GĨCUNJĨ GĨA 9
“Kristo Nĩwe Hinya wa Ngai”
1-3. (a) Arutwo maacemanirie na ũndũ ũrĩkũ Iria-inĩ rĩa Galili ũrĩa wamamakirie mũno, na Jesu eekire atĩa? (b) Ciugo “Kristo nĩwe hinya wa Ngai” ciagĩrĩire harĩ Jesu nĩkĩ?
ARUTWO a Jesu maamakĩte mũno. Maaringaga Iria rĩa Galili rĩrĩa kwagĩire na kĩhuhũkanio o rĩmwe. Hatarĩ nganja nĩ moonete ihuhũkanio ingĩ iria-inĩ rĩu mbere ĩyo, tondũ amwe ao nĩ maarutĩte wĩra wa gũtega thamaki kwa ihinda iraya. a (Mathayo 4:18, 19) No kĩu kĩarĩ “kĩhuhũkanio kĩnene,” kĩrĩa gĩatũmĩte iria-inĩ kũgĩe na makũmbĩ manene. Arutwo makĩgeria mũno gũtwarithia gatarũ no kĩhuhũkanio kĩu nĩ kĩamatooragia. Makũmbĩ macio manene “maahũũraga gatarũ magatonya thĩinĩ” na makĩambia gũkaiyũria maĩ. No Jesu no gũkoma aakomete mwena wa thutha wa gatarũ nĩ ũndũ wa kũnoga, thutha wa gũtinda akĩruta kĩrĩndĩ. Rĩrĩa arutwo moonire ta megũkua, makĩmũũkĩria na makĩmũthaitha makĩmwĩra ũũ: “Mwathani, tũhonokie, tũrĩ hakuhĩ gũthira!”—Mariko 4:35-38; Mathayo 8:23-25.
2 Jesu ndaarĩ na guoya. Aakũũmire rũhuho rũu na iria arĩ na ũmĩrĩru akiuga ũũ: “Hoorera na ũkire!” Na o hĩndĩ ĩyo, rũhuho na iria igĩathĩka, kĩhuhũkanio kĩu gĩgĩthira, makũmbĩ magĩthira, “na gũkĩhoorera biũ.” Hĩndĩ ĩyo arutwo magĩĩtigĩra mũno. Makĩũrania atĩrĩ, “Ũyũ kũna nũũ?” Mooranirie ũguo, tondũ gũtirĩ mũndũ ũngĩhota gũkaania rũhuho na iria ta arĩ mwana mũremi arakaania.—Mariko 4:39-41; Mathayo 8:26, 27.
3 No Jesu ndaatariĩ ta andũ arĩa angĩ. Jehova nĩ aahũthĩrire hinya wake na njĩra cia mwanya gũteithia Jesu na kũmũhotithia gũteithia andũ arĩa angĩ. Nĩkĩo mũtũmwo Paulo atongoretio nĩ roho ooigire atĩ “Kristo nĩwe hinya wa Ngai.” (1 Akorintho 1:24) Hinya wa Ngai wonanagio kũgerera harĩ Jesu na njĩra irĩkũ? Na ũndũ ũcio ũratũhutia atĩa?
Hinya wa Mũrũ wa Mũmwe wa Ngai
4, 5. (a) Jehova aaheire Mũrũ wake wa mũmwe hinya na wathani ũrĩkũ? (b) Nĩ kĩĩ gĩateithirie Mũrũ ũcio wa Ngai kũhingia mĩoroto ya Ithe ya ũũmbi?
4 Ta wĩcirie hinya ũrĩa Jesu aarĩ naguo atanoka gũkũ thĩ. Jehova aahũthĩrire “hinya wake wa tene na tene” rĩrĩa oombire Mũrũ wake wa mũmwe ũrĩa wacokire gwĩtwo Jesu Kristo. (Aroma 1:20; Akolosai 1:15) Thutha ũcio, Jehova akĩhe Mũrũ ũcio wake hinya na wathani mũnene, na akĩmũhe wĩra wa kũhingia mĩoroto Yake ya ũũmbi. Bibilia yugaga ũũ igũrũ rĩgiĩ Mũrũ ũcio: “Indo ciothe ciagĩire kuo kũgerera harĩ we, na gũtirĩ o na kĩmwe kĩagĩire kuo gĩtagereire harĩ we.”—Johana 1:3.
