Septembre fenaɣ taa ɖɩkaɣ ñaɣʋ pana nɛ ɖɩtɩŋnɩ hatʋ cabɩ takayaɣ Nɩɩ wezuu leleŋ tam! yɔɔ nɛ ɖa nɛ paa ɖɩɣdʋ weyi lɛ, ɖɩkpɛlɩkɩ Bibl. Tɔm susuyaa pɩzɩɣ nɛ pala nʋmɔʋ lɩzɩyʋ sɩnɩyʋ tʋmɩyɛ nɛ paha ñɩɣtʋ 30. Ɛzɩma ɖɩkaɣ labʋ ŋgee tɔm susuu mbʋ?

• Ðɩcalɩɣ ɛyʋ katʋʋ lɛ: Labɩnɩ tʋmɩyɛ takayaɣ huyuu yɔɔ tɔm nɛ ŋyele nɛ ɖɩɣdʋ liu tɛɛ kɔtɩnɩ toovenim tɔm nɛ ŋñaɣ pana nɛ ŋwɩlɩ-ɩ ɛzɩma ɖa nɛ ɛyaa ɖɩkpɛlɩkɩɣ Bibl yɔ. Tɔzɩ mba paawɩlaa se kɛdaɣ ŋga ɩlaba yɔ, kɛkɛdɩnɩ-wɛ yɔ pɔ-yɔɔ pɩkpɛndɩnɩ pɩsɩ nɛ ŋna-ɩ waa. Paa alɩwaatʋ natʋyʋ taa paakizi Bibl kpɛlɩkʋʋ yɔ, nʋmɔŋ kɩfaŋ weyi ɩ-yɔɔ ɖɩtɩŋɩɣna lɛɛlɛɛyɔ nɛ ɖɩkpɛlɩkɩɣnɩ ɛyaa yɔ, ɩpɩzɩɣ nɛ ɩkɛdɩnɩ-wɛ, nɛ hatʋ cabɩ takayaɣ kɩfalaɣ ɖɔɖɔ pɩzɩɣ nɛ kɛkɛdɩnɩ-ɩ. Pɩtɩpɔzɩ se ɖɩsɩɩ hatʋ cabɩ takayaɣ mba ɖɩtɩmaɣnɩ-wɛ pa-ɖɩsɩ yɔ pɛ-tɛ, yaa ɖɩtɩnɩ-kɛ takayɩsɩ nzɩ ɖɩmaɣ-wɛ yɔ sɩ-yɔɔ ye ɛyaa mba pataawɩlɩ se kɛdaɣ ŋga ɖa nɛ wɛ ɖɩlaba yɔ, kɛkɛdɩnɩ-wɛ yɔ. Ɛgbɛyɛ taa Ɛsɔ sɛtʋ tʋmɩyɛ kɔɔmiite kaɣ labʋ ɖʋtʋ nɛ pala tɔm susuu kediɣzisi lɛɛsɩ fenaɣ ŋga ka-taa.

• Nʋmɔŋ lɛɛŋ: Ye ñɛ-ɛgbɛyɛ ɛlakɩnɩ tʋmɩyɛ taabɩlɩnaa nɛ kpatanaa mba paɖʋʋ pɔ-yɔɔ takayɩsɩ se posusini tɔm yɔ, ɖɩnɛ ɛlɛ, ɩpɩzɩɣ nɛ ɩɖʋ hatʋ cabɩ takayaɣ Nɩɩ wezuu leleŋ tam! pɔ-yɔɔ. Mba pawɩlaa se kɛdaɣ labɩ-wɛ ɖeu yɔ, heyi-wɛ se papɩzɩɣ nɛ patɩŋnɩ takayaɣ ŋga kɔ-yɔɔ nɛ pɛkpɛlɩkɩ Bibl falaa. Wɩlɩ-wɛ kɛlɛʋ ɛzɩma ɖa nɛ ɛyaa ɖɩkpɛlɩkɩɣ Bibl yɔ, yaa ɩla ɖʋtʋ nɛ pʋwayɩ lɛ ŋwɩlɩ-wɛ. Tɔm susuu tʋmɩyɛ yɔɔ cɔnɩyʋ pɩzɩɣ nɛ ɛla ɖʋtʋ nɛ tɔm susuyaa mba pɛwɛ niye yɔ, powolo tʋma ɖɩlaɖɛ wena awɛ mi-kooka taa yɔ a-taa nɛ paɖʋ Bibl kpɛlɩkʋʋ ɖʋtʋ ɛyaa mba pɛ-ɛsɩndaa. Ŋpɩzɩɣ ɖɔɖɔ nɛ ŋheyi ña-tʋmɩyɛ taa mba yaa ɛyaa mba ŋkatɩɣ alɩwaatʋ fanʋʋ tɔm susuu taa yɔ, se ña nɛ wɛ ɩkpɛlɩkɩ Bibl.

Yesu ɖʋ-ɖʋ paɣtʋ se ɖɩla ɛyaa nɛ papɩsɩ “tɔmkpɛlɩkɩyaa” nɛ ‘ɖɩwɩlɩ-wɛ.’ (Mat 28:19, 20) Tɛtɛ nɛ ŋgee tɔm susuu pʋnɛ pɩsɩnɩ-ɖʋ nɛ ɖɩtɩŋnɩ Nɩɩ wezuu leleŋ Tam! yɔɔ nɛ ɖɩtalɩ kaɖʋwa ŋga.