Hihi Ngai nĩ agwĩtĩkĩria andũ mathiĩ na mbere kũhinyĩrĩria arĩa angĩ na kũiga mũtũũrĩre wa andũ wa mahinda mokĩte ũgwati-inĩ? Aca. O ta ũrĩa twarĩkia kuona, nĩ arĩingĩrĩra na aniine mĩnyamaro na kũhinyĩrĩrio kwa andũ kũrĩa gũkoretwo kuo karine-inĩ nyingĩ. Mũũmbi wa andũ na thĩ nĩ arenda ũmenye atĩ ihinda rĩake rĩa kuoya ikinya nĩ rĩkuhĩrĩirie. Aguũragia ũhoro ũcio wa bata na njĩra ĩrĩkũ?

Ta wĩcirie ũhoro wa ngerekano ĩno: Ũgĩthiĩ na ngari wahota kwamba gwĩka ũthuthuria intaneti-inĩ, mabu-inĩ, kana indo ingĩ nyandĩke nĩguo ũmenye njĩra. Wambĩrĩria thabarĩ, ũkona indo iria ikuonanĩtio harĩa ũkũroraga nĩguo ũmenye njĩra, ũkagĩa na ũũma atĩ nĩ ũrakuhĩrĩria kũrĩa ũgũthiaga. Na njĩra o ta ĩyo, Ngai nĩ atũheete Kiugo gĩake, kĩrĩa gĩtaaragĩria wega maũndũ marĩa marathiĩ na mbere thĩinĩ wa thĩ. Rĩrĩa tuona maũndũ macio magĩkĩka, nĩ tũgĩaga na ma atĩ tũratũũra mahinda-inĩ ma kũrigĩrĩria.

Bibilia ĩtaaragĩria atĩ kwĩ hĩndĩ ĩgaakinya, thĩ ĩkorũo na ihinda rĩa mwanya mũno rĩrĩa rĩkaarĩkĩrĩra ithirĩro-inĩ. Ihinda rĩu nĩ rĩngĩgaakorũo na maũndũ maingĩ marekĩka kũndũ guothe thĩinĩ wa thĩ, na njĩra ĩtarĩ yonwo rĩngĩ thĩinĩ wa historĩ. Ta reke tuone mamwe ma maũndũ marĩa magwetetwo Kiugo-inĩ kĩa Ngai.

1. MAŨNDŨ MARITŨ THĨINĨ WA THĨ YOTHE Ũrathi ũgwetetwo thĩinĩ wa Mathayo 24 nĩ ũgwetete maũndũ maingĩ mangĩgakorũo marĩ icunjĩ cia kĩmenyithia kĩmwe. Kĩmenyithia kĩu kĩngĩkonania mũthia wa “mahinda maya” na gĩkinyĩrie ihinda rĩrĩa “ithirĩro rĩgakinya.” (Mũhari wa 3, 14) Maũndũ macio nĩ mbaara, kũnyiha kwa irio, ithingithia, kũingĩha kwa waganu, wendani kũnyiha, na atongoria a ndini kũhũthĩra njĩra cia wara nĩguo mahĩtithie andũ. (Mũhari wa 6-26) Nĩ ma, maũndũ macio nĩ makoretwo makĩhaanĩka karine-inĩ nyingĩ na gĩkĩro kĩna. O na kũrĩ ũguo, o ũrĩa ithirĩro rĩrakuhĩrĩria, mothe mangĩgakorũo makĩhaanĩka ihinda-inĩ rĩmwe. Maũndũ macio ningĩ magaakorũo hamwe na maya mangĩ matatũ.

2. MĨEREKERA YA ANDŨ Bibilia yugaga atĩ “matukũ marĩa ma kũrigĩrĩria”—ihinda rĩrĩa rĩgaakorũo mbere ya ithirĩro rĩũkĩte—andũ aingĩ nĩ magakorũo mathũkĩtie mĩerekera yao na njĩra nene. Tũthomaga ũũ: “Andũ nĩmagatuĩka eendi, na endi mbia, na egani, na egathi, na arumani, andũ matangĩigua aciari ao, na matarĩ ngatho, na matarĩ atheru; ningĩ makorũo maagĩte wendani ũrĩa wa ndũire, andũ matangĩteithũrĩkana, na magacambanagia, na arĩa matoĩ kwĩgirĩrĩria, andũ eĩ, na arĩa matenda maũndũ mega, na arĩa makunyanagĩra andũ arĩa angĩ, na arũũgĩrĩri, na eĩkĩrĩri, o na arĩa mendaga gwĩkenia gũkĩra ũrĩa mendaga Ngai.” (2 Timotheo 3:1-4) Nĩ ma, andũ kwagĩra arĩa angĩ gĩtĩo ti ũndũ mũgeni, no mwerekera ũcio ũngĩgaathũka mũno hĩndĩ ya “matukũ marĩa ma kũrigĩrĩria” ũũ atĩ ihinda rĩu rĩĩtĩtwo “mahinda ma ũgwati.” Hihi wee nĩ wonete ũrĩa mĩerekera ya andũ ĩrathiĩ ĩthũkĩte?