5 Tũtingĩhota gũtaũkĩrũo biũ nĩ ũrĩa wĩra ũcio waiganaga. Ta wĩcirie hinya ũrĩa wabataranagia harĩ kũũmba araika milioni nyingĩ, ngalaksĩ bilioni nyingĩ, igũrũ, thĩ, na indo iria ciothe irĩ muoyo. Nĩguo ahote kũhingia maũndũ macio, Mũrũ ũcio wa mũmwe nĩ aaheirũo hinya ũrĩa mũnene mũno igũrũ na thĩ, na nĩguo roho mũtheru wa Ngai. Nĩ aakenagĩra gũkorũo arĩ Mũruti Wĩra Njorua, na kũhũthĩrũo nĩ Jehova harĩ kũũmba indo iria ingĩ ciothe.—Thimo 8:22-31.
6. Jesu aaheirũo hinya na wathani ũrĩkũ thutha wa gũkua na kũriũkio?
6 Hihi Mũrũ ũcio wa mũmwe nĩ angĩaheirũo hinya na wathani makĩria? Thutha wa Jesu gũkua na kũriũkio, ooigire ũũ: “Nĩ heetwo wathani wothe kũrĩa igũrũ o na gũkũ thĩ.” (Mathayo 28:18) Nĩ ma, Jesu nĩ aheetwo ũhoti na kĩhooto gĩa gwathana igũrũ na thĩ. Arĩ “Mũthamaki wa athamaki na Mwathani wa athani,” nĩ aheetwo wĩra wa “kũniina thirikari yothe na wathani o na hinya wothe”—iria cionekaga na iria itonekaga—iria ireganaga na wendi wa Ithe. (Kũguũrĩrio 19:16; 1 Akorintho 15:24-26) Jehova “ndarĩ kĩndũ aatigire gĩtarĩ rungu” rwa Jesu, tiga o We mwene.—Ahibirania 2:8; 1 Akorintho 15:27.
7. Tũngĩkorũo na ma nĩkĩ atĩ gũtirĩ hĩndĩ Jesu akaahũthĩra hinya ũrĩa aheetwo nĩ Jehova ũũru?
7 Hihi nĩ twagĩrĩirũo gwĩtigĩra atĩ Jesu no ahũthĩre hinya ũcio ũũru? Aca o na hanini! Jesu nĩ endete Ithe biũ na ndangĩka ũndũ o na ũmwe wa kũmũrakaria. (Johana 8:29; 14:31) Jesu nĩ oĩ wega atĩ gũtirĩ hĩndĩ Jehova ahũthagĩra hinya wake ũũru. Jesu nĩ eeyoneire atĩ Jehova nĩ acaragia mĩeke ya “[kuonania] hinya wake nĩ ũndũ wa arĩa meheanĩte na ngoro yao yothe harĩ we.” (2 Maũndũ ma Matukũ ma Tene 16:9) Ningĩ Jesu nĩ endete andũ o ta Ithe, kwoguo no tũkorũo na ma atĩ hingo ciothe arĩhũthagĩra hinya wake gũtũguna. (Johana 13:1) Jesu nĩ onanĩtie ũguo na ciĩko. Reke twarĩrĩrie hinya ũrĩa aarĩ naguo hĩndĩ ĩrĩa aarĩ gũkũ thĩ na ũrĩa aahutagio ngoro akaũhũthĩra.
