Jeremia 39:1-18
39 Mwaka-inĩ wa kenda wa Mũthamaki Zedekia wa Juda, mweri-inĩ wa ikũmi, Mũthamaki Nebukadineza* wa Babuloni arĩ hamwe na mbũtũ yake yothe nĩ mookire Jerusalemu na makĩmĩrigicĩria.+
2 Mwaka-inĩ wa 11 wa Zedekia, mweri-inĩ wa kana, mũthenya wa kenda wa mweri ũcio, magĩtũrĩkia rũthingo rwa itũũra.+
3 Nao anene othe a mũthamaki wa Babuloni magĩtonya na magĩikara thĩ Kĩhingo-inĩ gĩa Gatagatĩ,+ nao nĩ Nerigali-sharezeru ũrĩa Samugari,* Nebo-sarisekimu ũrĩa Rabisarisi,* Nerigali-sharezeru ũrĩa Rabimagu,* o hamwe na anene arĩa angĩ othe a mũthamaki wa Babuloni.
4 Rĩrĩa Mũthamaki Zedekia wa Juda o hamwe na thigari ciothe maamonire, makĩũra,+ makiuma itũũra-inĩ rĩu ũtukũ magereire njĩra ya mũgũnda wa mũthamaki, makĩgerera kĩhingo-inĩ kĩrĩa kĩarĩ gatagatĩ ga thingo iria igĩrĩ, na magĩthiĩ merekeire njĩra-inĩ ya Araba.+
5 No mbũtũ ya Akalidei ĩkĩmateng’eria, na ĩgĩkinyĩra Zedekia werũ-inĩ mwaraganu wa Jeriko.+ Ĩkĩmũnyita na ĩkĩmũtwara kũrĩ Mũthamaki Nebukadineza* wa Babuloni kũu Ribila+ bũrũri-inĩ wa Hamathu,+ kũrĩa aamũtuĩrĩire.
6 Mũthamaki ũcio wa Babuloni agĩathana ariũ a Zedekia moragĩrũo kũu Ribila akĩĩyonagĩra, na mũthamaki wa Babuloni agĩathana andũ othe arĩa maarĩ igweta a Juda moragwo.+
7 Agĩcoka agĩtumumaria maitho ma Zedekia, thutha ũcio akĩmuoha na bĩngũ cia gĩcango nĩguo amũtware Babuloni.+
8 Akalidei magĩcoka magĩcina nyũmba ya mũthamaki na nyũmba cia andũ acio angĩ,+ na makĩmomora thingo cia Jerusalemu.+
9 Nebuzaradani+ ũrĩa warĩ mũnene wa arangĩri akĩoya andũ arĩa angĩ maatigarĩte itũũra-inĩ rĩu, arĩa maathiĩte makeneana kũrĩ we, na mũndũ ũngĩ o wothe watigarĩte, akĩmatwara ithamĩrio Babuloni.
10 No Nebuzaradani mũnene ũcio wa arangĩri nĩ aatigire andũ amwe arĩa maarĩ athĩni mũno, arĩa mataarĩ kĩndũ o na kĩmwe kũu bũrũri-inĩ ũcio wa Juda. Mũthenya o ro ũcio ningĩ akĩmahe mĩgũnda ya mĩthabibũ na mĩgũnda ya kũrĩma mamĩrutagĩre wĩra.*+
11 Nake Mũthamaki Nebukadineza* wa Babuloni agĩatha Nebuzaradani mũnene ũcio wa arangĩri ũhoro-inĩ wĩgiĩ Jeremia akĩmwĩra atĩrĩ:
12 “Muoe na ũmũmenyagĩrĩre; ndũkamwĩke ũũru, na ũmũheage kĩndũ o gĩothe angĩkũhoya.”+
13 Nĩ ũndũ ũcio, Nebuzaradani mũnene wa arangĩri, Nebushazibani ũrĩa Rabisarisi,* Nerigali-sharezeru ũrĩa Rabimagu,* o hamwe na anene othe a mũthamaki wa Babuloni magĩtũmana
14 makiuga Jeremia arutwo kũu Nja ya Arangĩri+ na makĩmũneana kũrĩ Gedalia+ mũrũ wa Ahikamu+ mũrũ wa Shafani+ nĩguo atwarũo nyũmba-inĩ yake. Nĩ ũndũ ũcio agĩtũũra gatagatĩ-inĩ ka andũ.
15 Hĩndĩ ĩrĩa Jeremia aahingĩrĩtwo kũu Nja ya Arangĩri,+ kiugo kĩa Jehova nĩ kĩamũkinyĩire akĩrũo atĩrĩ:
16 “Thiĩ wĩre Ebedi-meleku+ ũrĩa Mũethiopia atĩrĩ, ‘Ũũ nĩguo Jehova mũnene wa ita, o we Ngai wa Isiraeli ekuuga: “Nĩ ngũhingia ciugo ciakwa ciĩgiĩ itũũra rĩrĩ ndĩrĩrehere ũũru no ti maũndũ mega, na mũthenya ũcio nĩ ũkoona ũndũ ũcio ũgĩkĩka.”’
17 “‘No wee nĩ ngaakũhonokia mũthenya ũcio,’ ũguo nĩguo Jehova ekuuga, ‘na ndũkaaneanwo kũrĩ andũ acio wĩtigĩrĩte.’
18 “‘Nĩ gũkorũo hatarĩ nganja nĩ ngaakũhonokia, na ndũkooragwo na rũhiũ rwa njora. Nĩ ũkenyitĩra muoyo waku ta arĩ kũũtaha ũũtahĩte,*+ tondũ nĩ ũnjĩĩhokete,’+ ũguo nĩguo Jehova ekuuga.”
Tũũhoro twa magũrũ-inĩ
^ Ũkk., “Nebukadireza,” njĩra ĩngĩ ya kwandĩka rĩĩtwa rĩu.
^ No kũhoteke rĩu nĩ rĩĩtwa rĩa ũnene.
^ Kana kũringana na njĩra ĩngĩ ya kũgayania ciugo cia Kĩhibirania, “Nerigali-sharezeru, Samugari-nebo, Sarisekimu, Rabisarisi.”
^ Kana “mũnene wa andũ ago (mũthomi wa njata).”
^ Ũkk., “Nebukadireza,” njĩra ĩngĩ ya kwandĩka rĩĩtwa rĩu.
^ Kana hihi, “marutage wĩra kĩa hinya.”
^ Ũkk., “Nebukadireza,” njĩra ĩngĩ ya kwandĩka rĩĩtwa rĩu.
^ Kana “mũtongoria wa anene a kwa mũthamaki.”
^ Kana “mũnene wa andũ ago (mũthomi wa njata).”
^ Kana “Nĩ ũgeethara na muoyo waku.”
