Beto kele ve ti bamfumu yina bo ke futaka salere na organizasio na beto. Kansi, mutindu bo vandaka kusala ntangu dibundu ya Bukristu yantikaka, bo ke ponaka bankengi ya me fwana “sambu na kugungula dibundu ya Nzambi.” (Bisalu 20:28) Bankuluntu yai kele babakala ya kuyela na kimpeve yina ke twadisaka dibundu mpi ke gungulaka yo, ‘sambu bo ke pusa bo ve, kansi na luzolo yonso na ntwala ya Nzambi; na zola ya kubaka ve luta na banzila ya luvunu, kansi na kiese yonso.’ (1 Piere 5:1-3) Inki kisalu bo ke salaka sambu na beto?

Bo ke kebaka beto mpi ke taninaka beto. Bankuluntu ke twadisaka mpi ke taninaka dibundu na kimpeve. Sambu bo ke zabaka nde Nzambi me pesaka bo mukumba yai ya mfunu, bankuluntu ke yalaka ve bantu ya Nzambi kansi bo ke sadisaka sambu beto vanda mbote mpi na kiese. (2 Bakorinto 1:24) Kaka mutindu ngungudi ke kebaka konso dimeme na yandi ti kikesa yonso, bankuluntu ke sosaka kuzaba konso muntu ya dibundu.—Bingana 27:23.

Bo ke longaka beto mutindu ya kusala luzolo ya Nzambi. Konso mposo, bankuluntu ke twadisaka balukutakanu ya dibundu sambu na kukumisa lukwikilu na beto ngolo. (Bisalu 15:32) Bampangi yai ya me kudipesaka ke bakaka kisika ya ntete na kisalu ya kusamuna, bo ke salaka ti beto mpi ke pesaka beto formasio na bitini yonso ya kisalu ya kusamuna.

Bo ke pesaka konso muntu kikesa. Sambu na kusadisa beto na kukumisa ngolo bangwisana na beto ti Yehowa, bankuluntu ya dibundu lenda kwisa kutala beto na nzo to na Nzo ya Kimfumu sambu na kupesa beto lusadisu mpi kikesa ya me katuka na Masonuku.—Yakobo 5:14, 15.

Katula kisalu ya bo ke salaka na dibundu, bankuluntu mingi ke vandaka mpi ti kisalu ya kinsuni mpi mikumba ya dibuta yina ke lombaka ntangu mpi dikebi na bo. Beto fwete zitisa bampangi yai ya ke salaka ngolo.—1 Batesalonika 5:12, 13.

• Inki kele mukumba ya bankuluntu?

• Na nki mitindu bankuluntu ke tudilaka konso muntu dikebi?