‘Aarĩ na Hinya Harĩ Ciugo’
8. Jesu aaheirũo hinya wa gwĩka atĩa thutha wa gũitĩrĩrio maguta, na aahũthĩrire hinya wake atĩa?
8 Rĩrĩa Jesu aarĩ kamwana kanini akĩrerũo nĩ aciari ake thĩinĩ wa Nazarethi, gũtirĩ kĩama o na kĩmwe aaringire. No ũndũ ũcio nĩ wagarũrũkire abatithio mwaka wa 29 M.M., arĩ na kĩndũ mĩaka 30. (Luka 3:21-23) Bibilia ĩtwĩraga ũũ: “Ngai [aamũitĩrĩirie] maguta kũgerera roho mũtheru na hinya, na agĩthiũrũrũka bũrũri agĩkaga maũndũ mega na akĩhonagia arĩa othe maahinyĩrĩirio nĩ Mũcukani.” (Atũmwo 10:38) Githĩ ciugo “agĩkaga maũndũ mega” itironania atĩ Jesu aahũthagĩra hinya wake na njĩra njega? Thutha wa gũitĩrĩrio maguta, aatuĩkire “mũnabii ũrĩ hinya harĩ ciĩko na ciugo.”—Luka 24:19.
9-11. (a) Jesu aarutanaga kũ kaingĩ, na aabataraga kũrutana na njĩra ĩrĩkũ? (b) Kĩrĩndĩ kĩagegirio nĩ ũrutani wa Jesu nĩkĩ?
9 Nĩ na njĩra ĩrĩkũ Jesu aarĩ na hinya harĩ ciugo? Kaingĩ aarutanaga kũndũ kwa mũingĩ ta rũteere-inĩ rwa iria, irĩma-inĩ, njĩra-inĩ, na ihaaro-inĩ. (Mariko 6:53-56; Luka 5:1-3; 13:26) Arĩa maamũthikagĩrĩria maarĩ na wĩyathi wa kũmweherera angĩkorũo ciugo ciake itiamagucagĩrĩria. Tondũ hĩndĩ ĩyo mabuku matiambĩrĩirie kwandĩkwo, athikĩrĩria arĩa maarĩ na ngoro njega maabataraga kũiga ciugo ciake meciria-inĩ na ngoro-inĩ ciao. Kwoguo ũrutani wa Jesu wabataraga gũkorũo ũrĩ wa kũgucĩrĩria mũno, ũrataũkĩka, na ũngĩririkanwo na njĩra hũthũ. No ũcio ndwarĩ ũndũ mũritũ harĩ Jesu. Kwa ngerekano, ta wĩcirie ũhoro wa Mahunjio make ma Kĩrĩma-inĩ.
10 Rũcinĩ rũmwe kĩambĩrĩria-inĩ kĩa mwaka wa 31 M.M., kĩrĩndĩ nĩ gĩathiire kĩrĩma-inĩ hakuhĩ na Iria rĩa Galili. Amwe ao mooimĩte Judea na Jerusalemu, kilomita ta 100 nginya 110. Angĩ nao mooimĩte matũũra-inĩ ma Turo na Sidoni, marĩa maarĩ hakuhĩ na iria mwena wa rũgongo. Andũ aingĩ arĩa maarĩ arwaru magĩkuhĩrĩria Jesu nĩguo mamũhutie, na akĩmahonia othe. Na arĩkia kũhonia arĩa othe maarĩ arwaru, akĩambĩrĩria kũrutana. (Luka 6:17-19) Na rĩrĩa aarĩkirie kũrutana, kĩrĩndĩ gĩkĩgegio nĩ maũndũ marĩa kĩaiguire. Nĩkĩ?
11 Mĩaka mĩingĩ thutha ũcio, ũmwe wa arĩa maaiguire mahunjio macio aandĩkire ũũ: “Kĩrĩndĩ [nĩ kĩagegirio] nĩ njĩra yake ya kũrutana, tondũ aamarutaga ta mũndũ warĩ na wathani.” (Mathayo 7:28, 29) Ciugo cia Jesu cionanagia atĩ aarĩ mũndũ wĩ na hinya. Jesu aaragia ũhoro wa Ngai na agekĩra hinya ũrutani wake kũgerera Kiugo kĩa Ngai. (Johana 7:16) Andũ nĩ maataũkagĩrũo wega nĩ ciugo cia Jesu, makagucĩrĩrio nĩ ũrutani wake, na gũtirĩ mũndũ ũngĩahotire kũũkararia. Aaragĩrĩria maũndũ na njĩra ndikĩru na agakinyĩra ngoro cia athikĩrĩria ake. Aamarutire ũrĩa mangĩgĩa na gĩkeno, ũrĩa magĩrĩirũo kũhoya, ũrĩa mangĩcaria Ũthamaki wa Ngai, na ũrĩa mangĩgĩa na ũtũũro mwega wa ihinda rĩũkĩte. (Mathayo 5:3–7:27) Ciugo ciake nĩ ciaarahũraga andũ arĩa maahũtagĩra ũhoro wa ma na ũthingu. Andũ ta acio nĩ meehaarĩirie ‘kwĩrega’ na gũtiganĩria maũndũ marĩa mangĩ mothe nĩgetha mamũrũmĩrĩre. (Mathayo 16:24; Luka 5:10, 11) Na githĩ ũcio ti ũira mũrũmu wa kuonania hinya wa ciugo cia Jesu!
