Ve, mabundu yonso kele ve mutindu mosi. Biblia ke tubilaka mabundu mingi yina ke sepedisaka ve Nzambi. Beto lenda kabula mabundu na mitindu zole.

1: Mabundu yina ke sambilaka banzambi ya luvunu

 Biblia ke sadilaka bangogo “luvunu,” “mpamba” mpi “kukonda mfunu” sambu na kutubila mabundu yina ke sambilaka banzambi ya luvunu. (Yeremia 10:3-5; 16:19, 20) Yehowa a Nzambi songaka bantu ya Izraele ya ntangu ya ntama nde: “Nge fwete vanda ve ti banzambi ya nkaka katula mono.” (Kubasika 20:3, 23; 23:24) Ntangu bantu ya Izraele vandaka kusambila banzambi ya nkaka, ‘Yehowa vandaka kuwa makasi ya ngolo’.—Kutanga 25:3; Levi 20:2; Bazuzi 2:13, 14.

 Nzambi me sobaka ve mutindu na yandi ya kutadila mabundu yina ke sambilaka “bayina bo ke bingaka banzambi.” (1 Bakorinto 8:5, 6; Bagalatia 4:8) Yandi ke lombaka bantu yonso yina ke zolaka kusambila yandi na kubika kuvukana ti mabundu yina ke sambilaka banzambi ya luvunu. Yo yina, yandi ke tuba nde: “Beno basika na kati na bo, beno kabwana ti bo.” (2 Bakorinto 6:14-17) Kana mabundu yonso ke vandaka mutindu mosi mpi kana yo yonso ke nataka na Nzambi, ebuna sambu na nki Nzambi ke tuba mambu ya mutindu yai?

2: Mabundu yina ke sambilaka Nzambi ya kieleka na mutindu yina yandi ke ndimaka ve

 Bantangu ya nkaka, bantu ya Izraele vandaka kusambila Nzambi mpi kulanda malongi ti bikalulu ya bantu yina vandaka kusambila banzambi ya luvunu. Kansi Yehowa vandaka kuzola ve ata fioti nde bo vukisa dibundu ya kieleka ti dibundu ya luvunu. (Kubasika 32:8; Kulonga 12:2-4) Yezu vandaka kutelemina bamfumu ya mabundu sambu na mutindu na bo ya kusambila Nzambi. Bo vandaka kudimonisa na meso ya bantu nde bo kele bansadi ya Nzambi, kansi na mutindu ya kubumbana bo vandaka ‘kuvweza mambu ya kuluta mfunu ya Nsiku, disongidila lunungu, mawa, mpi kwikama.’—Matayo 23:23.

 Mutindu mosi mpi bubu yai, dibundu ya ke nataka bantu na Nzambi kele kaka dibundu yina ke longaka malongi ya kieleka. Malongi yango ya kieleka kele na Biblia. (Yoane 4:24; 17:17; 2 Timoteo 3:16, 17) Mabundu yina ke longaka mambu ya ke wakana ve ti Biblia ke sadisaka ve ata fioti bantu na kukuma banduku ya Nzambi. Bantu ya nkaka ke yindulaka nde malongi mingi, mu mbandu Butatu Busantu, moyo ke fwaka ve mpi bilungi ya tiya me katukaka na Biblia. Kansi yo me katukaka na mabundu ya luvunu. Mabundu yina ke longaka mambu yai kele “mpamba” to kukonda mfunu sambu yo ke zitisaka bansiku ya mabundu kansi ve mambu yina Nzambi ke zolaka.—Marko 7:7, 8.

 Nzambi ke mengaka luvunu ya bantu ya mabundu. (Tito 1:16) Sambu dibundu kusadisa bantu na kukuma banduku ya Nzambi, yo fwete sadisa bo na kusoba bikalulu na bo ya mbi ya konso kilumbu mpi na kusambila ve Nzambi kaka na munoko. Mu mbandu, Biblia ke tuba nde: “Kana muntu ke yindula nde yandi ke sambilaka Nzambi kansi yandi ke kangaka ve ludimi na yandi, yandi ke kusa ntima na yandi mosi, mpi lusambu na yandi kele ya mpamba. [Dibundu] ya bunkete mpi ya kukonda mvindu na meso ya Nzambi mpi Tata na beto yo yai: kusadisa bana-nsiona mpi mifwidi ya bankento na bampasi na bo, mpi kubikala kukonda ditono ya nsi-ntoto.” (Yakobo 1:26, 27) Bible en Kituba ke sadila bangogo “kinzambi ya kieleka” sambu na kutubila dibundu yai ya bunkete mpi ya kieleka.