Na Kitanu 26 avril 2023, insi Espagne ndimaka nsoba mosi ya nene na mambu ya me tala nsiku ya mpaku ya insi. Lukanu yai ta sadisa Bambangi ya Yehowa ya ke zingaka na Espagne na mambu mingi.

Guvernema me baka lukanu nde na insi yai ya mvimba, organizasio na beto kufuta diaka ve bampaku sambu na balupangu yina organizasio ke sadilaka sambu na mambu ya Kimfumu ya Yehowa. Lukanu yai ke pesa mpi bantu ya ke zingaka na insi yai yina ke pesaka mbongo sambu kisalu ya Bambangi ya Yehowa kukwenda na ntwala nzila ya kufuta diaka ve mpaku sambu na makabu yina bo ke pesaka. Diaka, nsoba yai ke ndimisa nde organizasio ya Bambangi ya Yehowa kele “dibundu ya me zabana” mutindu Tribinale ya Eropa ya Ke Tadilaka Banswa ya Bantu ke ndimaka yo.

Banda na juin 2006, leta me ndimaka nde Bambangi ya Yehowa ya Espagne kele dibundu yina leta me zabaka. Kansi leta vandaka me katula ntete ve mambu ya me tala kufuta bampaku mutindu bo me katulaka yo sambu na mabundu ya nkaka. Bampangi na beto landaka kulomba nde leta kusadila beto mpi mambu mutindu bo ke sadilaka mabundu ya nkaka na mambu ya bampaku. Kima ya kuyituka kele nde na Kintete 24 avril, bamfumu ya Biro ya Ntwadisi ya Insi bingisaka mimonisi ya Bambangi ya Yehowa ya Espagne na lukutakanu mosi. Na Lukutakanu yango, bo songaka bampangi na beto nde bo me soba nsiku ya mambu ya mpaku sambu na baorganizasio yina ke salaka ve kisalu ya mbongo. Nsiku yai me tadila mpi Bambangi ya Yehowa. Bilumbu zole na nima, na Kitanu 26 avril, na lukutakanu mosi ya badepute salaka, bo ndimaka nsoba yina ya nsiku. Bo ta yantika kusadila nsiku yango na juin 2023.

Beto kele na kiese mingi sambu na lukanu yai ya mfunu yina ke sala nde bampangi na beto Bambangi ya Yehowa ya Espagne kusadila Yehowa na kimpwanza ya mingi diaka.—Bafilipi 1:7.