‘Aarĩ na Hinya Harĩ Ciĩko’
12, 13. Jesu ‘aarĩ na hinya harĩ ciĩko’ na njĩra ĩrĩkũ, na aaringaga ciama cia mĩthemba ta ĩrĩkũ?
12 Jesu ningĩ aarĩ na “hinya harĩ ciĩko.” (Luka 24:19) Mabuku ma Injiri magwetaga ciama makĩria ma 30 iria aaringire akĩhũthĩra “hinya wa Jehova.” b (Luka 5:17) Ciama cia Jesu nĩ ciahutirie ũtũũro wa andũ ngiri nyingĩ. Ta wĩcirie ũhoro wa ciama o igĩrĩ tu iria aaringire, rĩrĩa aahũnirie arũme 5,000 na thutha ũcio angĩ 4,000. Tũngĩtara atumia na ciana, no kũhoteke kĩrĩndĩ kĩu kĩarĩ na andũ angĩ ngiri nyingĩ.—Mathayo 14:13-21; 15:32-38.
13 Jesu nĩ aaringaga ciama cia mĩthemba mĩingĩ. Aarĩ na wathani igũrũ rĩa ndaimono, na aacingataga na njĩra hũthũ. (Luka 9:37-43) Hĩndĩ ĩmwe nĩ aagarũrire maĩ magĩtuĩka ndibei. (Johana 2:1-11) Ningĩ ta wĩcirie ũrĩa arutwo ake maagegire rĩrĩa “[moonire] Jesu agereire maĩ igũrũ.” (Johana 6:18, 19) Aarĩ na ũhoti wa kũhonia mĩrimũ na nĩ aahonirie arĩa maarĩ na wonje, arĩa maatũũrĩte na mĩrimũ, na nginya arĩa maarĩ hakuhĩ gũkua nĩ kũrwara. (Mariko 3:1-5; Johana 4:46-54) Aahonanirie na njĩra itiganĩte. Aahonirie andũ amwe arĩ kũraihu, nao angĩ akĩmahonia na njĩra ya kũmahutia. (Mathayo 8:2, 3, 5-13) Amwe aamahonirie o rĩmwe, nao angĩ o kahora.—Mariko 8:22-25; Luka 8:43, 44.
“Makĩona Jesu agereire maĩ igũrũ”
14. Jesu oonanirie atĩa atĩ aarĩ na hinya wa kũriũkia andũ?
14 Jesu aarĩ na hinya nginya wa kũriũkia arĩa makuĩte. Nĩ harĩ mahinda matatũ monanĩtio Bibilia-inĩ marĩa aariũkirie andũ maakuĩte; kairĩtu kamwe ka mĩaka 12, kamwana ka mũmwe ka mũtumia wa ndigwa, na mũndũrũme ũmwe wendetwo nĩ aarĩ a nyina. (Luka 7:11-15; 8:49-56; Johana 11:38-44) Gũtirĩ ũndũ o na ũmwe wa macio warĩ mũritũ harĩ we. Aariũkirie kairĩtu kau ka mĩaka 12 kahinda o kanini thutha wako gũkua. Akĩriũkia kamwana ka mũtumia ũcio wa ndigwa karĩ gatanda-inĩ karĩa gaakuuĩtwo nako gagĩthiĩ gũthikwo, o mũthenya ũcio gaakuĩte. Na akĩriũkia Lazaro kuuma mbĩrĩra-inĩ mũthenya wa kana kuuma akua.
