Ũũma Wĩgiĩ Hari–Magedoni Nĩ Ũrĩkũ?
Ũũma Wĩgiĩ Hari–Magedoni Nĩ Ũrĩkũ?
‘Maroho ma ndaimono moimaga magathiĩ kũrĩ athamaki a mabũrũri mothe, na nĩ maakĩmonganirie kũndũ kũrĩa gwĩtagwo na Kĩhibirania, Hari–Magedoni.’—KŨGUŨRĨRIO 16:14, 16.
HARI–MAGEDONI kana Arimagedoni nĩ rĩĩtwa rĩa kũndũ. O na kũrĩ ũguo, no kũhoteke thĩinĩ wa thĩ gũtirĩ gwakorũo kũndũ gwĩtagwo Hari–Magedoni.
Gũkĩrĩ ũguo-rĩ, kiugo “Hari–Magedoni” nĩ kuuga atĩa kũna? Nĩ kĩĩ gĩtũmaga kaingĩ ĩkuruhithanio na ũndũ, ta mbaara?
Makĩmagomania Kũndũ Kũrĩa Gwĩtagwo Hari–Magedoni
Kiugo gĩa Kĩhibirania Har–Magedon kĩrĩa kĩahũthagĩrũo kĩambĩrĩria-inĩ, nĩ kuuga “Kĩrĩma kĩa Megido.” O na gũtuĩka gũtirĩ gwakorũo na kĩrĩma gĩetagwo ũguo-rĩ, nĩ kũrĩ kũndũ gwĩtagwo Megido. Kũndũ kũu gũkoragwo hakuhĩ biũ na magomano ma barabara, rũgũrũ rwa kũrĩa gwatũũragwo nĩ rũrĩrĩ rwa Isiraeli ya tene. Mbaara nyingĩ nene ciarũagĩrũo hakuhĩ na Megido. Kwoguo, rĩĩtwa Megido rĩgĩĩtanio na mbaara. a
O na kũrĩ ũguo, Megido gũtirũgamagĩrĩra mbaara iria ciarũĩirũo kũu, ĩndĩ kũrũgamagĩrĩra gĩtũmi kĩa mbaara icio. Megido yarĩ thĩinĩ wa Bũrũri wa Kĩĩranĩro ũrĩa Jehova aaheete Aisiraeli. (Thama 33:1; Joshua 12:7, 21) Jehova nĩ eerĩte Aisiraeli na mwĩhĩtwa atĩ nĩ angĩamagitĩire thũ, na ũguo noguo eekire. (Gũcokerithia Maathani 6:18, 19) Kwa ngerekano, nĩ kũu Megido Jehova aarũĩrĩire Aisiraeli na njĩra ya kĩama rĩrĩa maatharĩkĩirũo nĩ mbũtũ ya Jabini Mũthamaki Mũkaanani hamwe na Sisera mũtongoria wa mbũtũ yake.—Atiirĩrĩri Bũrũri 4:14-16.
Kwoguo-rĩ, kiugo “Hari–Magedoni” kana “Arimagedoni” kĩrũgamĩrĩire kĩĩ? Gĩkuruhithanĩtio na njũkanĩrĩro gatagatĩ ka mbũtũ igĩrĩ irĩ na hinya.
Ũrathi wa Kũguũrĩrio wonanagia ũrĩa ica ikuhĩ Shaitani hamwe na ndaimono makaahatĩrĩria thirikari cia andũ icokanĩrĩrie mbũtũ ciacio, nĩguo ciũkĩrĩre andũ a Ngai na wĩra wao. Tharĩkĩro ĩyo ĩgaatũma andũ milioni nyingĩ makue rĩrĩa Ngai agaatoria atharĩkĩri acio.—Kũguũrĩrio 19:11-18.
Ngai akooraga andũ aingĩ ũguo nĩkĩ na Bibilia yugaga atĩ nĩ ‘mũiguanĩri tha mũno, ndahiũhaga kũrakara, na aiyũirũo nĩ tha’? (Nehemia 9:17) Nĩguo tũtaũkĩrũo nĩ mawĩko ma Ngai-rĩ, tũkũbatara kũmenya macokio ma ciũria ithatũ: (1) Nũ ũkaambĩrĩria mbaara ĩyo? (2) Nĩ kĩĩ gĩgaatũma Ngai aingĩrĩre? (3) Mbaara ĩyo ĩgaakorũo na moimĩrĩro marĩkũ ma gũtũũra harĩ thĩ na arĩa mamĩtũũraga?
1. NŨ ŨKAAMBĨRĨRIA MBAARA ĨYO?
Ti Ngai ũkaambĩrĩria mbaara ya Hari–Magedoni. Ithenya rĩa ũguo, Ngai nĩ akarũĩrĩra andũ ega kuma kũrĩ arĩa magaakorũo makĩenda kũmaniina. Arĩa makaambĩrĩria mbaara ĩyo nĩ “athamaki a mabũrũri mothe,” nĩo atongoria a thĩ yothe. Magaatharĩkĩra nĩkĩ? Tondũ Shaitani arĩ mũnene, nĩ agaatongoria thirikari na mbirarũ nĩguo itharĩkĩre athathaiya a Jehova Ngai.—Kũguũrĩrio 16:13, 14; 19:17, 18.
