Isaia 45:1-25
45 Ũũ nĩguo Jehova erĩte Kurusu,+ ũrĩa mũitĩrĩrie maguta wake,Ũrĩa nyitĩte guoko gwake kwa ũrĩo+Nĩgetha ndoorie ndũrĩrĩ mbere yake,+Ndunye athamaki indo cia mbaara,*Hingũre mbere yake mĩrango ĩrĩa ya icunjĩ igĩrĩ,Nĩguo ihingo itikanahingwo:
2 “Nĩ ngaathiĩ mbere yaku,+Na njaraganie tũrĩma.
Mĩrango ya gĩcango ndĩmĩtuange icunjĩ,Nayo mĩgamba ya kĩgera ndĩmĩtinangie.+
3 Nĩ ngaakũhe mĩthithũ ĩrĩa ĩrĩ nduma-inĩNa mĩthithũ ĩrĩa mĩhithe kũndũ kwĩhithĩte,+Nĩguo ũmenye atĩ niĩ nĩ niĩ Jehova,Ngai wa Isiraeli, o we ũragwĩta na rĩĩtwa rĩaku.+
4 Nĩ ũndũ wa Jakubu ndungata yakwa na Isiraeli ũrĩa ndĩthuurĩire,Ndĩragwĩta na rĩĩtwa rĩaku.
Ndĩrakũhe rĩĩtwa rĩa gĩtĩo, o na gũtuĩka ndũnjũĩ.
5 Niĩ nĩ niĩ Jehova, na gũtirĩ ũngĩ.
Gũtirĩ Ngai ũngĩ tiga niĩ.+
Nĩ ngũkũhe hinya,* o na gũtuĩka ndũnjũĩ.
6 Nĩguo andũ mamenyeKuuma irathĩro rĩa riũa o nginya ithũĩro rĩarĩoAtĩ gũtirĩ ũngĩ tiga niĩ.+
Niĩ nĩ niĩ Jehova, na gũtirĩ ũngĩ.+
7 Nĩ ndũmaga kũgĩe ũtheri+ na ngatũma kũgĩe nduma,+Thondekaga thayũ+ na ngatũma kũgĩe ũũru;+Niĩ Jehova, nĩ ngwĩka maũndũ macio mothe.
8 Wee igũrũ, uria mbura;+Matu nĩ moirie ũthingu.
Thĩ nĩ ĩhingũke na ĩgĩe na maciaro ma ũhonokio,Na ĩtũme ũthingu ũthundũke hĩndĩ o ĩyo.+
Niĩ Jehova nĩ niĩ ndĩmĩũmbĩte.”
9 Kaĩ ũrĩa ũgianaga* na Mũũmbi wake* arĩ na haaro-ĩ,Nĩ gũkorũo we no gĩcere kĩa rĩũmbaGatagatĩ-inĩ ka icere iria ingĩ cia rĩũmba irĩ thĩ!
Hihi rĩũmba no rĩũrie Mũũmbi* ũũ: “Nĩ kĩĩ ũrathondeka?”+
Kana hihi wĩra waku uuge ũũ: “Ndarĩ na moko”?*
10 Kaĩ ũrĩa ũũragia mũthuri ũũ: “Wee ũgũtuĩka ithe wa ũ?” arĩ na haaro-ĩ!
Na ũrĩa ũũragia mũtumia ũũ: “Ũraciara kĩĩ?”*
11 Ũũ nĩguo Jehova oigĩte, o we Ũrĩa Mũtheru wa Isiraeli,+ Ũrĩa wamũmbire:
“Hihi no ũnjũrie kĩũria nĩ ũndũ wa maũndũ marĩa marokaNa ũnjathe ũhoro-inĩ wĩgiĩ ariũ akwa+ o hamwe na wĩra wa moko makwa?
12 Ndombire thĩ+ na ngĩũmba mũndũ thĩinĩ wayo.+
Narĩo igũrũ ngĩrĩtambũrũkia na moko makwa mwene,+Na nĩ niĩ njathaga mbũtũ ciakuo ciothe.”+
13 “Nĩ njarahũrĩte mũndũ na ũthingu,+Na nĩ ngũrũngaria njĩra ciake ciothe.
Nĩwe ũgaaka itũũra rĩakwa+Na arekererie andũ akwa arĩa marĩ ithamĩrio-inĩ,+ hatarĩ marĩhi kana ihaki,”+ ũguo nĩguo Jehova mũnene wa ita ekuuga.
14 Ũũ nĩguo Jehova oigĩte:
“Aruti wĩra a Misiri o hamwe na ahũũri biacara a Ethiopia na Asabea arĩa araihu,Nĩ magooka kũrĩ we na matuĩke aku.
