‘Nhos debe ser instrutor’. (Heb. 5:12) Pensa na kel-li! Jeová, ki é midjór Instrutor ki izisti na Séu ku na Téra, ta konvida-nu pa nu inxina otus algen sobri el! Kalker diziginason pa inxina verdadi sobri Jeová na família, na kongregason ô na pregason é un grandi priviléjiu i txeu responsabilidadi. Modi ki nu pode ten bon rezultadu?

Nu ta atxa respósta na palavras ki apóstlu Polu skrebe pa Timótiu: ‘Kontinua ta midjora na lé na públiku, na da konsedju, na inxina.’ Polu fla más: ‘Óras ki bu faze si bu ta salva bu kabésa i kes ki ta obi-u.’ (1 Tim. 4:13, 16) Nu ten un mensaji ki ta salva vida pa pâpia ku otus algen. Pur isu é inportanti sforsa pa nu midjora nos manera di lé i di inxina. Es bruxura fazedu pa djuda-nu konsigi kel obijetivu li. Odja alguns ajuda ki kel bruxura li ten.

Jeová é kel ‘Grandiozu Instrutor’. (Isa. 30:20) Kel bruxura li ta djuda-u midjora bu manera di lé i di inxina, má nunka ka bu skese ma Jeová é Fonti di mensaji ki bu ta leba i é el ki ta skodje pesoas. (João 6:44 ) Nton, faze txeu orason pa pidi spritu santu. Uza Palavra di Deus txeu. Nunka ka bu inxina bus ideia, má sénpri djuda otus algen odja modi ki Jeová ta xinti sobri un asuntu. Sforsa pa djuda ken ki bu sta pâpia ku el dizenvolve amor di korason pa Jeová.

Nhos konvidadu pa inxina kel mensaji más inportanti ki umanus dadu. Nu sta ku txeu kunfiansa ma nhos ta ten bons rezultadu sima nhos ta ba ta dipende ‘di forsa ki Deus ta da’. — 1 Ped. 4:11.

Nhos irmons ki ta inxina djuntu ku nhos,

Grupu Enkaregadu di Óbra di Tistimunhas di Jeová