MACOKIO nĩ ĩĩ. Jehova eranĩire ũũ igũrũ rĩgiĩ andũ arĩa endete: “Nĩngamohera waganu wao, o namo mehia mao ndigacoka kũmaririkana o rĩ, o rĩ.” (Jeremia 31:34) Kwoguo, Jehova atwĩraga na ma atĩ rĩrĩa ohera ehia arĩa merirĩte, ndaririkanaga mehia mao rĩngĩ. No hihi ũguo nĩ kuuga atĩ Mũũmbi wa thĩ na igũrũ ndangĩhota kũririkana mehia marĩa ohera andũ? Ciugo cia Ezekieli nĩ ituonagia wega ũrĩa Ngai ohanagĩra na akariganĩrũo.—Thoma Ezekieli 18:19-22.

Akĩhũthĩra mũnabii Ezekieli arĩ mwaria wake, Jehova nĩ aanĩrĩire matua make igũrũ rĩa andũ a Juda na Jerusalemu arĩa mataarĩ ehokeku. Rũrĩrĩ rũu ruothe nĩ rwatiganĩte na ũthathaiya wa Jehova na rũkaihũria ũhinya bũrũri ũcio wothe. Jehova aarathire kwanangwo kwa Jerusalemu nĩ Ababuloni. No o na rĩrĩa aanagĩrĩra matua macio, Jehova nĩ aaheanire ndũmĩrĩri yarĩ na mwĩhoko. O mũndũ aarĩ eethuurĩre; o mũndũ aangĩatuĩrĩirũo kũringana na ciĩko ciake.​—Mĩhari ya 19, 20.

Ĩ mũndũ angĩatigire gwĩka ũũru na ambĩrĩrie gwĩka wega? Jehova oigire ũũ: “No mũndũ ũrĩa mwaganu angĩgarũrũka atigane na mehia make mothe marĩa ehĩtie, na ahingie irĩra ciakwa ciothe cia watho wa kũrũmĩrĩrũo, na acoke gwĩka maũndũ marĩa maagĩrĩire na marĩa ma ũthingu, ndarĩ hingo atagatũũra muoyo; ũcio ndagakua.” (Mũhari wa 21) Ĩĩ, Jehova nĩ ‘eeharĩirie kuohera’ mwĩhia ũrĩa ũngĩagarũrũkire atigane na njĩra ciake njũru na onanie nĩ erirĩte biũ.—Thaburi 86:5.

Ĩ namo mehia marĩa eehĩtie? Jehova aataarĩirie ũũ: “Hatirĩ ihĩtia o na rĩmwe rĩa marĩa ekĩte ma kwagarara watho rĩgacoka kũririkanwo ũhoro-inĩ wake.” (Mũhari wa 22) Ta rora wone atĩ rĩhia rĩa mũndũ ũrĩa werira ‘rĩtigacoka kũririkanwo ũhoro-inĩ wake.’ Nĩkĩ ũndũ ũcio nĩ wa bata?

Thĩinĩ wa Bibilia, kiugo gĩa Kĩhibirania kĩrĩa gĩtaũrĩtwo “kũririkana” no gĩkorũo kiugĩte makĩria ma kũririkana ũndũ mũhĩtũku. Ũhoro wĩgiĩ kiugo kĩu, ibuku rĩmwe riugaga ũũ: “Kaingĩ kĩonanagia gĩĩko kĩna kana kĩonekaga hamwe na ciugo ironania gĩĩko.” Kwoguo, “kũririkana” no gũkorũo kuugĩte “kuoya ikinya.” Kwoguo, rĩrĩa Jehova oiga atĩ rĩhia rĩa mũndũ wĩrirĩte ‘rĩtigacoka kũririkanwo rĩngĩ ũhoro-inĩ wake,’ aroiga atĩ ndakoya ikinya rĩna kwerekera mũndũ ũcio nĩ ũndũ wa rĩhia rĩu thutha ũcio, ta kuuga nĩ eekĩte rĩhia rĩu kana kũmũherithia. *

Ciugo cia Ezekieli 18:21, 22 cionanagia ũrĩa Ngai ohanagĩra na njĩra ĩhutagia ngoro citũ. Rĩrĩa Jehova atuohera mehia, ndagacoka kuoya ikinya rĩngĩ igũrũ ritũ nĩ ũndũ wa mehia macio twekĩte. Ithenya rĩa ũguo, aikagia mehia ma arĩa merirĩte thutha wake. (Isaia 38:17) Nĩ ta kũhuura ahuuraga mehia macio.—Atũmwo 3:19.

Tũrĩ andũ matarĩ akinyanĩru, nĩ tũrabatara tha cia Ngai. Makĩria ma ũguo, nĩ twĩhagia maita maingĩ. (Aroma 3:23) No Jehova nĩ endaga tũmenye atĩ angĩkorũo nĩ twerira biũ, nĩ ehaarĩirie gũtuohera. Na rĩrĩa ohanĩra, nĩ ariganagĩrũo—ũguo nĩ kuuga, ndakaahũthĩra mehia marĩa twekĩte tene nĩguo atũherithie rĩngĩ. Na githĩ ũcio ti ũndũ wa gũtũũmĩrĩria mũno! Hihi tha cia Ngai nĩ itũmaga wende kũmũkuhĩrĩria makĩria?