Apostoloowaa Tʋma Labʋ 2:1-47
2 Kɩyakʋ ŋgʋ ki-wiye pɔtɔkaɣ Pantekooti Kazandʋ yɔ,+ pa-tɩŋa paakpeɣli ɖoli kʋɖʋm.
2 Nɛ tuda lɛ, kɔkɔɖɛ naɖɩyɛ lɩɩnɩ ɛsɔdaa kiŋ, ɛzɩ helim sɔsɔm nabʋyʋ makʋʋ yɔ, nɛ pisu ɖɩɣa ŋga ka-taa paacaɣaa yɔ ka-tɩŋa ka-taa.+
3 Nɛ pana nabʋyʋ ɛzɩ miŋ nzʋlʋma yɔ, nɛ pɩtayɩ nɛ pɩcaɣ pa-taa paa weyi lɛ ɛ-ñʋʋ taa,
4 nɛ fezuu kiɖeɖeu su pa-tɩŋa pa-taa+ nɛ papaɣzɩ kʋnʋmɩŋ* ndɩ ndɩ yɔɔdʋʋ, ɛzɩ fezuu haʋ-wɛ waɖɛ se pɔyɔɔdɩ yɔ.+
5 Alɩwaatʋ ndʋ tɩ-taa lɛ, Yuuda ñɩma mba pañaŋ Ɛsɔ nɛ palɩnɩ ajɛɛ kpeekpe taa yɔ paawɛ Yeruzalɛm.+
6 Nɛ kɔkɔɖɛ nɖɩ ɖɩlaba lɛ, ɛyaa samaɣ nakɛyɛ kpeɣli nɛ pɩɖɩɣzɩ-kɛ, mbʋ pʋyɔɔ yɔ paa anɩ ɛnɩɣaɣ pɔyɔɔdʋʋ ɛ-maɣmaɣ ɛ-kʋnʋŋ taa.
7 Toovenim taa lɛ, pɩɩɖɩɣzɩ-wɛ kpem nɛ pɔtɔ se: «Ɩcɔna, ɛyaa mba payɩ pɛwɛɛ nɛ pɔyɔɔdʋʋ yɔ, ɛzɩ pɩtɩkɛ Galilee mba+ pɛkɛnaa yaa we?
8 Ye mbʋ, pɩlabɩ ɛzɩma nɛ ɖa-taa paa weyi lɛ, ɛwɛɛ nɛ ɛnɩɣ ɛ-maɣmaɣ ɛ-kʋnʋŋ?
9 Ða Parɩtɩ mba, Medii mba+ nɛ Elam mba,+ Mezoopotamii, Yuudee nɛ Kapaadoosi, Pɔntɩ nɛ Aazii egeetiye taa mba,+
10 Frijii, Pamfiilii nɛ Ejipiti mba, nɛ Liibii ageeta wena añɔtɩnɩ Siirɛɛnɩ yɔ a-taa mba, Yuuda mba nɛ mba papɩsɩ Yuuda mba nɛ palakɩ pɔ-sɔnzɩ nɛ palɩɩnɩ Roma nɛ pɔkɔɔ Yeruzalɛm yɔ,+
11 Krɛɛtɩ mba, nɛ Arabii mba—ɖɩnɩɣ pɔyɔɔdʋʋ Ɛsɔ tʋma sɔsɔna tɔm ɖa-kʋnʋmɩŋ taa.»
12 Nɛ pɩɖɩɣzɩ pa-tɩŋa nɛ pɩcɔɔ pa-ñʋʋ taa kiii, nɛ pɔpɔzʋʋ ɖama se: «Pʋ-tɔbʋʋ lɛ suwe?»
13 Ɛlɛ lalaa ñowoŋaɣ-wɛ nɛ pɔtɔŋ se: «Sʋlʋm* kʋʋnɩ-wɛ.»
14 Ɛlɛ Pɩyɛɛrɩ nɛ Hiu nɛ Kʋɖʋm+ pakʋyɩ nɛ pasɩŋ, nɛ eheyi-wɛ nɛ nɔɔ kɩkʋyaɣ se: «Yuudee ɛyaa nɛ Yeruzalɛm mba kpeekpe mɩ, ɩtɩlɩ tɔm tʋnɛ nɛ iwelisini-m camɩyɛ.
