Kinduku ti Nzambi
Mutindu beto tubilaka yo na disolo ya ntete, bantu mingi ke tubaka nde Biblia kele mukanda mosi ya santu. Bo ke monaka nde ntangu bo ke tangaka mpi ke sadilaka bandongisila na yo, bo ke kudiwaka pene-pene ya Nzambi mpi bo ke bakisaka lukanu ya luzingu.
Biblia ke tubaka nde bantu ya ‘kimpeve’ to bantu yina ke kudibanzaka sambu na kinduku na bo ti Nzambi, ke ndimaka mabanza na yandi mpi ke lemfukilaka minsiku na yandi. Kansi bantu yina ke buyaka lutwadisu ya Nzambi ke tulaka ntima na mabanza na bo mosi mpi ke landaka bampusa na bo.—Yude 18, 19; Baefezo 5:1.
KIVUVU
MUNSIKU YA BIBLIA: “Kana nge lemba nitu na bantangu ya mavwanga, ngolo na nge ta vanda fioti.”—Bingana 24:10, noti ya nsi ya lutiti.
MAMBU YINA YO KE TENDULA: Kana beto me lemba nitu, beto ta kuka ve kukanga ntima na bampasi. Kansi, kivuvu ke pesaka beto ngolo. Kana beto kele ti kivuvu, beto ta mona nde bampasi na beto kele sambu na ntangu fioti; ya kieleka, diambu mosi ya mbote lenda salama na nima.
MAMBU YA NGE LENDA SALA: Yindula mambu ya mbote yina ta salama na bilumbu ke kwisa. Na kisika ya kudiyangisa sambu na mambu ya lenda salama to kuvingila nde yo salama na mutindu ya kukuka, sala mambu na kuwakana ti balukanu na nge. Ata mpidina, “mambu ya kukonda kukana” lenda salama. (Longi 9:11) Ya kieleka, mbala mingi mambu ke salamaka mbote kuluta mutindu beto yindulaka. Yo yina, Biblia ke tubaka nde: “Kuna nkeni na nge na suka mpi kubika ve nde diboko na nge kupema tii na nkokila; sambu nge me zaba ve nki ta mena, kana nkeni yai to nkeni yina, to kana yonso zole ta mena.”—Longi 11:6.
BAMVUTU NA BANGIUFULA YA MFUNU YA LUZINGU
MUNSIKU YA BIBLIA: “Pesa mono mayele ya kubakisa mambu . . . Ndinga na nge . . . kele kieleka.”—Nkunga 119:144, 160.
MAMBU YINA YO KE TENDULA: Biblia ke pesaka bamvutu na bangiufula yina bantu ke yulaka mbala mingi. Mu mbandu
-
Beto me katukaka na wapi?
-
Sambu na nki beto kele na luzingu?
-
Inki ke kuminaka muntu kana yandi me fwa?
-
Keti luzingu ya nkaka kele?
Bantu mingi me sobaka luzingu na bo ntangu bo tadilaka bamvutu yina Biblia ke pesaka na bangiufula yai mpi na bangiufula ya nkaka.
MAMBU YA NGE LENDA SALA: Tadila mambu yina Biblia ke longaka. Lomba Mbangi mosi ya Yehowa sambu yandi sadisa nge na kubakisa Biblia. Kota na site na beto, jw.org, to kwenda na balukutakanu na beto; kukota kele ya ofele.
MINSIKU YA NKAKA YA BIBLIA
Tala video Sambu na Nki Beto Fwete Longuka Biblia? na jw.org. Yo kele na bandinga kuluta 880
ZABA NZALA NA NGE YA MAMBU YA KIMPEVE.
“Kiese na bantu yina ke bakisaka mbote nde bo kele ti nzala ya mambu ya kimpeve.”—MATAYO 5:3.
LONGUKA MAMBU MINGI YA ME TALA NZAMBI YA BIBLIA.
“Sosa Nzambi . . . mpi . . . mona yandi kibeni . . . yandi kele ntama ve ti konso muntu na kati na beto.”—BISALU 17:27.
TANGA MPI YINDULA MAMBU YINA KELE NA BIBLIA.
“Yandi ke vandaka na kiese na nsiku ya Yehowa * mpi yandi ke yindululaka nsiku na yandi na ndinga ya nsi mpimpa ti mwini. . . . Konso kima yina yandi ke sala ta nunga.”—NKUNGA 1:2, 3, noti na nsi ya lutiti.
^ par. 23 Biblia ke tubaka nde zina ya Nzambi kele Yehowa.
Nge Lenda Sepela Mpi Ti
NZOZULU YA NKENGI
Inki Mutindu Biblia Lenda Soba Luzingu na Mono?
Mukanda yai ya ntama kele ti bandongisila ya mfunu.
