“Ivaikidile muve mmamwalimu.” (Vabal. 5:12) Kumbukila doni! Yeova—Mwalimu ntandi washilambo uti—ankutulalika wetu uti pakulota tuvapundishe vanu vanji kwaupande wake! Tuvapundishe vanu umwiu kwaupande umwe Yeova—palikola, pashipinga, na mushimadengo shakwandadya ntenga—adi ni dinema dyambone namene na madalaka makumene latuvenavo. Tulota kuulula dashi?

Lijibu lya shakudya ashi linkupatikana mumalove landike myombe Paulu ammanyia Timoti: “angaikangila kushomya maandiko paumbala, kulaililila na kupundisha.” Paulu akauka mushu aashidoni: “Pautenda davo po, undaliposha wako umwene pamo na avalá vakwigwilíla.” (1 Tim. 4:13, 16) Wako unkuvanavo ntenga ulota kwambola shingumi shavanu. Naivedoni, indikuvaikila wanjadedye kushomya kwako na kupundisha kwako. Ibulushula ai indikandyangigwa pakulota kukupwashela wako mushimandego asho. Lola lipwashalelo lipagwite mu ibulushula ai.

Yeova ni ‘Mwalimu Nkumene.’ (Ishai. 30:20) Ibulushula ai indakupwashela wako kuva nkúshomya na nkúpundisha wambone, kanji haunalivalive kenga Yeova ni mwene ntenga na ni anavautidya vanu kwake. (Nshuwau 6:44) Naivedoni, shwali ngwengwe ujugwa imumu yanashwe. Tumila Ibibiliya ngwengwe. Lambela kumupa Yeova lishangelo, kuliko kumya mang’amung’amu lako umwene. Likanyalidye kuvapwashela vanu pakulota vannagwaledye Yeova na ntima wave uti.

Wako undilalikigwa pakulota ukole shimadengo shivele na mana loe shavapatile vanu mwavo. Tunkuvanavo wakika kenga ukakulupila “dimongo dyaloka kumwe Nnungu” undaulula kushomya na kupundisha shana.—1 Pat. 4:11.

Vamwalimu mwenu,

Ibunge Ilangalela ya Mashaidi va Yeova