15 Toovenim taa lɛ, pɩtɩkɛ sʋlʋm kʋʋnɩ ɛyaa panɛ ɛzɩ ɩmaɣzʋʋ yɔ, mbʋ pʋyɔɔ yɔ tanaŋ tɛɛ ñɩɣtʋ 9 taa ɖɩwɛɛ.*
16 Ɛlɛ tɔm ndʋ nayʋ Yowɛɛlɩ kaayɔɔdaa yɔ, ndʋ wɛna nɛ tɩlakɩ:
17 “Kɛdɛzaɣ kɩyakɩŋ taa lɛ, mankaɣ pɩyʋʋ men-fezuu tomnasɩ ndɩ ndɩ yɔɔ, nɛ mɩ-pɩyalaa nɛ mɩ-pɛlaa pakaɣ yɔɔdʋʋ natʋ tɔm nɛ mi-evebiya kaɣ naʋ natʋ nɛ mɩ-akpadɩyaa kaɣ ɖozuu ɖoza,+ Ɛsɔ yɔɔdʋʋna;
18 nɛ halɩ kɩyakɩŋ ɛnɩ ɩ-taa, mankaɣ pɩyʋʋ men-fezuu mo-yomaa abalɩñɩma nɛ mo-yomaa halɩñɩma yɔɔ, nɛ pakaɣ yɔɔdʋʋ natʋ tɔm.+
19 Nɛ mankaɣ labʋ piti lakasɩ ɛsɔdaa nɛ yʋsasɩ tɛtʋ yɔɔ: Calɩm, miŋ nɛ ñɔsɩ hulumiye kaɣ wɛʋ.
20 Wɩsɩ kaɣ pɩsʋʋ cɩkpɛndʋʋ nɛ fenaɣ kaɣ pɩsʋʋ calɩm pʋcɔ nɛ Yehowa* kɩyakʋ sɔsɔʋ ŋgʋ kɩwɛ ŋgee yɔ kɩtalɩ.
21 Nɛ weyi ɛyaɣ Yehowa* hɩɖɛ yɔ, pakaɣ ɛ-ñʋʋ yabʋ.”+
22 «Izrayɛɛlɩ ɛyaa mɩ, iwelisi tɔm tʋnɛ: Yesu Nazarɛɛtɩ tʋ kɛnɩ ɛyʋ weyi Ɛsɔ lɩzɩ-ɩ nɛ ɛwɩlɩ-mɩ kaɣlaa yɔ. Ɛsɔ tɩŋnɩ maamaaci lakasɩ nɛ piti lakasɩ nɛ yʋsasɩ nzɩ ɛtɩŋnɩ ɛ-yɔɔ nɛ ɛla mɩ-hɛkʋ taa yɔ sɩ-yɔɔ nɛ ɛwɩlɩ-mɩ ɩ,+ ɛzɩ mɩ-maɣmaɣ ɩsɩm yɔ.
23 Ɛyʋ ɛnʋ, weyi pakpa-ɩ nɛ pɛcɛlɩ ɛzɩ Ɛsɔ kaaɖʋʋ yɔ, nɛ ɛzɩ Ɛsɔ kaatɛm tɩlʋʋ yɔ,+ ɩtɩŋnɩ ɛyaa mba paañaŋ paɣtʋ yɔ pɔ-yɔɔ nɛ ɩkamɩ-ɩ sizika yɔɔ nɛ ɩkʋ-ɩ.+
24 Ɛlɛ Ɛsɔ lɩzɩ-ɩ sɩm wɩzasɩ* taa nɛ efezi-i,+ mbʋ pʋyɔɔ yɔ sɩm taapɩzɩɣ se pɩɖɔkɩ-ɩ.+
25 Mbʋ pʋyɔɔ yɔ Daviid yɔɔdɩ ɛ-yɔɔ se: “Mansɩɣ Yehowa* mɛ-ɛsɩndaa paa ɛzɩmtaa, mbʋ pʋyɔɔ yɔ ɛwɛ me-nesi kɩbanzɩ yɔɔ se pɩtaañamsɩ-m wiɖiyi kpa.
