Jesu aarutaga andũ gũikarania na thayũ. No hĩndĩ ĩmwe eerire atũmwo ake ũũ: “Mũtigecirie atĩ ndokire kũrehe thayũ thĩinĩ wa thĩ; ndokire kũrehe rũhiũ rwa njora, no ti thayũ. Tondũ ndokire kũrehe ngayũkano, mũndũ okĩrĩre ithe, na mũirĩtu okĩrĩre nyina, na mũtumia wa mũriũ okĩrĩre nyaciarawe.” (Mat. 10:34, 35) Hihi Jesu eendaga kuuga atĩa?

Jesu ndeendaga kũrehe ngayũkano thĩinĩ wa famĩlĩ, no nĩ aamenyaga atĩ morutani make nĩ mangĩatũmire kũgĩe ngayũkano famĩlĩ-inĩ imwe. Nĩ ũndũ ũcio, andũ arĩa marerirĩria kũbatithio nĩguo matuĩke arũmĩrĩri a Kristo nĩ magĩrĩirũo gũtaũkĩrũo atĩ itua rĩao no rĩage gũkenia andũ a famĩlĩ yao. Mũndũ ta ũcio no acemanie na ũkararia kuuma harĩ mũndũ ũrĩa mahikanĩtie nake kana andũ acio angĩ a famĩlĩ, na ũkorũo ũrĩ ũndũ mũritũ harĩ we gũikara arĩ mwĩhokeku harĩ morutani ma Jesu.

Bibilia ĩkagĩra ngoro Akristiano “[makoragwo] na thayũ hamwe na andũ othe.” (Rom. 12:18) O na kũrĩ ũguo, morutani ma Jesu no mahaane ta “rũhiũ rwa njora” famĩlĩ-inĩ imwe. Ũndũ ũcio wĩkĩkaga rĩrĩa mũndũ ũmwe thĩinĩ wa famĩlĩ etĩkĩra morutani ma Jesu, ĩndĩ acio angĩ makaregana namo. Hĩndĩ ta ĩyo, andũ acio a famĩlĩ matuĩkaga “thũ” harĩ mũndũ ũrĩa ũreruta ũhoro wa ma.​—Mat. 10:36.

Arũmĩrĩri a Kristo arĩa maikaraga thĩinĩ wa famĩlĩ ĩrĩ na andũ matarĩ etĩkia, rĩmwe no mabatare gũtua kana megũkenia Jehova na Jesu, kana megũkenia andũ ao a famĩlĩ. Kwa ngerekano, andũ acio a famĩlĩ no mamatindĩkĩrĩrie kũnyitanĩra gĩkũngũĩro-inĩ gĩa kĩndini. Hĩndĩ ta ĩyo no mabatare gũthuura nũũ megũkenia. Jesu aaugire ũũ: “Mũndũ ũrĩa wendete ithe kana nyina kũngĩra ndagĩrĩire gũtuĩka mũrutwo wakwa.” (Mat. 10:37) Jesu ndeendaga kuuga atĩ nĩgetha tũtuĩke arutwo ake no mũhaka tũnyihanyihie wendo harĩ aciari aitũ. Handũ ha ũguo, eendaga kuonania nĩ maũndũ marĩkũ magĩrĩirũo gũkorũo marĩ ma bata makĩria ũtũũro-inĩ witũ. Kwoguo o na rĩrĩa andũ a famĩlĩ matũkararia nĩ ũndũ wa gũtungatĩra Jehova, no tũthiaga na mbere kũmenda, ĩndĩ nĩ tũtaũkagĩrũo atĩ wendo witũ harĩ Ngai nĩguo wa bata makĩria.

Hatarĩ nganja, nĩ ũndũ wĩ ruo mũno gũũkĩrĩrũo nĩ andũ a famĩlĩ. No arũmĩrĩri a Jesu nĩ maririkanaga ciugo ici: “Mũndũ wothe ũtegwĩtĩkĩra gũkuua mũtĩ wake wa kũnyarirĩrũo na anũmĩrĩre ndagĩrĩire gũtuĩka mũrutwo wakwa.” (Mat. 10:38) Ũguo nĩ kuuga atĩ Akristiano monaga gũkarario nĩ andũ a famĩlĩ arĩ ũndũ ũmwe wa mĩnyamaro ĩrĩa arũmĩrĩri a Kristo makoragwo mehaarĩirie gũkirĩrĩria. O na kũrĩ ũguo, nĩ mathiaga na mbere kwĩrĩgĩrĩra atĩ mĩthiĩre yao mĩega nĩ ĩkũgucĩrĩria andũ a famĩlĩ arĩa matarĩ etĩkia macenjie mũrũgamo wao na mende kwĩruta ma cia Bibilia.​—1 Pet. 3:1, 2.