Jehoshafatu, Mũthamaki wa Juda, nĩ aanangire magongona ma Baali na ngai cia mĩhianano bũrũri-inĩ ũcio. Eendaga andũ mamenye mawatho ma Jehova. Nĩ ũndũ ũcio nĩ aatũmire anene na Alawii mathiĩ Juda guothe nĩguo marutane mawatho ma Jehova.

Mabũrũri marĩa maakuhĩrĩirie Juda nĩ meetigagĩra kũmatharĩkĩra tondũ nĩ monaga atĩ Jehova aarĩ hamwe nao. O na nĩ maatwarĩire Mũthamaki Jehoshafatu iheo. No Amoabi na Aamoni na andũ arĩa maaikaraga hakuhĩ na gĩcigo gĩa Seiru nĩ maathire gũtharĩkĩra andũ a Juda. Jehoshafatu nĩ aamenyaga atĩ nĩ aabataraga ũteithio wa Jehova. Aacokanĩrĩirie arũme othe, atumia, o hamwe na ciana kũu Jerusalemu. Aahoire ũũ arĩ mbere yao: ‘Jehova, tũtarĩ nawe tũtingĩtooria. Twagũthaitha ũtwĩre ũrĩa tũgwĩka.’

Jehova aacokirie mahoya macio ũũ: ‘Tigai gwĩtigĩra. Nĩ ngũmũteithia. Mwĩhandei muone ũrĩa ngũmũhonokia.’ Jehova aamahonokirie atĩa?

Mũthenya ũyũ ũngĩ rũcinĩ, Jehoshafatu nĩ aathurire aini na akĩmeera mathiĩ mbere ya thigari. Moimire Jerusalemu nginya handũ heetagwo Tekoa, harĩa mbaara yarũagĩrũo.

Rĩrĩa aini acio maagoocaga Jehova na mũgambo mũnene makenete, nĩ aamarũĩrĩire. Aatũmire Aamoni na Amoabi matukanĩrũo nginya makĩambĩrĩria kũhũũrana o ene, na gũtirĩ o na ũmwe wao wahonokire. No Jehova nĩ aagitĩire andũ a Juda, thigari ciao, o hamwe na athĩnjĩri-Ngai. Andũ othe a mabũrũri marĩa maamarigicĩirie nĩ maamenyire ũrĩa Jehova aamekĩire na makĩmenya atĩ Jehova no aamagitagĩra. Jehova agitagĩra andũ ake na njĩra nyingĩ. Ndabataraga gũteithio nĩ andũ nĩguo eke ũguo.