Ndaarereirũo Ancram, gataũni kanini karĩ mwena wa rũgongo rwa New York, U.S.A. Aikari aingĩ a taũni ĩyo maarĩithagia ng’ombe cia iria. Ma nĩ atĩ, o na yarĩ na ng’ombe nyingĩ kũrĩ andũ.

Taũni ĩyo yarĩ na kanitha ĩmwe tu, na nĩyo famĩlĩ iitũ yathiaga. O kĩroko mũthenya wa Kiumia, Guuka aahakagĩra iratũ rangi, ngacoka ngoya Bibilia yakwa ndaheetwo nĩ cũcũ, ngathiĩ gĩthomo gĩa ciana kanitha-inĩ. Twĩ na mũrũ na mwarĩ wa maitũ nĩ twarutĩtwo kũrutaga wĩra na kĩyo, gũtĩĩa na gũteithagia andũ arĩa angĩ, na gũcokagia ngatho nĩ ũndũ wa irathimo iria twĩ nacio.

Ndagimara, nĩ ndoimire mũciĩ na ngĩtuĩka mwarimũ. Ndaarĩ na ciũria nyingĩ ciĩgiĩ Ngai na ũtũũro. Amwe a arutwo arĩa ndaathomithagia maarĩ na ũhoti wa mwanya wa gwĩka maũndũ. Angĩ matiarĩ na ũhoti ta ũcio, no nĩ merutanagĩria biũ. Amwe maarĩ na wathe wa mwĩrĩ, nao angĩ maarĩ na hinya wa mwĩrĩ. Ndoonaga ũndũ ũcio ũtarĩ wa kĩhooto. Rĩmwe na rĩmwe, aciari a ciana iria itaakoragwo na ũhoti moigaga maũndũ ta, “Nĩ wendi wa Ngai mwana wakwa akorũo ahaana ũũ.” Nĩ ndaarigagũo kĩrĩa kĩngĩtũma Ngai etĩkĩrie ciana imwe iciarũo irĩ na wathe. O tũkĩmenyaga wega atĩ gũtirĩ mahĩtia mwana akoragwo ekĩte.

Ningĩ no ndarigagwo atĩrĩ, ‘Nĩ ũndũ ũrĩkũ ũrĩ na muoroto ingĩka mũtũũrĩre-inĩ wakwa?’ Ndonaga maũndũ magĩthiĩ na ihenya mũno mũtũũrĩre-inĩ wakwa. Ndaarereirũo famĩlĩ-inĩ njega, ngĩthomera cukuru njega, na ndaarutaga wĩra ũrĩa nyendete. No nĩ ndarigagwo kũrĩa mũtũũrĩre wakwa werekeire. Ũndũ ũrĩa ndonaga mbere yakwa no kũhika, kũgĩa mũciĩ mwega, ciana, thiĩ na mbere kũruta wĩra nginya rĩrĩa ngaaritaya, na thutha-inĩ ndwarũo mũciĩ wa gũtumberia andũ akũrũ. Ndeyũragia kana hihi nĩ kũrĩ ũndũ ũngĩ mũndũ angĩka ũtũũro-inĩ.

Hĩndĩ ĩmwe, nĩ ndaathire gũceera Rũraya tũrĩ hamwe na arimũ amwe arĩa twarutaga wĩra nao. Nĩ twathire Westminster Abbey, Notre-Dame de Paris, na Vatican, o hamwe na kanitha ingĩ nyingĩ itarĩ nene. O harĩa hothe ndathiaga, nĩ ndoragia ciũria iria ndaakoragwo nacio. Thutha wa gũcoka mũciĩ Sloatsburg, New York, nĩ ndaathire kanitha cigana ũna. No gũtirĩ o na ĩmwe ya cio yaheaga macokio mega.

 Mũthenya ũmwe, mũrutwo ũmwe wa mĩaka 12 nĩ okire harĩ niĩ na akĩnjũria ciũria ithatũ. Kĩa mbere, aanjũririe kana nĩ njũĩ atĩ we nĩ Mũira wa Jehova. Ngiuga ĩĩ. Gĩa kerĩ, akĩnjũria kana no nyende kũmenya makĩria ũhoro wĩgiĩ Aira a Jehova. O rĩngĩ, ngiuga ĩĩ. Gĩa gatatũ, akĩnjũria kũrĩa njikaraga. Rĩrĩa ndamwĩrire kũrĩa njikaraga, nĩ twamenyire atĩ nĩ hakuhĩ na harĩa famĩlĩ yao yaikaraga. Ndiamenyaga atĩ ciũria icio ithatũ kuuma kũrĩ kairĩtu kanini nĩ cingĩagarũrire mũtũũrĩre wakwa kuuma hĩndĩ ĩyo nginya tene na tene.

Thutha wa kahinda kanini, kairĩtu kau nĩ gokire gwakwa mũciĩ na gakĩambĩrĩria kũnduta Bibilia. Ngĩkoria ciũria iria ndorĩtie atongoria aingĩ a ndini. No ngũrani nao, nĩ kaanyonirie macokio mega mũno kuuma Bibilia-inĩ yakwa—marĩa itonete rĩngĩ mbere ĩyo!

