Sugunda Koríntius 9:1-15
9 Sobri kel trabadju pa djuda kes santu, N ka meste skrebe nhos más,
2 pamodi N sabe ma nhos sta prontu pa djuda. N sta ta pâpia ku orgulhu di nhos pa kes masedóniu. N fla-s ma dja ten un anu ki nhos na Akaia, nhos sta prontu pa djuda i nhos zelu motiva maioria di es.
3 N sta ta manda irmons na nhos, asi pa kel orgulhu ki nu ten na nhos, pamodi nhos vontadi di djuda, ka ser atoa, i pa nhos sta sénpri prontu, sima N flaba ma nhos ta staba.
4 Sinon, si kes masedóniu baba ku mi i es ka atxaba nhos prontu, nos, pa ka fla nhos, nu ta fikaba na vergónha pamodi nu kunfia na nhos.
5 Pur isu, N atxa ma N meste insentivaba kes irmon pa bai na nhos primeru i pa pripara nhos ajuda, sima nhos prometeba. Asi, óras ki nu txiga, kel ajuda ta sta prontu i kel-li ta mostra ma nhos ka ta da kel ajuda pamodi nhos é obrigadu, má pamodi nhos gosta di da.
6 Má sobri kel-li, ken ki símia poku tanbê ta kodje poku, i ken ki símia txeu tanbê ta kodje txeu.
7 Pa kada un di nhos faze sima nhos disidi na korason, ka kóntra vontadi* nen pa obrigason, pamodi Deus ta ama kel ki ta da ku alegria.
8 Tanbê, Deus é kapás di mostra nhos se grandi bondadi, asi pa nunka ka falta nhos kel ki nhos meste, i tanbê pa nhos ten txeu pa faze na tudu bon óbra.
9 (Sima sta skrebedu: “El reparti txeu i el da pa kes póbri. Se justisa ta kontinua pa tudu ténpu.”
10 Kel ki ta da txeu simenti pa simiador i pon pa kume, tanbê el ta da i el ta bira kel simenti más txeu pa nhos símia i el ta djuda nhos kodje txeu rezultadu na nhos trabadju justu.)
11 Na tudu kuza nhos sta ta ser riku pa nhos pode fika ta da di tudu manera, i kel-li ta poi pesoas ta agradese Deus.
12 Pamodi es trabadju pa públiku ka sta fazedu sô pa kuida dretu di nisisidadis di kes santu, má tanbê el ta ben poi txeu algen ta agradese Deus.
13 Es ta da Deus glória, pamodi es trabadju di djuda ta prova ma nhos ta obi ku kes notísia sábi sobri Kristu, ki nhos ta pâpia di el, i pamodi nhos gosta di da pa es i pa tudu algen.
14 I es ta inplora Deus pa nhos, i es ta mostra ma es ta ama nhos, pamodi kel grandi bondadi di Deus pa nhos.
15 Nu ta agradese Deus pa se prezenti ki ka ten palavras pa splika.
Nótas di rodapé
^ Ô: “ka ku tristéza”.
