Hihi wee nĩ ũhoyaga? Andũ aingĩ o na arĩa matetĩkĩtie nĩ kũrĩ Ngai, nĩ mahoyaga. No nĩkĩ gĩtũmaga andũ mahoye? Ũthuthuria ũmwe wekirũo bũrũri-inĩ wa Faranja wonanagia atĩ, nuthu ya aikari a kũu rĩmwe mahoyaga kana magecũrania “no getha maigue wega.” Andũ aingĩ a Rũraya o nao mahoyaga nĩ ũndũ wa gĩtũmi o ta kĩu. Handũ ha kũhoya nĩguo mathathaiye Ngai-rĩ, “mahoyaga nĩguo maigue mahoreire ngoro.” O na kũrĩ ũguo, amwe arĩa metĩkĩtie Ngai mahoyaga o rĩrĩa marĩ na mathĩna, makĩrĩgagĩrĩra atĩ ihoya rĩao nĩ rĩgũcokio o na ihenya.—Isaia 26:16.

Ĩ wee nawe? Hihi wonaga mahoya ta arĩ o njĩra ya gũkũhooreria ngoro? Angĩkorũo nĩ wĩtĩkĩtie nĩ kũrĩ Ngai-rĩ, nĩ wonaga ũgĩteithĩka rĩrĩa wahoya? Kana hihi wonaga ta mahoya maku mataiguagwo? Bibilia no ĩgũteithie kuona mahoya arĩ njĩra ya gũtũma mũndũ akuhĩrĩrie Ngai, no ti ya gũtũma mũndũ aigue wega.