Maũndũ marĩa ndeerutire kuuma Bibilia-inĩ nĩ maaheire gĩkeno na ngĩigua njiganĩire. Nĩ ndaahutirio mũno rĩrĩa ndaathomire rĩandĩko rĩa 1 Johana 5:19 rĩrĩa riugaga ũũ: “Kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.” Nĩ ndaiguire ndakena mũno ndamenya atĩ nĩ Shaitani ũrehaga maũndũ ma kĩeha marĩa tũcemanagia namo, no ti Ngai, na atĩ Ngai nĩ arĩgarũra maũndũ magĩre. (Kũguũrĩrio 21:3, 4) Ngĩona atĩ mũndũ no ataũkĩrũo nĩ Bibilia ĩngĩtaarĩrio wega. O na gũtuĩka Mũira wa Jehova ũrĩa wa ndutaga Bibilia aarĩ na mĩaka 12 tu, niĩ ndonire atĩ ũhoro wa ma nĩ wa ma gũtekũmakania nũ ũrawaria.

O na kũrĩ ũguo, nĩ ndeendaga kuona kana Aira a Jehova nĩ mekaga ũrĩa mahunjagia. Kwa ngerekano, kairĩtu kau nĩ gaatĩtĩrithagia atĩ Akristiano a ma nĩ monanagia ngumo ta gũkirĩrĩria na gũtugana. (Agalatia 5:22, 23) Ngĩtua itua rĩa gũkageria, nyone kana ko nĩ konanagia ngumo icio. Mũthenya ũmwe ũrĩa twabangĩte kwĩruta Bibilia, nĩ ndaathuurire gũkinya mũciĩ njereirũo. Ndeyũragia atĩrĩ: ‘Hihi nĩ gekũnjeterera? Na angĩkorũo nĩ gekũnjeterera-rĩ, hihi nĩ gegũkorũo karakarĩte tondũ nĩ njereirũo?’ Rĩrĩa ndakinyire gwakwa mũciĩ, ndagakorire karũgamĩte mũrango-inĩ kanjetereire. Gagĩũka ngari-inĩ yakwa gateng’erete gakĩnjĩra atĩrĩ: “Nyuma hakuhĩ gũthiĩ mũciĩ njĩre mami tũhũũre thimũ mathibitarĩ na borithi tũmenye kana kũrĩ ũndũ mũru ũhanĩkire, tondũ wee ndũrĩ wacererũo gũka nĩguo twĩrute Bibilia. Nĩ ngũmakĩte mũno!”

Hĩndĩ ĩmwe, nĩ ndaakoririe kĩũria ndeeciragia atĩ nĩ kĩritũ mũno harĩ kairĩtu ka mĩaka 12. Ndeendaga kuona kana no getungĩre macokio. No rĩrĩa ndaakoririe kĩũria kĩu, kandorire gakĩnjĩra ũũ: “Kĩu nĩ kĩũria kĩritũ. Ngũkĩandĩka handũ thiĩ njũrie aciari akwa.” Na noguo gekire, tondũ gagĩũka hĩndĩ ĩngĩ nĩguo twĩrute, kaandeheire ngathĩti ya Mũrangĩri yarĩ na macokio ma kĩũria gĩakwa. Ũndũ ũyũ nĩguo wangucĩrĩirie harĩ Aira a Jehova, tondũ mabuku mao nĩ maaheire macokio mega kuuma Bibilia-inĩ, megiĩ ciũria ciakwa. Nĩ ndaathire na mbere kwĩruta hamwe na kairĩtu kau, na thutha wa mwaka ũmwe ngĩbatithio ngĩtuĩka Mũira wa Jehova. *

Ndarĩkia kuona macokio mega ma ciũria ciakwa, nĩ ndeendire kũhunjĩria andũ arĩa angĩ ũhoro ũcio. (Mathayo 12:35) Kĩambĩrĩria-inĩ, famĩlĩ iitũ nĩ yanyingĩrĩire nĩ ũndũ wa wĩtĩkio wakwa mwerũ. No thutha wa kahinda magĩcenjia muonere wao. Thutha-inĩ mami nĩ aambĩrĩirie kwĩruta Bibilia. O na gũtuĩka aakuire atakinyĩte kũbatithio, ndĩ na ma atĩ nĩ aatuĩte itua rĩa gũtungatĩra Jehova.

Mwaka-inĩ wa 1978, nĩ ndaahikĩire Elias Kazan, ũrĩa o nake warĩ Mũira wa Jehova. Mwaka-inĩ wa 1981, twĩ na Elias nĩ twetirũo tũgatungate thĩinĩ wa Betheli ya Amerika (U.S.) * No ũndũ wa kĩeha nĩ atĩ, thutha wa gũtungata kuo mĩaka ĩna tu, Elias nĩ aakuire. Nĩ ndaathire na mbere gũtungata thĩinĩ wa Betheli o na thutha wa gũkuĩrũo, na kũiga meciria makwa harĩ wĩra ũrĩa ndaahetwo nĩ kwandeithirie kũũmĩrĩria.

Mwaka wa 2006, nĩ ndaahikĩire Richard Eldred, ũrĩa o nake ũkoragwo Betheli. Twĩ na Richard no tũrathiĩ na mbere gũkenera gũtungata Betheli. Nĩ ũndũ wa kũmenya ũhoro wa ma wĩgiĩ Ngai, nĩ njiguaga atĩ nĩ nyonete macokio ma ciũria ciakwa, na ngagĩa na ũtũũro ũrĩ na muoroto—na macio mothe maambĩrĩirie na ciũria ithatũ iria ndoririo nĩ kairĩtu kanini.