STUDU 39
Bu nómi sta na ‘livru di vida’?
‘I se dianti skrebedu un livru di rekordason pa kes ki tinha grandi ruspetu pa Jeová’. — MALAQUIAS 3:16.
KÁNTIKU 61 Nhos ten koraji, Tistimunhas!
KUZÊ KI NU STA BEN STUDA *
Sima ténpu ba ta pasa, Jeová poi otus nómi na ‘livru di vida’. (Odja parágrafus 1 i 2.)
1. Sima sta na Malaquias 3:16, ki livru ki Jeová sta ta skrebe i kuzê ki el ten?
DJA ten un monti anu ki Jeová sta ta skrebe un livru spesial. Kel livru li ten un lista di nómis ki kumesa ku nómi di kel primeru tistimunha fiel, ki é Abel. * (Luc. 11:50, 51) Sima ténpu ba ta pasa, Jeová poi otus nómi na kel livru i gósi el ten nómi di milhons di algen. Na Bíblia kel livru li ta txomadu di ‘livru di rekordason’, ‘livru di vida’ i ‘rolu di vida’. Na kel studu li nu ta ben txoma-l di ‘livru di vida’. — Lé Malaquias 3:16; Apo. 3:5; 17:8.
2. Nómi di kenha ki sta skrebedu na livru di vida i modi ki nos nómi pode sta skrebedu na es livru?
2 Kel livru spesial li ten nómi di tudu kes ki ta adora Jeová, ki ten grandi ruspetu pa el i ki ta da se nómi valor. Es ta ben ten oportunidadi di ten vida pa tudu ténpu. Nu pode ten nos nómi skrebedu na kel livru li si nu ten un amizadi fórti ku Jeová ku bazi na sakrifisiu di resgati di se Fidju, Jizus Kristu. (João 3:16, 36) Nos tudu nu krê pa nos nómi sta skrebedu na kel livru li, ka ta nporta si nos speransa é ba vive na Séu ô na Téra.
3-4. (a) Si nos nómi dja sta na livru di vida, kel-li krê fla ma nu ta ben resebe vida pa tudu ténpu? Splika. (b) Kuzê ki nu ta ben odja na kel studu li i na kel otu studu?
3 Kel-li krê fla ma tudu kes algen ki tene ses nómi skrebedu na kel livru li ta ben resebe vida pa tudu ténpu? Nu ta atxa respósta di kel pergunta li na kuzê ki Jeová fla Muizés na Êxodo 32:33. Jeová fla: ‘Kenha ki N ta paga di nha livru é ken ki peka kóntra mi.’ Nton, kes nómi ki sta na kel livru li pode pagadu. É sima ki primeru Jeová ta skrebe kes nómi ku lápis. (Apo. 3:5, nóta di rodapé.) Nos tudu nu krê ten sertéza ma nos nómi ta kontinua na kel livru li ti ki txiga kel ténpu ki ka ta da pa paga más, sima si el skrebedu ku kanéta.
4 Kel-li pode pô-nu ta faze alguns pergunta. Pur izénplu, kuzê ki Bíblia ta fla sobri kes nómi ki dja sta skrebedu na livru di vida i sobri kes nómi ki ka sta skrebedu na el? Ki ténpu ki kes algen ki ses nómi sta skrebedu na kel livru li ta ben resebe vida pa tudu ténpu? I kes algen ki móre sen ten oportunidadi di konxe Jeová? Ses nómi ta sta na kel livru li? Nu ta ben responde kes pergunta li na es studu i na kel otu studu.
NÓMI DI KENHA KI STA NA ES LIVRU?
5-6. (a) Sima sta na Filipenses 4:3, nómi di kenha ki sta skrebedu na livru di vida? (b) Ki ténpu ki ses nómi ta ben skrebedu pa tudu ténpu na livru di vida?
5 Nómi di kenha ki sta skrebedu na livru di vida? Pa responde kel pergunta li, nu ta ben pâpia di sinku grupu diferenti di algen. Alguns di es ses nómi sta na livru di vida i otus ka sta.
6 Kel primeru grupu é kes ki skodjedu pa ba governa ku Jizus na Séu. Ses nómi sta skrebedu na livru di vida? Sin. Sima apóstlu Polu fla se ‘kunpanherus di trabadju’ na Filipus, nómi di kes ki skodjedu ô ki konvidadu pa ba governa ku Jizus, dja sta na livru di vida. (Lé Filipenses 4:3.) Má pa ses nómi kontinua na kel livru li, es debe kontinua fiel. Dipôs, óras ki es resebe kel últimu sélu na algun momentu antis di es móre ô antis di kumesa grandi tribulason, ses nómi ta ben skrebedu pa tudu ténpu na kel livru. — Apo. 7:3.