3. THĨ NĨ ĨRATHŨKIO Bibilia yugaga atĩ Ngai nĩ ‘akaniina arĩa monũhaga thĩ.’ (Kũguũrĩrio 11:18) Hihi andũ mangĩgakorũo makĩũnũha thĩ na njĩra irĩkũ? Ihinda rĩrĩa Nuhu aatũũraga, rĩahaanaga o ta matukũ maya: “Nakuo gũkũ thĩ gwakorirũo gwĩ kũũru gũkĩonwo nĩ Ngai, na ningĩ nĩkwaiyũrĩtwo nĩ maũndũ ma ũhinya. Na rĩrĩ, Ngai akĩrora thĩ akĩona atĩ nĩyathũkĩte.” Nĩ ũndũ ũcio Ngai akiuga ũũ igũrũ rĩgiĩ andũ acio oru: “Nĩngũmaninanĩria hamwe na thĩ.” (Kĩambĩrĩria 6:11-13) Hihi nĩ wonete ũira mũingĩ wa kuonania atĩ thĩ ĩrathiĩ o ĩkĩiyũraga maũndũ ma ũhinya? Makĩria ma ũguo, andũ makinyĩte handũ matarĩ maakinya thĩinĩ wa historĩ: Marĩ na ũhoti wa kwananga thĩ yothe o hamwe na andũ othe arĩa marĩ thĩinĩ wayo. Marĩ na indo cia kũmahotithia gwĩka ũguo. Ningĩ thĩ no ĩrathũkio  na njĩra ĩngĩ. Indo iria iteithagĩrĩria muoyo gũthiĩ na mbere thĩinĩ wa thĩ, ta, rĩera, maũndũ marĩa matũrigicĩirie o hamwe na nyamũ, na iria, no irathiĩ na mbere gũthũka nĩ ũndũ wa maũndũ marĩa andũ mareka.

Wĩyũrie atĩrĩ, ‘Kĩndũ ta mĩaka igana rĩmwe mĩthiru-rĩ, andũ nĩ maarĩ na ũhoti ta ũcio wa kwĩniina?’ No rĩu marĩ na ũhoti ũcio nĩ ũndũ wa ũrĩa mathondekete indo cia gĩkĩro kĩa igũrũ na irĩ na hinya, na makananga rĩera rĩrĩa rĩtũrigicĩirie. Tekinolojĩ ĩrakũra na ihenya ũũ atĩ andũ matirahota gũtwarana nayo harĩ gũtaũkĩrũo na kũgirĩrĩria moimĩrĩro mayo moru. O na kũrĩ ũguo, mahinda mokĩte megiĩ thĩ matirĩ moko-inĩ ma andũ. Ngai akoya ikinya na aniine arĩa othe monũhaga thĩ, matananiina indo iria ciothe irĩ muoyo thĩinĩ wayo. Ũguo nĩguo eranĩire!

4. WĨRA WA KŨHUNJIA THĨINĨ WA THĨ YOTHE Gĩcunjĩ kĩngĩ gĩa kĩmenyithia gĩa kuonania atĩ ithirĩro rĩrĩ hakuhĩ nĩ kĩarathĩte atĩ nĩ kũngĩgaakorũo na wĩra mũnene ũtarĩ warutwo rĩngĩ: “Naguo ũhoro-ũyũ-mwega wa Ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.” (Mathayo 24:14) Wĩra ũyũ ũngĩgakorũo ũrĩ ngũrani mũno na ũrĩa wanarutwo ihinda iraihu nĩ ndini, wa gũtindĩkĩrĩria andũ magarũrĩre wĩtĩkio wao kĩa hinya. Matukũ-inĩ ma mũthia, ũhoro ũrĩa ũngĩgekĩrĩrũo mũno nĩ kũhunjia “ũhoro-ũyũ-mwega wa Ũthamaki.” Hihi wee nĩ ũĩ ndini ĩhunjagia ũhoro ũcio? Na angĩkorũo nĩ kũrĩ maroneka ta marahunjia ũhoro ũcio-rĩ, hihi no gakundi kanini karĩ handũ hamwe-ĩ, kana nĩ mahotete kũhunjia ũhoro ũcio mwega “thĩ yothe ũtuĩke ũira kũrĩ ndũrĩrĩ ciothe”?