26 Pʋyɔɔ lɛ, ma-laŋɩyɛ nɩ leleŋ nɛ ma-nzʋlʋmɩyɛ wɛɛ laŋhʋlʋmɩyɛ sɔsɔɖɛ taa. Nɛ mankaɣ* wɛʋ lidaʋ taa;
27 mbʋ pʋyɔɔ yɔ ŋŋkaɣ-m* yebu Pɩlaʋ* taa, nɛ ŋŋkaɣ yebu ɖɔɖɔ se ñɛ-ɛyʋ siɣsiɣ tʋ ɛɖazɩ.+
28 Ŋwɩlɩ-m wezuu nʋmɔŋ; ŋkaɣ yebu nɛ taa leleŋ sɔsɔŋ su man-taa ñɛ-ɛsɩndaa.”+
29 «Mon-koobiya, iyele nɛ meheyi-mɩ hɔʋ ñʋʋdʋ Daviid tɔm kpayɩ, ɛsɩba nɛ pepimi-i,+ nɛ ɛ-pɩlaʋ wɛ ɖɛ-hɛkʋ taa halɩ nɛ sɔnɔ.
30 Ɛɛkɛ nayʋ nɛ ɛtɩlɩ se Ɛsɔ kaaɖuuni-i se ɛkaɣ caɣzʋʋ ɛ-lʋlʋʋ taa tʋ nɔɔyʋ e-kewiyaɣ kpelaɣ taa, pʋyɔɔ lɛ+
31 ɛɛlɛyɩ naʋ nɛ ɛyɔɔdɩ Krɩstʋ femtu tɔm, se patiyebi-i Pɩlaʋ* taa nɛ e-tomnaɣ tɩɖazɩ.+
32 Ɛsɔ fezi Yesu ɛnʋ, nɛ ɖa-tɩŋa ɖɩkɛ e-femtu aseɣɖe tɩnaa.+
33 Ye mbʋ, pakpazɩ-ɩ nɛ ɛwɛɛ Ɛsɔ nesi kɩbanzɩ yɔɔ,+ nɛ ɛmʋ Caa cɔlɔ fezuu kiɖeɖeu+ ŋgʋ kɩ-tamaɣ ɛlɛ kaalabɩ-ɩ yɔ, pʋyɔɔ ɛpɩyɩ mbʋ ɩnaɣ nɛ ɩnɩɣ yɔ.
34 Mbʋ pʋyɔɔ yɔ Daviid tɩkpa ɛsɔdaa, ɛlɛ ɛ-maɣmaɣ ɛyɔɔdaa se: “Yehowa* heyi man-Kɩbaɣlʋ se: ‘Caɣ me-nesi kɩbanzɩ yɔɔ
35 nɛ pɩkɔɔ nɛ pɩtalɩ alɩwaatʋ ndʋ mansɩɣ ño-koyindinaa nɛ pɛkɛ ña-nɩŋgbanzɩ ɖɩzɩyɛ yɔ.’”+