7. Sima sta na Apocalipse 7:16, 17, ki ténpu ki nómi di kel monti di algen di otus ovelha ta ben skrebedu pa tudu ténpu na livru di vida?
7 Kel sugundu grupu é kel monti di algen di otus ovelha. Ses nómi dja sta skrebedu na livru di vida? Sin. Ses nómi ta kontinua na livru di vida dipôs ki es salva na Armajedon? Sin. (Apo. 7:14) Jizus fla ma kes algen li ki é sima ovelha, ta bai ‘pa vida pa tudu ténpu.’ (Mat. 25:46) Má kes ki salva na Armajedon ka ta resebe vida pa tudu ténpu lógu. É sima si ses nómi ta kontinua skrebedu na livru di vida ku lápis. Duránti Govérnu di mil anu di Jizus, el ta ben ‘kuida di es i el ta gia-s pa fontis di agu di vida.’ Kes ki sigi orientason di Jizus i ki na julgamentu final fladu ma es é fiel pa Jeová, ses nómi ta skrebedu pa tudu ténpu na livru di vida. — Lé Apocalipse 7:16, 17.
8. Nómi di kenha ki ka sta skrebedu na livru di vida i kuzê ki ta ben kontise ku es?
8 Kel tirseru grupu é kes kabritu ki ta ben distruídu na Armajedon. Ses nómi ka sta na livru di vida. Jizus fla ma es ta ‘bai pa distruison pa tudu ténpu’. (Mat. 25:46) Ku ajuda di spritu santu, Polu fla ma ‘é es mê ki ta ben sufri kastigu di distruison pa tudu ténpu’. (2 Tes. 1:9; 2 Ped. 2:9) Nu pode fla mésmu kuza sobri kes ki peka di propózitu kóntra spritu santu. Es tanbê es ta ben resebe distruison pa tudu ténpu envês di vida pa tudu ténpu. Ta fika klaru ma es ka ta resusitadu. (Mat. 12:32; Mar. 3:28, 29; Heb. 6:4-6) Gósi nu ben pâpia di dôs grupu di algen ki ta ben resusitadu na Téra.
KES KI TA BEN RESUSITADU
9. Sima sta na Atos 24:15, ki dôs grupu di algen ta ben resusitadu na Téra i kal ki é diferénsa entri es?
9 Bíblia ta pâpia di dôs grupu di algen ki ta ben resusitadu pa vive na Téra pa tudu ténpu, ki é kes ‘algen justu’ i kes ‘algen injustu.’ (Lé Atos 24:15.) Kes ‘algen justu’ é kes ki sirbi Jeová di manera fiel timenti es staba bibu, má kes ‘algen injustu’ ka sirbi Jeová di manera fiel. Na verdadi, txeu di kes kuza ki es faze é mariadu. Dja ki kes dôs grupu li ta ben resusitadu, nu pode fla ma ses nómi sta skrebedu na livru di vida? Pa responde kel pergunta li, nu ben pâpia di kada un di kes grupu.
10. Pamodi ki kes ‘algen justu’ ta ben resusitadu i ki priviléjiu alguns di es ta ben resebe? (Odja tanbê “Perguntas ki leitoris ta faze” na kel revista li sobri resureison na Téra.)
10 Kes ‘algen justu’ é kel kuartu grupu. Antis di es móre, ses nómi staba skrebedu na livru di vida. Ses nómi ta tradu di kel livru óras ki es móre? Nau, pamodi es sta kontinua ‘bibu’ na mimória di Jeová. Jeová ‘é Deus, ka di mortu, má di bibu, pamodi, pa el, tudu es sta bibu.’ (Luc. 20:38) Kel-li krê fla ma óras ki kes algen justu resusitadu pa vive na Téra ses nómi ta sta skrebedu na livru di vida, sikrê na komésu é “ku lápis”. (Luc. 14:14) Nu ka ten dúvida ma alguns di kes resusitadu li ta ben resebe priviléjiu di ser ‘prínsipis na Téra interu.’ — Sal. 45:16.
11. Kuzê ki kes ‘algen injustu’ meste prende pa ses nómi pode skrebedu na livru di vida?
11 Gósi nu ben pâpia di kel kintu grupu, ki é kes ‘algen injustu.’ Talvês pamodi es ka konxeba leis di Jeová, es ka leba un vida sima un algen justu antis di es móre. Nton, ses nómi ka sta skrebedu na livru di vida. Má Deus ta ben resusita-s asi pa es pode ten oportunidadi di tene ses nómi skrebedu na kel livru. Kes ‘algen injustu’ ta ben meste di txeu ajuda. Na vida ki es tinha antis, alguns di es faze kuzas mariadu própi. Es ta meste inxinadu vive di akordu ku leis di Jeová. Pa djuda-s faze kel-li, Reinu di Deus ta ben orienta kel trabadju más grandi ki dja fazedu na mundu pa inxina algen.
