THAMIRI ĩrĩ na ũcuke no ĩhehenje mũndũ. Mũthamaki Daudi aandĩkire ũũ: ‘Mawaganu makwa nĩ kũ’huba ma’hubĩte nginya o kĩongo; kũnditũhĩra nĩ manditũhĩire, o ta mũrigo ũrĩa mũritũ.’ (Thaburi 38:4) Akristiano amwe nĩ mahehenjetwo nĩ kĩeha kĩnene, nĩ ũndũ wa gwĩtĩkia atĩ Jehova ndangĩmohera. (2 Akorintho 2:7) Hihi ũguo nĩguo kũrĩ? O na angĩkorũo nĩ wĩkĩte mehia maritũ-rĩ, hihi nĩ kuuga atĩ nĩ ũraihanĩrĩirie na Jehova ũũ atĩ ndangĩkuohera? Aca, ũguo tiguo kũrĩ!

Jehova ndatiganagĩria arĩa merirĩte. Ithenya rĩa ũguo, nĩ kũmetha amethaga. Thĩinĩ wa ngerekano ya mwana ũrĩa weitangire, Jesu aaringithanirie Jehova na mũthuri ũmwe wendete ciana ciake, no mũriũ akiuma mũciĩ agĩthiĩ gũtũũra mũtũũrĩre wa mĩago na wa kwĩyananga. Thutha wa kahinda, mũrũwe agĩĩciria acoke mũciĩ. “Na arĩ o haraya ithe akĩmuona, akĩringwo nĩ tha, akĩhanyũka, akĩmũhĩmbĩria na akĩmũmumunya na wendo mũingĩ.” (Luka 15:11-20) Hihi nĩ ũiguaga ũkĩenda gũkuhĩrĩria Jehova no ũkaigua ũrĩ “o haraya” nake? O ta mũthuri ũcio wĩ ngerekano-inĩ ya Jesu, Jehova nĩ akũiguagĩra tha mũno. Nĩ endaga mũno ũmũcokerere.

Ĩ angĩkorũo wonaga ta mehia maku marĩ maritũ kana ta marĩ maingĩ mũno ũũ atĩ Jehova ndangĩkuohera? Wĩcirie ũhoro wa ciugo ici cia Jehova irĩ thĩinĩ wa Isaia 1:18: “Rĩu-rĩ, gĩũkei tũcire; ũguo nĩguo Jehova ekuuga. O na harĩa mehia manyu matunĩhĩte ta gakarakũ-rĩ, nĩmagathera o ta ira.” Jehova nĩ ohagĩra mũndũ o na angĩkorũo mehia make maroneka ta matangiuma ta rangi mũtune nguo-inĩ ya rangi mwerũ.

Jehova ndarenda ũtũũre ũthĩnagio nĩ thamiri. Kwoguo ũngĩka atĩa nĩguo ũcokererũo nĩ thayũ ũrĩa uumanaga na thamiri theru, na kuoherũo nĩ Ngai? Wĩcirie ũhoro wa makinya merĩ marĩa Mũthamaki Daudi oire. Mbere, oigire ũũ: “Mehia makwa nĩ kuumbũra ngũmoimbũrĩra Jehova.” (Thaburi 32:5) Ririkana atĩ Jehova nĩ akwĩrĩte ũmũhoe nĩguo ‘mũcire kana mwaranĩrie.’ Ĩtĩkĩra rĩĩtana rĩake. Umbũrĩra Jehova mehia maku na ũmwĩre ũrĩa ũraigua. Daudi aahoire ũũ nĩ ũndũ wa maũndũ marĩa eeyoneire: “Theria, mahĩtia makwa maninũke. . . . Ngoro ĩrĩa ĩthuthĩkĩte na ĩkahera-rĩ, wee, Ngai, ndũngĩmĩira.”—Thaburi 51:2, 17.

Kerĩ, Daudi nĩ eetĩkĩrire ũteithio kuuma kũrĩ ũrĩa watũmĩtwo nĩ Jehova, mũnabii wetagwo Nathani.  (2 Samueli 12:13) Ũmũthĩ, Jehova nĩ aheanĩte athuri a kĩũngano arĩa mamenyeretio nĩguo mateithie arĩa merira macokerere ũrata wao na Jehova. Rĩrĩa wathiĩ kũrĩ athuri acio, nĩ mekũhũthĩra Maandĩko na mahoe hamwe nawe, nĩguo makũhorerie ngoro, magũteithie ũtige kwĩigua ũtagĩrĩire, na ũhone kĩĩroho.—Jakubu 5:14-16.

Nĩ ma atĩ no ũigue ũrĩ ũndũ mũritũ mũno kuumbũrĩra Jehova Ngai mehia maku na gũthiĩ kũrĩ athuri. No kũhoteke o na Daudi nĩguo aaiguaga. Gwa kahinda nĩ ‘aaikarire atumĩtie’ igũrũ rĩgiĩ mehia make. (Thaburi 32:3) No nĩ aacokire akĩona bata wa kuumbũra mehia make na kũgarũrĩra mĩthiĩre yake.

Ũndũ wa bata makĩria nĩ atĩ Daudi nĩ aagĩire na gĩkeno rĩngĩ. Aandĩkire ũũ: “Gũkena, nĩ ũrĩa woheirũo wĩhia wake.” (Thaburi 32:1) Agĩcoka akĩhoya ũũ: “Mwathani, tumũra mĩromo yakwa, na kanua gakwa nĩgegũkĩonania kũgoocwo gwaku.” (Thaburi 51:15) Nĩ ũndũ wa kũgĩa na thamiri theru na kuoherũo mehia make nĩ Ngai, Daudi nĩ eerire andũ arĩa angĩ igũrũ rĩgiĩ Jehova.

Jehova nĩ arenda ũkenere ũguni wa gũkorũo na thamiri theru. Nĩ arenda wĩre andũ arĩa angĩ ũhoro wake na muoroto wake ũrĩ na gĩkeno, no ti ũrĩ na thamiri ĩragũcuka. (Thaburi 65:1-4) Ririkana akwĩraga atĩ ‘wĩrire, nĩguo mehia maku marihũrũo, nĩguo hagĩe na mahinda ma gwĩkĩrũo hinya moimĩte kũrĩ Jehova we mwene.’—Atũmwo 3:19.

Ũguo nĩguo Martha eekire. Ataaragĩria ũũ: “Mũrũ wakwa aatũire aandehagĩra ngathĩti cia Mũrangĩri na Arahũkai! O kahora, ngĩthiĩ menyanĩte na Jehova rĩngĩ. Ũndũ ũrĩa warĩ mũritũ makĩria nĩ gũcũnga mũhera nĩ ũndũ wa mehia marĩa mothe ndekĩte. No nĩ ndacokire ngĩhoya Jehova, ngĩmũthaitha anjohere. Ndiĩtĩkagia atĩ mĩaka 40 nĩ yathirire itacokereire Jehova. Nĩ ndĩyoneire wega atĩ o na thutha wa mĩaka mĩingĩ, mũndũ no aheo mweke ũngĩ wa gũtungatĩra Ngai na gũcoka wendo-inĩ wake.”