GALANI MA KA LINDA!
2022: Gole la kabe li na ku Dziyidzika Kakale la ka Shangashangana—Baibili Ikatini?
Ne 2022, ngwa, ku simigwa ne mabaka e mari, ne ngozi dze lubumbo ya kabe ili idzo dzi zhele mu dzikhani. Baibili ndiyo koga i no chenesa dumbu kuti shingikalo idzedzi dzo dwani.
Shingikalo dze 2022 dzo dwani dumbu
Shingikalo dze gole la ka pinda dzo lakidza bufakazi gwe kuti to chila mu chibaka chi no dangwa ne Baibili kuyi “mazhuba e bupelo.” (2 Timoti 3:1) Chibaka ichechi cha ka tangisa ne gole le 1914. Bona sekwa shingikalo dza ngwenu dzi yendidzana ne cha ka lebegwa mbeli ne Baibili ne kwe chibaka cha tili mu chili ngwenu:
“Ngwa.”—Matewu 24:6.
“2022 ya Kabe Ili Gole le ku Gwilila Kakale Kwe Ngwa i no Chisa ku Europe.” a
Bona nsholo u noti “Russia i no Thasela Ukraine.”
“Ku thaela kwe zojiwa.”—Matewu 24:7.
“2022: Gole le Zhala ya ka Bangalala.” b
Bona nsholo u noti “Nghwa i ku Ukraine i no Paphidza Kwazo ku Thaela Kwe Zojiwa mu Shango Yose.”
‘Magwele.’—Luka 21:11.
“Ku tangisa kakale kwe polio ne ku paphidzika kwe monkeypox ne COVID-19 ko dwilila ku thama kuti kube ne mathatha makulu, kwa ka thama kuti ku boneke kuti magwele a no digwana a ngozi, kakale sekwa machilo e bathu ali mu mbatsha.” c
Bona nsholo u noti “Bathu ba li 6 Million ba ka Bulawa ne COVID.”
“Zwinoshingikala zwinotjisa.”—Luka 21:11.
“Ku pisa kwa ka nginilila, bhamba, ku tshwa kwe shango, ne mirwalela. Chilimo che 2022 chowo alakaniwa ne mamo e bosa a ka pindilila a ka pelela a chinya, bathu banjinji ba fa ne thama kuti dzimiliyoni dze bathu mu shango yose dzi sale dzi sina pa dzi no gala.” d
Bona nsholo u noti “Dzi-temperature Dzi Pezhugwi Kupinda Dza ka Tongo be po mu Shango Yose.”
“Kupandukilana pakati kwe bathu [kene, phiphiti.].”—Luka 21:9.
“Bugali gwe bathu gu no paphidzika nekwe mathatha e ikhonomi, ku paphidzika kwazo kwe dzi-price, kwa ka thama kuti dzi-protest dze bathu ku dzihurumente ku paphidzike kwazo ne 2022.” e
Bona nsholo u noti “Ku Paphidzika Kwazo Kwe Dzi-price.”
Kowo shingikalani gole li no zha?
Ha ku na u nga leba dumbu kuti kowo shingikalani ne 2023. Cha ti no ziba wuti, mu chibaka chi pejo, Bushe gwe Ndzimu kene mbuso u kudzimu u nowo baakanya mamo e shango. (Daniele 2:44) Mbuso iwoyo u nowo pedzisa chi no thama kuti bathu ba dziyidzike ne ku thama kuti kuda kwe Ndzimu ku shingikale mu shango.—Matewu 6:9, 10.
To mu sendedzela kuti mu tobele kumbuludzo ya Jesu Kirisiti kakale ‘galani ma ka linda’ sekwa shingikalo dze shango dzi shingikadza buporofiti gwe Baibili. (Mako 13:37) To kumbila kuti u zwibatshanye naswi ku zwidiya kwa ka paphidzika sekwa Baibili i nga ku thusa ngwenu ne sekwa i nga pa iwe ne nsha uwo thembo dumbu ne kwe chibaka chi butuka chi no zha.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.