Keti Mabundu Yonso Kele Mbote?

BETO kezinga na nsi-ntoto mosi ya kele ti mabundu mingi ya kuswaswana. Anketi mosi ya mpa kumonisaka nde na ntoto ya mvimba kele ti mabundu ya nene 19 mpi mabundu ya fyoti kiteso ya 10 000. Sambu mabundu kele mingi mpenza bubu yai, bantu kele ti mabaku mingi kibeni ya kusala bansola na yina metala dibundu. Yo yina, keti dibundu ya nge kepona kele mfunu?

Bantu yankaka ketubaka nde mabundu kele bonso banzila ya kuswaswana ya kenataka na ngumba mosi. Sambu na bo, nzila yina bo kepona kele na mfunu ve, sambu banzila yonso kenataka na kisika mosi. Bo keyindulaka nde sambu Nzambi Nkwa-Ngolo Yonso kele kaka mosi, nsukansuka mabundu yonso fwete nata na yandi.

Keti Banzila Yonso Kenataka na Nzambi?

Yezu Kristu, yina kele mosi na kati ya balongi ya mabundu yina bantu mingi kezitisaka, kutubaka nki na dyambu yai? Yandi zabisaka balongoki na yandi nde: “Beno kota na kielo yina kele ya fioti.” Sambu na inki? “Sambu kele ti kielo ya nene ti nzila ya nene yina ke nataka bantu na [lufwa], bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.”​—Matayo 7:​13, 14.

Keti Yezu vandaka kutuba mpenza nde mabundu yankaka kenataka “na lufwa”? To keti yandi vandaka kulonga nde kaka bantu yina kekwikilaka ve na Nzambi mpamba bantu kele na nzila ya nene, ebuna bantu yina  kekwikilaka na Nzambi​—ata bo kele na konso dibundu yina​—bo kele na nzila ya fyoti ya kenataka na luzingu?

Mbala mosi na nima ya kutuba nde banzila kele kaka zole, Yezu kutubaka nde: “Beno keba na bantu yina ke tubaka mambu ya luvunu na zina ya Nzambi; kana bo ke kwisila beno, bo ke monikaka bonso mameme, kansi na ntima na bo bo kele bonso bankoi.” (Matayo 7:15) Na nima yandi tubaka nde: “Bantu yina ke bingaka mono nde: ‘Mfumu, Mfumu’, bo yonso ve ta kota na Kimfumu ya Nzambi, kansi bantu yina ke salaka luzolo ya Tata na mono yina kele na zulu, bo kaka bantu ta kota na Kimfumu ya Nzambi.” (Matayo 7:21) Kana bo kebinga muntu mosi profete to kana yandi ketuba nde Yezu kele “Mfumu” na yandi, yo mefwana na kutuba nde yandi kele muntu ya kekwikilaka na Nzambi, kansi yandi kele ve mumpani. Ya kyeleka, Yezu vandaka kukebisa nde mabundu yonso ve kele ya mbote mpi nde beto fwete kwikila ve na balongi yonso ya mabundu.

Keti Mpila Kele ya Kuzaba Nzila ya Fyoti?

Sambu banzila yonso ve kenataka na Nzambi, inki mutindu nge lenda mona nzila ya fyoti yina kenataka na luzingu na kati ya mafunda ya banzila yina kele na ntwala na nge? Tadila mbandu yai: Yindula nde nge mevila na mbanza mosi ya nene. Nge mebaka lukanu ya kusosa lusadisu. Muntu mosi metubila nge na kukwenda na esti. Yankaka mesyamisa nge na kukwenda na westi. Kansi, muntu yankaka dyaka mezabisa nge na kupona konso nzila yina nge kemona nde yo kele mbote. Nsukansuka, muntu yankaka mebasisa karti mosi ya mbote mpi mesonga nge nzila ya mbote. Na nima yandi mepesa nge karti yina sambu nge sadila yo nzila-nzila. Keti nge lenda tula ve mpenza ntima nde nge takuma na kisika ya nge kekwenda?

Mutindu mosi, sambu na kupona nzila ya dibundu ya mbote, beto kele na mfunu ya karti ya mbote ya kimpeve ya kesongaka nzila. Keti karti yango kele? Ee, yo kele. Karti yango kele Biblia, yina ketuba nde: “Bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi.”​—2 Timoteo 3:16.

Ntembe kele ve nde na ndinga na beno, kele ti mbalula ya Biblia yina nge lenda sadila bonso karti ya kimpeve ya kesongaka nzila. Bambangi ya Yehowa, bambasisi ya zulunalu yai, mebasisaka mbalula ya Biblia ya beto lenda tudila ntima yina bo kebingaka nde Les Saintes Écritures—Traduction du monde nouveau. Kansi, kana nge kele ve Mbangi ya Yehowa, nge lenda sadila bambalula yankaka ntangu nge ketadila disolo ya kuzaba dibundu ya mbote mpi ya mbi. Yo yina, na masolo yai ya kelandana, beto kesadila bambalula mingi ya Biblia yina bantu ya mabundu yankaka kezitisaka na nsi-ntoto ya mvimba.

Ntangu nge ketanga masolo yai ya kelanda, fwanisa mambu yina nge mezaba ti mambu yina Biblia ketuba. Kuvila ve bangogo ya Yezu ya ketadila mutindu beto lenda swaswanisa dibundu ya mbote ti ya mbi. Yandi tubaka nde: “Konso nti ya mbote ke butaka bambuma ya mbote, kansi konso nti ya mbi ke butaka bambuma ya mbi. Nti ya mbote lenda buta bambuma ya mbi ve, nti ya mbi lenda buta bambuma ya mbote mpi ve.” (Matayo 7:​17, 18) Tadila kaka bambuma tatu ya mbote yina Biblia ketuba nde yo tasadisa na kuzaba “nti ya mbote.”

[Bangogo sambu na kubenda dikebi ya kele na lutiti 3]

Biblia kele bonso karti ya mbote yina lenda sadisa muntu na kumona nzila ya lusambu ya mbote