Aahũthagĩra Hinya Wake arĩ na Tha, Ũtaũku, na Atarĩ na Mwĩyendo
15, 16. Kũrĩ na ũira ũrĩkũ wa atĩ Jesu ndaahũthagĩra hinya wake arĩ na mwĩyendo?
15 Mũtongoria ũtarĩ mũkinyanĩru angĩheo hinya ta wa Jesu, andũ no metigĩre atĩ nĩ ekũũhũthĩra ũũru. No Jesu ndaarĩ na mehia. (1 Petero 2:22) Ndeetĩkĩrire gũthũkio nĩ mwerekera wa kwĩyenda, kwenda maũndũ manene, kana ũkoroku, maũndũ marĩa matũmaga andũ matarĩ akinyanĩru mahũthĩre hinya wao kũhinyĩrĩria arĩa angĩ.
16 Jesu ndaahũthĩraga hinya wake na mwĩyendo, na gũtirĩ hĩndĩ aaũhũthĩraga kwĩguna we mwene. Rĩrĩa aarĩ mũhũtu, nĩ aaregire gũtua mahiga mĩgate atĩ nĩguo arĩe. (Mathayo 4:1-4) Gũkorũo atĩ aarĩ o na indo nini, nĩ ũira wa atĩ ndaahũthagĩra hinya wake kwĩguna maũndũ-inĩ ma kĩĩmwĩrĩ. (Mathayo 8:20) Ningĩ nĩ kũrĩ ũira ũngĩ wonanagia atĩ ndaahũthagĩra hinya wake na njĩra ya mwĩyendo. Rĩrĩa aaringaga ciama, nĩ kwĩima aakoragwo akĩĩima. Akĩhonia andũ arwaru, nĩ kũrĩ hinya woimaga thĩinĩ wake. Nĩ aaiguaga hinya woima thĩinĩ wake, o na angĩahonirie mũndũ ũmwe tu. (Mariko 5:25-34) O na kũrĩ ũguo, nĩ eetĩkagĩria irĩndĩ cia andũ imũhutie, na othe makahona. (Luka 6:19) Na githĩ ũcio ti roho wa kwĩima!
17. Jesu oonanirie atĩa atĩ aahũthagĩra hinya wake arĩ na ũtaũku?
17 Jesu aahũthagĩra hinya wake arĩ na ũtaũku. Gũtirĩ hĩndĩ aaringaga ciama nĩgetha eyonanie kana hatarĩ na gĩtũmi kĩega. (Mathayo 4:5-7) Nĩ aaregire kũringa kĩama o tondũ tu Herode nĩ eendaga kuona akĩringa kĩama. (Luka 23:8, 9) Handũ ha kũgaathĩrĩria hinya wake, Jesu kaingĩ eeraga arĩa aahonagia matikeere mũndũ o na ũrĩkũ. (Mariko 5:43; 7:36) Eendaga andũ meyonere o ene ũhoro wake ithenya rĩa kũigua na arĩa angĩ.—Mathayo 12:15-19.
18-20. (a) Nĩ kĩĩ gĩatũmaga Jesu ahũthĩre hinya wake gwĩka maũndũ mega? (b) Ũiguaga atĩa igũrũ rĩgiĩ ũrĩa Jesu aahonirie mũndũ ũtaahotaga kũigua?
18 O na gũtuĩka Jesu aarĩ na hinya mũingĩ, ndaatariĩ ta atongoria arĩa mahũthagĩra hinya wao na njĩra njũru mategwĩciria ũhoro wa mabataro na mĩnyamaro ya andũ arĩa angĩ. Jesu nĩ aarũmbũyagia andũ. Kuona andũ marĩ na mĩnyamaro nĩ kwamũhutagia mũno nginya akenda kũmateithia. (Mathayo 14:14) Nĩ eeciragia ũhoro wa andũ mũno na mabataro mao, na ũndũ ũcio nĩ watũmaga ahũthĩre hinya wake kũmateithia na njĩra itiganĩte. Ngerekano njega ya ũndũ ũcio nĩ ĩrĩa ĩrĩ thĩinĩ wa Mariko 7:31-37.