Web site ya www.ps8318.com ĩkĩrĩire mũno “ũhoro-ũyũ-mwega wa Ũthamaki.” Web site ĩno ĩkoragwo na icunjĩ, mabuku, na video itaarĩirie ndũmĩrĩri ĩyo na thiomi makĩria ma 700. Hihi wee nĩ ũĩ andũ angĩ maratĩtĩrithia kũhunjia ũhoro mwega wa Ũthamaki na njĩra ta icio thĩinĩ wa thĩ yothe? O na mbere ya Intaneti yũkĩte, Aira a Jehova nĩ moĩkaine wega nĩ ũndũ wa kĩyo kĩao gĩa kũhunjia ũhoro mwega wĩgiĩ Ũthamaki wa Ngai. Kuuma mwaka-inĩ wa 1939, o riuma rĩa ngathĩti ya Mũrangĩri rĩkoretwo na ciugo ici ngothi-inĩ: “Yanagĩrĩra Ũthamaki wa Jehova.” Ibuku rĩmwe rĩheanaga ũhoro wĩgiĩ ndini riugaga atĩ wĩra wa kũhunjia ũrĩa ũrutagwo nĩ Aira a Jehova “ndũrĩ wahota kũrutwo nĩ andũ angĩ na njĩra ta ĩyo, o na kũũkinyia kũrĩa ũkinyĩte.” Mahunjio macio matĩtĩrithagia atĩ kahinda gatarĩ kũraihu ‘ithirĩro nĩ rĩgũkinya’ kũgerera gũka kwa Ũthamaki wa Ngai.

Hihi nĩ wonete atĩ maũndũ macio mana twarĩrĩria kuuma Bibilia-inĩ thĩinĩ wa gĩcunjĩ gĩkĩ  mekĩkĩte ũkĩĩyonagĩra? Kwa ihinda rĩa makĩria ma mĩaka igana rĩmwe, ngathĩti ĩno nĩ ĩkoretwo ĩgĩtaarĩria athomi ũhoro wĩgiĩ maũndũ marĩa marekĩka thĩinĩ wa thĩ, nĩguo meyonere atĩ ithirĩro rĩrĩ hakuhĩ. Ĩndĩ, andũ amwe nĩ mekagĩrĩra nganja ũhoro ũcio na makoiga atĩ mũndũ no ataarĩrie maũndũ macio marekĩka ũrĩa angĩenda kũringana na mawoni make. Ningĩ nĩ moigaga atĩ kuonekaga ta maũndũ mathũkĩte mũno nĩ tondũ ũkinyanĩria wa ũhoro nĩ wongererekete mũno thĩinĩ wa thĩ. O na kũrĩ ũguo, kũrĩ na ũira mũingĩ ũronania atĩ tũrĩ mũthia-inĩ wa ihinda rĩa mwanya thĩinĩ wa historĩ ya andũ.

Athomi amwe nĩ marona atĩ tũrĩ hakuhĩ kuona ũgarũrũku mũnene thĩinĩ wa thĩ. Kwa ngerekano, mwaka-inĩ wa 2014, kĩama kĩa Science and Security Board kũgerera Bulletin of the Atomic Scientists nĩ kĩaheanire mũkaana kũrĩ United Nations Security Council gĩkĩonania ũgwati ũrĩa ũrĩ mbere harĩ ũtũũro wa andũ. Athomi acio a sayansi moigire ũũ: “Thutha wa gũthuthuria wega mogwati macio nĩ tuonete atĩ kũrĩ na ũhotekeku mũnene mũno wa tekinolojĩ kũniina andũ.” Andũ aingĩ nĩ marathiĩ monete atĩ nĩ tũkinyĩte ihinda-inĩ rĩa mwanya mũno harĩ historĩ ya andũ. Andĩki a ngathĩti ĩno na athomi aingĩ ayo matirĩ na nganja atĩ ihinda rĩrĩ rĩa mwanya nĩrĩo ihinda rĩa matukũ ma mũthia, na atĩ ithirĩro rĩrĩ hakuhĩ. No handũ ha gwĩtigĩra ihinda rĩu rĩũkĩte, no ũkorũo na gĩkeno nĩ ũndũ wa kĩrĩa rĩkaarehe. Nĩkĩ? Tondũ no ũhonoke ihinda-inĩ rĩu!