12. (a) Kenha ki ta ben inxina kes algen injustu? (b) Kuzê ki ta ben kontise ku kes algen ki ka obi ku kes kuza ki es inxinadu?
12 Kenha ki ta ben inxina kes algen injustu? É kel monti di algen i kes algen justu ki resusitadu. Pa kes algen injustu tene ses nómi skrebedu na livru di vida, es ta ba meste ten un amizadi fórti ku Jeová i da ses vida pa el. Jizus Kristu i kes skodjedu ki ta sta na Séu, ta djobe ku kuidadu si kes algen injustu sta ta sigi kes kuza ki es inxinadu. (Apo. 20:4) Kalker algen ki nega kel tipu di ajuda li ta distruídu, sikrê el ten 100 anu di idadi. (Isa. 65:20) Jeová ku Jizus pode lé korason i es ka ta dexa ningen faze nada mariadu pa straga mundu novu. — Isa. 11:9; 60:18; 65:25; João 2:25.
RESUREISON DI VIDA I DI JULGAMENTU
13-14. (a) Na pasadu, modi ki nu ta ntendeba kuzê ki Jizus fla na João 5:29? (b) Ki kuza inportanti nu debe repara na kes palavra di Jizus?
13 Jizus tanbê pâpia sobri kes algen ki ta ben resusitadu na Téra. Pur izénplu, el fla: ‘Ta ben txiga kel óra ki tudu kes ki sta na sipultura mimorial ta ben obi se vós i es ta sai: kes ki faze kuzas dretu, pa un resureison di vida, i kes ki faze kuzas mariadu pa un resureison di julgamentu.’ (João 5:28, 29) Kuzê ki Jizus krê flaba?
14 Na pasadu, nu ta ntendeba ma Jizus krê flaba ma kes kuza ki kes algen ki resusitadu ta ben faze é dipôs di ses resureison. Kel-li krê fla ma alguns ta ben resusitadu i ta faze kuzas dretu i otus ta resusitadu i ta faze kuzas mariadu. Má repara ma Jizus ka fla ma kes ki sai di sipultura mimorial ta ben faze kuzas dretu ô ta ben faze kuzas mariadu. El uza kes vérbu li na pasadu. El fla ma es ‘faze kuzas dretu’ i ma es ‘faze kuzas mariadu’. Kel-li ta mostra ma kes kuza ki es faze kontise antis di es móre. I kel-li ta faze sentidu, ka simé? Pamodi ningen ka ta ben dexadu faze kuzas mariadu na mundu novu. Kes algen injustu faze kes kuza mariadu antis di es móre. Nton, modi ki nu ta ntende kuzê ki Jizus fla sobri ‘resureison di vida’ i ‘resureison di julgamentu’?
15. Kenha ki ta ben resebe ‘resureison di vida’ i pamodi?
15 Kes algen justu ki faze kuzas dretu antis di es móre ta ben resebe ‘resureison di vida’ pamodi ses nómi inda ta sta skrebedu na livru di vida. Kel-li krê fla ma resureison di ‘kes ki faze kuzas dretu’ ki sta na João 5:29, é mésmu kuza ki resureison di kes ‘algen justu’ ki sta na Atos 24:15. Kel splikason li sta di akordu ku kuzê ki Romanos 6:7 ta fla: ‘Kenha ki móre se pekadus dja sta purduadu.’ Óras ki kes algen justu móre, Jeová ta púrdua ses pekadus, má el ta lenbra di tudu kes kuza dretu ki es faze timenti es staba bibu. (Heb. 6:10) É klaru ki kes algen justu ki resusitadu meste kontinua fiel pa ses nómi kontinua na kel livru di vida.
16. Kuzê ki é ‘resureison di julgamentu’?
16 I kes ki faze kuzas mariadu antis di es móre? Nbóra ses pekadu ta pagadu óras ki es móre, es ka sirbi Jeová di manera fiel kantu es staba bibu. Ses nómi ka sta skrebedu na livru di vida. Nton, resureison di ‘kes ki faze kuzas mariadu’ é mésmu kuza ki resureison di kes ‘algen injustu’ ki sta na Atos 24:15. Ses resureison é un ‘resureison di julgamentu.’ * Kel-li krê fla ma Jizus ta ben faze kes algen injustu un testi ô odja modi ki es ta reaji. (Luc. 22:30) Dipôs ki pasa algun ténpu, Jizus ta ben sabe si es merese pa ses nómi skrebedu na livru di vida. Si kes algen injustu muda ses vida mariadu ki es tinha i es da ses vida pa Jeová, ses nómi ta skrebedu na livru di vida.