19 Hĩndĩ ĩyo, kĩrĩndĩ kĩnene nĩ gĩathiire harĩ Jesu na gĩkĩmũtwarĩra andũ aingĩ maarĩ arwaru, nake akĩmahonia othe. (Mathayo 15:29, 30) No Jesu agĩthuura mũndũ ũmwe akĩmũrũmbũiya na njĩra ya mwanya. Mũndũ ũcio ndaarĩ na ũhoti wa kũigua na ndaahotaga kwaria wega. No kũhoteke Jesu oonire atĩ mũndũ ũcio aarĩ na guoya kana nĩ aaconokaga. Nĩ ũndũ ũcio Jesu akĩmũtwara handũ hataarĩ na andũ angĩ. Agĩcoka agĩka maũndũ mangĩateithirie mũndũ ũcio gũtaũkĩrũo nĩ ũrĩa eendaga gwĩka. “Agĩikia ciara ciake matũ-inĩ ma mũndũ ũcio, na thutha wa gũtua mata, akĩmũhutia rũrĩmĩ.” c (Mariko 7:33) Jesu agĩcoka akĩrora igũrũ, akĩhũmũka na hinya. Agĩka maũndũ macio, nĩ ta eeraga mũndũ ũcio ũũ: ‘Ũndũ ũrĩa ndĩrenda gũgwĩkĩra ũkũhoteka nĩ ũndũ wa hinya kuuma kũrĩ Ngai.’ Agĩcoka akiuga, “Hingũka.” (Mariko 7:34) Oiga ũguo, mũndũ ũcio akĩhota kũigua o na kwaria wega.
20 Na githĩ ti ũndũ wa gwĩkĩra ngoro kuona atĩ o na rĩrĩa Jesu aahũthagĩra hinya ũrĩa aaheetwo nĩ Ngai wa kũhonania, eekaga ũguo na njĩra ĩronania tha! Githĩ tũtikenaga kũmenya atĩ Jehova aheanĩte Ũthamaki wa Kĩĩmesia kũrĩ Mũtongoria ũrũmbũyagia andũ na ageciria ũhoro wao!
Kĩonereria kĩa Maũndũ Marĩa Magoka
21, 22. (a) Ciama iria Jesu aaringire ciarĩ kĩonereria gĩa kĩĩ? (b) Tondũ Jesu nĩ arĩ hinya igũrũ rĩa mahinya ma ndũire-rĩ, nĩ ũndũ ũrĩkũ tũngĩĩrĩgĩrĩra rungu rwa Ũthamaki wake?
21 Ciama iria Jesu aaringire gũkũ thĩ ciarĩ o kĩonereria tu kĩa irathimo nyingĩ iria igaakorũo kuo wathani-inĩ wake. Thĩinĩ wa thĩ njerũ ya Ngai, Jesu nĩ akaaringa ciama rĩngĩ, no ageeka ũguo na njĩra nene makĩria! Ta wĩcirie ũhoro wa maũndũ ma gũcanjamũra marĩa twĩrĩgĩrĩire.
22 Jesu nĩ agaacokia maũndũ mothe thĩinĩ wa thĩ o ũrĩa maarĩ. Ririkana atĩ nĩ oonanirie atĩ aarĩ na hinya igũrũ rĩa mahinya ma ndũire rĩrĩa aahooreririe kĩhuhũkanio. Kwoguo rungu rwa Ũthamaki wa Kristo, andũ matikabatara gwĩtigĩra ihuhũkanio, ithingithia, mĩtuthũko ya irĩma, kana maũndũ mangĩ ta macio. Tondũ Jesu nĩwe Mũruti Wĩra Njorua ũrĩa Jehova aahũthĩrire kũũmba thĩ na indo iria ciothe irĩ muoyo thĩinĩ wayo, nĩ oĩ wega biũ ũrĩa thĩ yũmbĩtwo. Nĩ oĩ kũhũthĩra indo iria irĩ thĩinĩ wa thĩ na njĩra njega. Rungu rwa wathani wake, thĩ ĩno yothe ĩkaagarũrũo ĩtuĩke Paradiso.—Luka 23:43.
