Sima anu 2023 sta ta kumesa, nos tudu nu ten speransa ma kuzas ta midjora pa nos i pa nos família. Pamodi ki nu pode ten kel speransa li?

 Bíblia ten notísias sábi ki ta fla ma prublémas ki nu sta pasa pa el gósi é pa un ténpu i ma ka ta dura es ta ben kaba. Na verdadi, Bíblia “skrebedu pa inxina-nu. I nu ta ten speransa pamodi Skrituras. . . ta da-nu konsolu.” — Romanus 15:4.

•   Pa sabe más sobri kuzê ki Bíblia ta promete, lé artigu “Bu pode spéra un futuru midjór”.

 Kel speransa ki Bíblia ta da pode ser sima ‘un ánkura pa nos vida’. (Hebreus 6:19, nóta di rodapé) Kel speransa li pode djuda-nu fika kalmu. El pode djuda-nu lida ku prublémas ki nu ta pasa pa el gósi, ten un atitudi puzitivu i ser filís pa tudu ténpu. Pur izénplu:

•   Odja modi ki speransa ki Bíblia ta da djuda un ómi ki staba ta luta ku un vísiu. Odja vídiu N staba kansadu ku nha manera di vive.

•   Odja modi ki speransa ki Bíblia ta da pode djuda-nu óras ki un algen ki nu ta ama móre. Odja vídiu Konsolu pa kes ki ses família ô amigu móre.

 Txeu algen ta spéra pa kuzas dretu kontise, má es ka ten sertéza ma ses speransa algun dia ta kunpri. Kuzê ki Bíblia ta promete é diferenti. Pamodi? Pamodi promésas di Bíblia ben di Jeová a, ki ‘ka pode konta mintira’. (Tito 1:2) É sô Jeová ki ten puder di kunpri tudu se promésas, ki pode faze ‘tudu kel ki el krê’. — Salmo 135:5, 6.

 Nu ta konvida-u pa bu dexa speransa ki Bíblia ta da, ki é di kunfiansa, djuda-u. Bu pode bira bu kunfiansa na kes promésa li más fórti si bu ‘piskiza Skrituras ku kuidadu’. (Atus 17:11) Pa bu diskubri é modi sprimenta studa Bíblia ku ajuda di un algen. É di grasa. Kumesa anu di 2023 ku speransa!