17-18. Kuzê ki tudu kes algen ki resusitadu pa ben vive na Téra ta ben meste faze i kuzê ki é ‘kes kuza’ ki Apocalipse 20:12, 13 ta pâpia di el?
17 Má sikrê antis di es móre es éra justu ô injustu, kes algen ki resusitadu meste obi ku kes lei ki sta na kes rolu novu ki ta ben abridu duránti kes mil anu. Apóstlu Juan fla kuzê ki el odja na un vizon: ‘N odja kes mortu, kes grandi ku kes pikinoti, sakédu dianti di tronu, i abridu uns rolu. Má abridu otu rolu i éra kel rolu di vida. Kes mortu julgadu pa kes kuza ki staba skrebedu na kes rolu, di akordu ku kuzas ki es faze.’ — Apo. 20:12, 13.
18 Ku bazi na ki ‘kuzas’ ki kes algen ki resusitadu ta ben julgadu? É kuzas ki es faze antis di es móre? Nau! Lenbra ma kantu es móre, ses pekadus purduadu. Nton, li ‘kuzas ki es faze’ ka pode ser kes kuza ki es faze antis di es móre. Envês di kel-li é kes kuza ki es ta ben faze dipôs ki es inxinadu na mundu novu. Ti kes ómi fiel, sima Nué, Samuel, Davidi i Daniel ten ki ben prende sobri Jizus Kristu i mostra fé na se sakrifisiu. Nton, kes algen injustu ten ki ben prende mutu más!
19. Kuzê ki ta ben kontise ku kes algen ki nega kel oportunidadi sábi li?
19 Kuzê ki ta ben kontise ku kes algen ki nega kel oportunidadi sábi li? Apocalipse 20:15 ta fla: ‘Kes ki ses nómi ka staba skrebedu na livru di vida botadu na kel lagu di lumi.’ Sin, es ta ben distruídu pa tudu ténpu. Nton é inportanti nu ten sertéza ma nos nómi sta skrebedu na livru di vida i ma el ta kontinua la!
Un irmon sta partisipa na kel trabadju grandi pa inxina algen ki ta ben kontise duránti Govérnu di mil anu. (Odja parágrafu 20.)
20. Ki trabadju ki ta ben fazedu duránti Govérnu di mil anu? (Odja dizenhu na kapa.)
20 Govérnu di mil anu di Jizus ta ben ser un ténpu sábi! Kel-li ta inklui kel trabadju más grandi ki dja fazedu na mundu pa inxina algen. Má tanbê ta ben ser un ténpu ki ta ben djobedu modi ki kes algen justu i kes algen injustu ta konporta. (Isa. 26:9; Atos 17:31) Modi ki kel trabadju pa inxina algen ta ben fazedu? Kel otu studu ta ben djuda-nu ntende i da valor pa es trabadju sábi dimás.
KÁNTIKU 147 Deus promete vida pa tudu ténpu
^ Na kel studu li, nu ta ben odja un mudansa na nos manera di ntende kuzê ki Jizus fla na João 5:28, 29 sobri ‘un resureison di vida’ i ‘un resureison di julgamentu.’ Nu ta ben odja kuzê ki kes dôs resureison li krê fla i kenha ki ta ben ten ‘resureison di vida’ i ‘resureison di julgamentu.’
^ Kel livru li kumesa ta skrebedu ‘désdi ki mundu fundadu’, ô mundu di kes algen ki pode salvadu di ses pekadu. (Mat. 25:34; Apo. 17:8) Nton ta parse ma Abel, ki éra justu, é kel primeru algen ki se nómi podu na livru di vida.
^ Antis nu ta splikaba ma na kes versíklu li palavra ‘julgamentu’ krê fla un kuza negativu ô kondena un algen. É verdadi ki palavra ‘julgamentu’ pode krê fla kel-li. Má na kes versíklu li ta parse ma Jizus ka uza palavra ‘julgamentu’ pa pâpia di un kuza negativu ô puzitivu, má di un ténpu ki kes injustu ta ben fazedu testi ô ta ben djobedu modi ki es ta reaji. Ô sima un disionáriu gregu di Bíblia ta fla, pa “djobe modi ki un algen ta konporta.”