Magaathiaga marĩ thutha waku mohetwo na mĩnyororo.
Magooka na makũinamĩrĩre.+
Magaakwĩra mahoya-inĩ ũũ, ‘Hatarĩ nganja Ngai arĩ hamwe nawe,+Na gũtirĩ ũngĩ; gũtirĩ Ngai ũngĩ.’”
15 Ti itherũ wee ũrĩ Ngai wĩhithaga,Wee Ngai wa Isiraeli, o wee Mũhonokia.+
16 Othe nĩ magaaconoka na maconorithio;Arĩa mathondekaga mĩhianano othe nĩ makoimagara mathiĩ maconokete.+
17 No Isiraeli nĩ akaahonokio nĩ Jehova na ũhonokio wa tene na tene.+
Mũtigaaconorithio o na kana mũconoke tene na tene.+
18 Nĩ gũkorũo ũũ nĩguo Jehova oigĩte,O we Mũũmbi wa igũrũ,+ Ngai ũrĩa wa ma,Ũrĩa wombire thĩ, Mũũmbi wayo ũrĩa wamĩrũmirie wega,+Na ndaamĩũmbire hatarĩ gĩtũmi,* ĩndĩ aamĩũmbire nĩguo ĩtũũragwo:+
“Niĩ nĩ niĩ Jehova, na gũtirĩ ũngĩ.
19 Ndiaririe ndĩ handũ hehithĩte,+ bũrũri-inĩ wa nduma;Ndierire mbeũ ya* Jakubu atĩrĩ,‘Njariai hatarĩ gĩtũmi.’*
Niĩ nĩ niĩ Jehova, o we waragia maũndũ ma ũthingu na akamenyithania maũndũ marũngĩrĩru.+
20 Cokanĩrĩrai hamwe na mũũke.
Ũkai mũrĩ hamwe, inyuĩ mũũrĩte kuuma ndũrĩrĩ-inĩ.+
Arĩa mathiaga makuuĩte mĩhianano ya gwacũhio matirĩ ũndũ moĩ,
Na mahoyaga ngai ĩtangĩhota kũmahonokia.+
21 Rutai ũira wanyu, rehei ciira wanyu.
Nĩ macokanĩrĩre hamwe marĩ na ũrũmwe.
Nũũ warathĩte maũndũ maya kuuma o tene
Na akaria ũhoro wamo kuuma mahinda mahĩtũku?
Na githĩ ti niĩ Jehova?
Gũtirĩ Ngai ũngĩ tiga niĩ;Ngai mũthingu na Mũhonokia,+ gũtirĩ ũngĩ tiga niĩ.+
22 Cokai kũrĩ niĩ nĩguo mũhonoke,+ inyuĩ ituri ciothe cia thĩ,Nĩ gũkorũo niĩ nĩ niĩ Ngai, na gũtirĩ ũngĩ.+
23 Nĩ ndĩĩhĩtĩte na niĩ mwene;Kiugo nĩ kiumĩte kanua-inĩ gakwa na njĩra ya ũthingu,Na gĩtirĩ hĩndĩ gĩgaacoka:+
Maru mothe nĩ magaaturio mbere yakwa,Nĩmĩ ciothe nĩ ikeehĩta na wĩhokeku+
24 Na ciuge atĩrĩ, ‘Ti itherũ harĩ Jehova nĩho harĩ ũthingu wa ma na hinya.
Arĩa othe mamũrakaragĩra magooka mbere yake maconokete.
25 Harĩ Jehova mbeũ yothe ya* Isiraeli nĩ ĩkooneka yagĩrĩire,+Na nĩ makeeraha nĩ ũndũ wake.’”
Tũũhoro twa magũrũ-inĩ
^ Ũkk., “Ndegerie njohero cia athamaki.”
^ Ũkk., “nĩ ngũkũhotora ngũrũmĩtie biũ.”
^ Kana “ũkararanagia.”
^ Kana “Ũrĩa watũmire akorũo kuo.”
^ Kana “Ũrĩa warĩthondekire.”
^ Kana hihi, “Kana rĩũmba no riuge ũũ: ‘Wĩra waku ndũrĩ na nyitĩro’?”
^ Kana “Ruo rũu ũrĩ naruo rwa gũciara nĩ rwa kĩĩ?”
^ Kana hihi, “ĩikarage ũtheri.”
^ Kana “rũciaro rwa.”
^ Kana “tũhũ.”
^ Kana “rũciaro ruothe rwa.”