Keti Kimfumu ya Nzambi Kele na Kati ya Bantima na Beto?
Mvutu ya Biblia
Ve, Kimfumu ya Nzambi kele ve na bantima ya Bakristu. a Biblia ke tubilaka kisika yo kele ntangu yo ke bingaka yo nde “Kimfumu ya zulu.” (Matayo 4:17) Biblia ke monisaka nde yo kele mpenza guvernema yina ke yala na zulu.
Kimfumu ya Nzambi kele ti bamfumu, bantu yina yo ke yalaka, bansiku mpi yo ke salaka yonso sambu luzolo ya Nzambi kusalama na zulu mpi na ntoto.—Matayo 6:10; Kusonga 5:10.
Guvernema ya Nzambi to Kimfumu na yandi ta yala “bantu, makanda mpi bandinga” yonso na ntoto. (Daniele 7:13, 14) Nzambi yandi mosi muntu me tulaka Kimfumu yai kansi ve bantu.—Nkunga 2:4-6; Yezaya 9:7.
Yezu songaka bantumwa na yandi nde bo ta kutana ti yandi na Kimfumu ya zulu sambu bo “vanda na bakiti ya kimfumu.”—Luka 22:28, 30.
Kimfumu ya Nzambi ta fwa bambeni na yo yonso.—Nkunga 2:1, 2, 8, 9; 110:1, 2; 1 Bakorinto 15:25, 26.
Biblia ke tubaka ve nde Kimfumu ya Nzambi kele na kati ya bantima na beto mpi nde yo ke yalaka na kati ya bantima na beto. Kansi Biblia ke monisaka nde “ndinga ya Kimfumu” to ‘nsangu ya mbote ya Kimfumu’ ke vandaka ti ngolo ya kusimba bantima na beto.—Matayo 13:19; 24:14.
Bangogo “Kimfumu ya Nzambi kele na kati na beno” ke tendula nki?
Mutindu Babiblia ya nkaka me balulaka verse ya Luka 17:21 ke sadisaka ve bantu ya nkaka na kuzaba kisika Kimfumu ya Nzambi kele. Mu mbandu, Bible en Kituba me balulaka yo nde “Kimfumu ya Nzambi kele na kati na beno.” Sambu na kubakisa verse yai mbote, beto fwete tadila baverse ya kele na ntwala mpi na nima na yo.
Kimfumu ya Nzambi vandaka ve na kati ya bantima ya mbi ya bambeni ya Yezu yina vandaka kusosa kufwa yandi
Yezu vandaka kutubila Bafarize, kimvuka mosi ya bantwadisi ya dibundu yina vandaka kutelemina yandi mpi kusala komplo ya kufwa yandi. (Matayo 12:14; Luka 17:20) Keti nge ke yindula nde Kimfumu vandaka mpenza na kati ya bantima ya mbi ya bantu yai ya ntu-ngolo? Yezu songaka bo nde: “Na kati beno me fulukaka na luvunu ti masumu.”—Matayo 23:27, 28, Bible en Kituba.
Babiblia ya nkaka ke balulaka mbote mambu yai ya Yezu tubaka na Luka 17:21: “Kimfumu ya Nzambi kele awa ti beno.” (Beto bantu me tengamisa ngogo yai, Contemporary English Version) Kimfumu ya Nzambi kele na kati-kati na beno (Biblia—Mbalula ya Nsi-Ntoto ya Mpa) Ya kieleka, Kimfumu ya Nzambi vandaka na “kati-kati” ya Bafarize sambu Yezu yina Nzambi ponaka sambu na kuvanda Ntotila ya Kimfumu yai vandaka pana na ntwala na bo.—Luka 1:32, 33.
a Mabundu mingi ke longaka nde Kimfumu ya Nzambi kele na kati na beto to na kati ya bantima na beto. Mu mbandu eglize mosi na États-Unis (Convention baptiste du Sud) ke longaka nde Kimfumu ya Nzambi ke vandaka mpi “na ntima mpi na luzingu ya muntu.” Mutindu mosi mpi, Papa Benoît XVI sonikaka na mukanda mosi (Jésus de Nazareth) nde: “Kimfumu ya Nzambi ke kwisaka na ntima mosi ya bulemfu.”
Nge Lenda Sepela Mpi Ti
MALONGI YA MFUNU YA BIBLIA
Kimfumu ya Nzambi Kele Nki?
Ntangu Yezu vandaka kusamuna, yandi longaka mambu ya me tala Kimfumu ya Nzambi kuluta malongi yonso ya nkaka. Na nsungi ya bamvula mingi, bantu ke sambaka sambu Kimfumu yango kukwisa.
NTENDULA YA BAVERSE YA BIBLIA
Ntendula ya Marko 1:15—“Kimfumu ya Nzambi Me Kuma Penepene”
Keti Yezu tubaka nde Kimfumu yantikaka dezia kuyala?
NZOZULU YA NKENGI
Nani Kele Ntotila ya Kimfumu ya Nzambi?
Bansoniki mingi ya Biblia sonikaka mambu yina ke sadisaka beto na kuzaba muntu yina ta vanda Ntotila ya Kimfumu ya Nzambi. Na disolo ya luzingu ya bantu, muntu mosi mpamba ke lungisa mambu yina beto me katuka kutubila.
MALONGI YA BIBLIA
Meka Kulonguka Biblia ti Beto
Longuka Biblia ti Mbangi Mosi ya Yehowa kukonda kufuta mbongo.