36 Pʋyɔɔ lɛ, Izrayɛɛlɩ ɖɩɣa tɩŋa ɛtɩlɩ toovenim taa se Ɛsɔ pɩsɩ-ɩ Kɩbaɣlʋ+ nɛ Krɩstʋ, Yesu weyi ɩkam sizika yɔɔ yɔ.»+
37 Nɛ panɩ tɔm ndʋ lɛ, pitukuni pa-laŋa siŋŋ nɛ pɔpɔzɩ Pɩyɛɛrɩ nɛ apostoloowaa lalaa se: «Koobiya, ɛbɛ pɩwɛɛ se ɖɩla?»
38 Pɩyɛɛrɩ heyi-wɛ se: «Ikpiɖi mɩ-kɩwɛɛkɩm yɔɔ,+ nɛ mɩ-taa paa weyi eyele nɛ pamɩyɩsɩ-ɩ lɩm+ Yesu Krɩstʋ hɩɖɛ taa se pɩsa nɛ pekpeɣ-mɩ mɩ-kɩwɛɛkɩm,+ nɛ ɩkaɣ mʋʋ fezuu kiɖeɖeu kʋjɔʋ.*
39 Mbʋ pʋyɔɔ yɔ, mɩ nɛ mi-piya, nɛ mba payɩ pɛwɛ poliŋ taa yɔ, mba payɩ Yehowa* ɖɛ-Ɛsɔ yaɣ ɛ-cɔlɔ yɔ,+ mɩ palabɩ tamaɣ ŋga.»+
40 Nɛ ɛtɩŋnɩ tɔm lɛɛtʋ sakɩyɛ yɔɔ nɛ ɛlɩzɩ aseɣɖe kpayɩ kpayɩ nɛ eseɣtiɣ-wɛ nɛ ɛtɔŋ se: «Iyele nɛ paya mɩ-ñʋʋ kpaɖʋʋ kɩdɛkɛdʋʋ kʋnɛ ki-nesi tɛɛ.»+
41 Nɛ mba petisi ɛ-tɔm yɔɔ nɛ taa leleŋ yɔ, pamɩyɩsɩ-wɛ lɩm;+ nɛ kɩyakʋ ŋgʋ, ɛyaa* ɛzɩ 3 000 mbʋ yɔ sɔzɩ tɔmkpɛlɩkɩyaa yɔɔ.+
42 Nɛ pɛ-ɛsa sɛɛnɩ apostoloowaa wɩlɩtʋ, nɛ paɖʋʋ taabalɩyɛ,* nɛ pɛkpɛndɩɣ pɔtɔkɩ tɔɔnasɩ,+ nɛ patɩmɩɣ.+
43 Toovenim taa lɛ, sɔɔndʋ kaapaɣzɩ kpaʋ paa weyi,* nɛ apostoloowaa lakaɣ piti lakasɩ nɛ yʋsasɩ sakɩyɛ.+
44 Mba payɩ paapɩsɩ tɔmkpɛlɩkɩyaa yɔ, paawɛ ɖoli kʋɖʋm nɛ pɛkpɛndɩ pɩtɩŋa,
45 nɛ pɛpɛdaɣ pa-ñɩm+ nɛ mbʋ pɛwɛna yɔ nɛ patayɩɣ ɛyaa tɩŋa pi-liidiye, ɛzɩ pɩpɔzʋʋ paa weyi yɔ.+
46 Nɛ paa kɩyakʋ ŋgʋ lɛ, paawɛ templo taa nɛ tamaɣ kʋɖʋmaɣ, nɛ pɔtɔkɩ pɔ-tɔɔnasɩ ɖɩsɩ ndɩ ndɩ taa nɛ patayɩɣ pɔ-tɔɔnasɩ nɛ taa leleŋ sɔsɔŋ nɛ laŋɩyɛ kɩbanɖɛ,
47 nɛ pasaŋ Ɛsɔ nɛ pehikiɣ kʋjɔʋ ɛyaa tɩŋa cɔlɔ. Alɩwaatʋ kʋɖʋmtʋ ndʋ tɩ-taa lɛ, Yehowa* wɛɛ nɛ ɛsɔzʋʋ pɔ-yɔɔ mba payabɩ pa-ñʋʋ yɔ paa kɩyakʋ ŋgʋ.+
Pɩ-tɛɛ tɔm
^ Yaa «nzʋlʋma.»
^ Yaa «Vɛɛ kɩfalʋʋ.»
^ Piye piye, «mbʋ pʋyɔɔ yɔ pɩkɛ evemiye ñɩɣyʋʋ 3 ñɩŋgʋ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Pɩpɩzɩɣ pɩkɛ, «nimasɩ.»
^ Cɔnɩ Tɔm kɩsɔzɩtʋ A5.
^ Piye piye, «mon-tomnaɣ kaɣ.»
^ Yaa «ŋŋkaɣ man-kalɩzaɣ.»
^ Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm kɩsɔzɩtʋ A5.
^ Yaa «falaa kʋjɔʋ.»
^ Cɔnɩ Tɔm kɩsɔzɩtʋ A5.
^ Yaa «kalɩzasɩ.»
^ Yaa «nɛ patayɩɣ ɖama mbʋ pɛwɛna yɔ.»
^ Yaa «paa kalɩzaɣ ŋga.»
^ Cɔnɩ Tɔm kɩsɔzɩtʋ A5.