23. Jesu akaahingia mabataro ma andũ atĩa arĩ Mũthamaki?
23 Ĩ namo mabataro ma andũ? Ũhoti wa Jesu wa kũhũnia andũ ngiri nyingĩ akĩhũthĩra irio nini ũtũheaga ũũma atĩ wathani wake nĩ ũkeheria ngʼaragu. Tondũ irio igaakorũo irĩ nyingĩ kũndũ guothe, ngʼaragu nĩ ĩgaathira biũ. (Thaburi 72:16) Ũhoti wake wa kũhonania mĩrimũ ũtuonagia atĩ andũ arĩa arwaru, arĩa matonaga, arĩa mataiguaga, na arĩa makoragwo na wonje makaahonio biũ na matikarwara rĩngĩ. (Isaia 33:24; 35:5, 6) Ũhoti wake wa kũriũkia arĩa makuĩte wonanagia atĩ arĩ Mũthamaki wa igũrũ, nĩ akaahota kũriũkia andũ milioni nyingĩ arĩa marĩ kĩririkano-inĩ kĩa Ithe.—Johana 5:28, 29.
24. Tũgĩĩcũrania ũhoro wa hinya wa Jesu-rĩ, nĩ ũndũ ũrĩkũ twagĩrĩirũo kũririkana, na nĩkĩ?
24 Tũgĩĩcũrania ũhoro wa hinya wa Jesu, rekei tũririkane atĩ egerekanagia biũ na Ithe. (Johana 14:9) Kwoguo ũrĩa Jesu ahũthagĩra hinya kuonanagia ũrĩa Jehova ahũthagĩra hinya wake. Kwa ngerekano, ta wĩcirie ũrĩa Jesu aahonirie mũndũ ũmwe warwarĩte mangũ na njĩra ya wendo. Aamũiguĩrĩire tha, akĩmũhutia, akĩmwĩra: “Nĩ ngwenda!” (Mariko 1:40-42) Kũgerera maũndũ ta macio meekirũo nĩ Jesu, nĩ ta Jehova aratwĩra, ‘Ũguo nĩguo hũthagĩra hinya wakwa!’ Na githĩ tũtiagĩrĩirũo kũgooca Ngai Mwene-Hinya-Wothe na tũmũcokerie ngatho nĩ ũndũ wa ũrĩa ahũthagĩra hinya wake na njĩra ya wendo?
a Iria rĩa Galili nĩ rĩgĩaga na ihuhũkanio iterĩgĩrĩirũo maita maingĩ. Tondũ wa iria rĩu gũkorũo rĩrĩ thĩ mũno, nĩ gũkoragwo na ũrugarĩ mũingĩ gũkĩra icigo iria irĩthiũrũrũkĩirie, na ũndũ ũcio nĩ ũtũmaga rĩera rĩgarũrũke o rĩmwe. Huho nene nĩ ihurutanaga kuuma Kĩrĩma-inĩ kĩa Herimoni kĩrĩa kĩrĩ mwena wa rũgongo irorete Mũkuru wa Jorodani. No gũkorũo kũrĩ kũhooreru, no thutha wa ihinda inini kũgarũrũke o rĩmwe kũgĩe na kĩhuhũkanio kĩnene.
b Makĩria ma ũguo, rĩmwe na rĩmwe mabuku ma Injiri nĩ magwetaga ciama nyingĩ ta arĩ o kĩama kĩmwe. Kwa ngerekano, hĩndĩ ĩmwe “andũ othe a itũũra” rĩmwe nĩ maathiire kũrĩ we na akĩhonia “andũ aingĩ” arĩa maarĩ arwaru.—Mariko 1:32-34.
c Gũtua mata kwarĩ njĩra ya kũhonania yetĩkĩtio nĩ Ayahudi na arĩa mataarĩ Ayahudi, na ũhoro wa kũhũthĩra mata harĩ kũhonania nĩ wonekaga mabuku-inĩ ma arutani a watho arĩa meetagwo Rabii. No kũhoteke Jesu aatuire mata no getha tu onie mũndũ ũcio atĩ eendaga kũmũhonia. O kĩrĩa kĩngĩkorũo gĩatũmire atue mata, Jesu ndaahũthagĩra mata kũmũhonia.
