĩ vainamba kwonanw’a ũndũ tũkethĩwa tũilye. Ithyĩ nĩtwĩsĩ kana yĩla ũkaumĩlw’a tũkeethĩwa tũilye take, nĩkwĩthĩwa tũkamwona o ũndũ we ũilye.
3 Na kĩla mũndũ wĩ na wĩkwatyo nthĩnĩ wake nĩwĩtheasya mwene, o tondũ ũsu ne mũtheu.
4 Kĩla mũndũ wĩkaa naĩ nũtũlaa mĩao o nayo, na naĩ nĩ ũtũli wa mĩao.
5 O na nĩmwĩsĩ kana nĩwaumĩlilw’e nĩ kana avetange naĩ sitũ, na nthĩnĩ wake vaiĩ naĩ.
6 Kĩla mũndũ wĩkalaa ngwatanĩonĩ vamwe nake ndaendeeaa kwĩka naĩ; na vaiĩ mũndũ ũendeeaa kwĩka naĩ ũmwonete kana ũmwĩsĩ.
7 Inyw’ĩ syana nini, mũndũ o na wĩva ndakamwasye; ũla ũendeeaa kwĩka ũlũngalu nĩ mũlũngalu, o tondũ we ne mũlũngalu.
8 Mũndũ ũla ũendeeaa kwĩka naĩ aumanĩte na Ndevili, nũndũ Ndevili ethĩĩtwe ayĩka naĩ kuma mwambĩlĩlyonĩ. Na nũndũ wa kĩtumi kĩu Mwana wa Ngai nĩwaumĩlilw’e nĩ kana anange mawĩa ma Ndevili.
9 Kĩla mũndũ ũtw’ĩkĩte mwana wa Ngai ndaendeeaa kwĩka naĩ, nũndũ veva* wa Ngai wĩ nthĩnĩ wake, na ndatonya kũendeea kwĩka naĩ, nũndũ nũtw’ĩkĩte mwana wa Ngai.
10 Syana sya Ngai na syana sya Ndevili nimanyĩkaa nũndũ wa ũndũ ũũ: Mũndũ o na wĩva ũla ũtaendeeaa kwĩka ũlũngalu ndaumanĩte na Ngai, o na ũla ũtamwendete mwana-a-asa wake.
11 Nĩkwĩthĩwa ũvoo ũũ nĩw’o mweewie kuma mwambĩlĩlyonĩ, kana nĩtwaĩle kwendana;
12 na tũikethĩwe tũilye ta Kaini, ũla waumanie na ũla mũthũku na amũaa mwana-a-inyia. Na amũaie nũndũ wa kyaũ? Amũaie nũndũ meko make mwene maĩ mathũku, ĩndĩ ma mwana-a-inyia maĩ malũngalu.
13 Mũikaseng’e, ana-a-asa, nĩkwĩthĩwa nthĩ nĩmũmenete.
14 Nĩtwĩsĩ kana nĩtumĩte kĩkw’ũnĩ tũkalika thayũnĩ, nũndũ nĩtwendete ana-a-asa. Ĩndĩ ũla ũtamendaa ana-a-asa ekalaa kĩkw’ũnĩ.
15 Kĩla mũndũ ũmũmenaa mwana-a-asa wake nĩ mũaani, na nĩmwĩsĩ kana kũiĩ mũaani wĩ na thayũ wa tene na tene.
16 Na nũndũ wa ũu nĩtũmanyĩte wendo, nũndũ ũsu nĩweeyumisye akw’a kwondũ witũ, naitũ nĩtwaĩlĩte kwĩyumya tũkw’e kwondũ wa ana-a-asa maitũ.
17 Ĩndĩ mũndũ o na wĩva ũla wĩ na syĩndũ sya nthĩ ĩno na ayona mwana-a-asa wake e na vata ĩndĩ ailea kũmwĩw’ĩa ĩnee, wendo wa Ngai wĩ nthĩnĩ wa mũndũ ũsu ata?
18 Inyw’ĩ syana nini, twaĩle kwendana, na ti kwa ndeto kana ũĩmĩ, ĩndĩ kwa meko na w’o.
19 Na nũndũ twĩ na wendo ũsu nĩtwĩsĩ kana tumanĩte na ũla w’o, na tũkaĩkĩĩthya ngoo sitũ mbee wake
20 ĩũlũ wa ũndũ o na wĩva ũla ngoo sitũ itonya kũtũsilĩla, nũndũ Ngai nĩ mũnene kwĩ ngoo sitũ na nĩwĩsĩ maũndũ onthe.
21 Endwa, ethĩwa ngoo sitũ iiũtũsilĩla, twĩ na ũthasyo wa kũneena na Ngai;
22 na kĩndũ o na kĩva kĩla twamũvoya nũtũnengae, nũndũ nĩtũkwataa mĩao yake na nĩtwĩkaa maũndũ ala mendeeasya methonĩ make.
23 Na ũũ nĩw’o mwĩao wake: kana twĩthĩwe na mũĩkĩĩo nthĩnĩ wa ĩsyĩtwa ya Mwana wake Yesũ Klĩsto na tũyendana, o tondũ watwĩaĩe.
24 O na ĩngĩ, ũla ũkwataa mĩao ya Ngai ekalaa ngwatanĩonĩ vamwe nake, na Ngai ekalaa ngwatanĩonĩ vamwe na mũndũ ũsu. Na nũndũ wa veva ũla watũnengie, nĩtwĩsĩ kana nĩwĩkalaa ngwatanĩonĩ vamwe naitũ.
Maelesyo ma kwongeleela
^ Ndeto kwa ndeto, “mbeũ.”
