Biblia ke tuba pwelele nde Yezu vutulaka bantu na luzingu. Masolo yai kele ve ya luvunu; yo salamaka na bisika ya bantu vandaka kuzinga mpi na bantangu ya siki-siki. Mu mbandu, na mvu 31 T.B., bantu mingi salaka nzietelo ti Yezu katuka na Kapernaumi tii na Naini. Ntangu bo kumaka, bo kutanaka ti kibuka ya nkaka ya bantu. Nge lenda tudila lufutumuku yina salamaka na nima ntima sambu bo me sonikaka yo na Biblia, Ndinga ya Nzambi mpi yo salamaka na meso ya bantu yonso.—Tanga Luka 7:11-15.

Yezu futumunaka mpi nduku na yandi Lazare, yina fwaka tuka bilumbu iya. Nge lenda kwikila na diambu yina Yezu salaka kilumbu yango sambu yandi salaka yo na meso ya bantu mingi.—Tanga Yoane 11:39-45.

Mawa pusaka Yezu na kufutumuna bantu. Yandi futumunaka mpi bantu sambu na kumonisa nde Tata na yandi, Nto ya luzingu, pesaka yandi kiyeka na zulu ya lufwa.—Tanga Yoane 5:21, 28, 29.

Balufutumuku yina Yezu salaka ke sadisa beto na kutula ntima na mambu yina yandi ta sala na bilumbu ya ke kwisa. Yandi ta futumuna bantu mingi kibeni. Yandi ta futumuna mpi bantu yina zabaka ve ata kima mosi ya me tala Nzambi ya kieleka. Bo ta pesa bo dibaku ya kuzaba mpi ya kuzola Yehowa Nzambi.—Tanga Bisalu 24:15.