Kũringana na ũrĩa wĩyathi wa mĩario na wa ũthathaiya wĩkĩrĩirũo mabũrũri-inĩ mamwe ũmũthĩ-rĩ, no wone ta gũtangĩhoteka thirikari ikaaregana kana o na igerie kũniina biũ gĩkundi o gĩothe kĩa ndini. O na kũrĩ ũguo, tharĩkĩro ta icio ciarĩ kuo hĩndĩ ya karine ya 20 na irĩ kuo o na mahinda-inĩ maya. b O na kũrĩ ũguo-rĩ, kũrĩ na motiganu merĩ manene gatagatĩ-inĩ ga tharĩkĩro icio na tharĩkĩro ĩrĩa ĩhutanĩtie na Hari-Magedoni. Ũtiganu wa mbere nĩ atĩ, tharĩkĩro ĩyo ĩgaakorũo thĩinĩ wa thĩ yothe. Wa kerĩ nĩ atĩ, Jehova Ngai akoya ikinya na njĩra nene gũkĩra ũrĩa aaneka mbere ĩyo. (Jeremia 25:32, 33) Bibilia ĩtaga haaro ĩyo “mbaara ya mũthenya ũrĩa mũnene wa Ngai, Mwene-Hinya-Wothe.”
2. NĨ KĨĨ GĨGAATŨMA NGAI AINGĨRĨRE?
Jehova arutaga athathaiya ake gũthingata thayũ na kwenda thũ ciao. (Mika 4:1-3; Mathayo 5:43, 44; 26:52) Kwoguo rĩrĩa tharĩkĩro ĩyo njũru ĩgooka matikoya matharaita merũĩrĩre. Korũo Ngai ndaingagĩrĩra akahonokia andũ ake, mangĩaniinirũo tene. Nĩ ũndũ ũcio, rĩĩtwa rĩa Jehova Ngai, kana ngumo yake, nĩ ikaahutio mũno. Thũ ciake cingĩhota kũniina andũ Ake, Jehova angĩoneka atarĩ na wendo, kĩhooto, kana hinya. Ũcio nĩ ũndũ ũtangĩhoteka!—Thaburi 37:28, 29.
Ti wendi wa Ngai kũniina mũndũ o na ũrĩkũ, kwoguo nĩ aheanaga mũkaana wa ũrĩa ageeka. (2 Petero 3:9) Kũgerera Bibilia, nĩ aririkanagia andũ othe atĩ mahinda mahĩtũku, nĩ eerĩhĩirie rĩrĩa andũ ake maatharĩkĩirũo. (2 Athamaki 19:35) Ningĩ Bibilia nĩ ĩrutaga mũkaana atĩ mahinda marĩa maroka, rĩrĩa Shaitani na andũ ake magaatharĩkĩra andũ a Ngai, o rĩngĩ Jehova nĩ akaamarũĩrĩra. Ma nĩ atĩ, Bibilia yarathĩte o tene atĩ Jehova nĩ akaniina arĩa aganu. (Thimo 2:21, 22; 2 Athesalonike 1:6-9) Hĩndĩ ĩyo, nĩrĩo atharĩkĩri makaamenya atĩ mararũa na Ngai Mwene Hinya Wothe.—Ezekieli 38:21-23.
3. MBAARA ĨYO ĨGAAKORŨO NA MOIMĨRO MARĨKŨ MA GŨTŨŨRA?
Andũ milioni nyingĩ nĩ makaahonokio hĩndĩ ya mbaara ya Hari–Magedoni. Hatarĩ nganja, kĩu gĩgaakorũo kĩrĩ kĩambĩrĩria gĩa thayũ thĩinĩ wa thĩ.—Kũguũrĩrio 21:3, 4.
Ibuku rĩa Kũguũrĩrio riugaga atĩ nĩ kũrĩ “kĩrĩndĩ kĩingĩ mũno” gĩtangĩgereka gĩkaahonoka mbaara ĩyo. (Kũguũrĩrio 7:9, 14) Rungu rwa ũtongoria wa Ngai, kĩrĩndĩ kĩu nĩ gĩgaateithĩrĩria gũcokia thĩ ĩtuĩke Paradiso, ta ũrĩa warĩ muoroto wa Jehova kĩambĩrĩria-inĩ.
Hihi nĩ tũũĩ rĩrĩa andũ a Ngai magaatharĩkĩrũo?
[Ũhoro wa magũrũ-inĩ]
a Ti ũndũ mũgeni kuona kũndũ gũgĩkuruhithanio na mbaara. Kwa ngerekano, taũni ya Hiroshima ĩrĩa yaniinirwo biũ na bomu ya atomu bũrũri-inĩ wa Japani, nĩ yonanagia ũgwati ũrĩa ũngĩrehwo nĩ mbaara ya nyukiria.
b Kũniinwo kwa Ayahudi marĩ rũrĩrĩ nĩ ũndũ ũmwe wonanagia ũrĩa thirikari ĩmwe yageririe kũniina biũ ndini na ndũrĩrĩ. Hĩndĩ ya wathani wa Sovieti, ikundi cia kĩĩndini thĩinĩ wa U.S.S.R. o na cio nĩ cianyaririrũo mũno. Rora gĩcunjĩ “Watu Wanaopenda Amani Watetea Jina Lao Zuri,” thĩinĩ wa ngathĩti ya Mnara wa Mlinzi ya Mĩĩ 1, 2011 ĩrĩa ĩcabĩtwo nĩ Aira a Jehova.
[Mbica karatathi ka 6]
Jehova Ngai nĩ aarũĩrĩire andũ ake mahinda mahĩtũku
[Mbica karatathi ka 7]
Jehova nĩ akaagitĩra andũ ake o rĩngĩ, hĩndĩ ya mbaara ya Hari–Magedoni
