Ta hũũra mbica ũceerete bũrũri mũgeni riita rĩa mbere. Maũndũ mothe nĩ merũ harĩ we, andũ, ũndũire, irio, o na mbeca cia kuo. Ũndũ ũcio no ũtũme ũigue ũtukanĩirũo mũno.

No ũigue ũndũ o ta ũcio rĩrĩa wathoma Bibilia riita rĩa mbere. Nĩ ta ũrathiĩ bũrũri mũgeni wa mahinda ma tene. Ũgathoma ũhoro wa andũ metagwo Afilisiti, ũndũire ũtamenyerete, ta wa ‘gũtembũranga nguo,’ kana ũgathoma ũhoro wa irio ciĩtagwo mana na mbeca ciĩtagwo drakma. (Thama 16:31; Joshua 13:2; 2 Samueli 3:31; Luka 15:9) Maũndũ macio no matũme ũtukanĩrũo mũno. O ta mũndũ ũceerete bũrũri mũgeni-rĩ, githĩ to ũkenere ũteithio wa mũndũ ũngĩgũtaarĩria maũndũ ta macio?

Kuuma rĩrĩa maandĩko matheru maambĩrĩirie kwandĩkwo hĩndĩ ya karine ya 16 Mbere ya Kristo (M.K.), andũ makoretwo magĩteithio gũtaũkĩrũo nĩmo. Kwa ngerekano, Musa, mũtongoria wa mbere wa rũrĩrĩ rwa Isiraeli, “nĩambĩrĩirie gũtaarĩria” maũndũ marĩa maandĩkĩtwo.—Gũcokerithia Maathani 1:5, Holy Bible in Gĩkũyũ.

O na karine ta ikũmi thutha ũcio no kwarĩ na arutani a Maandĩko maarĩ na ũmenyeru. Mwaka-inĩ wa 455 M.K., gĩkundi kĩnene kĩa Ayahudi marĩ hamwe na ciana ciao, nĩ maagomanĩte kĩhaaro-inĩ kĩa mũingĩ itũũra-inĩ rĩa Jerusalemu. Nao arutani ‘magĩthoma ciugo cia watho wa Ngai iria ciarĩ ibuku-inĩ rĩu itheru.’ No nĩ harĩ ũndũ ũngĩ meekire. “Magĩcitaũranĩra na mũgambo mũnene, nĩguo andũ mamenye wega gĩtũmi gĩacio.”—Nehemia 8:1-8.

Karine ithano thutha ũcio, Jesu Kristo nĩ aarutire wĩra o ta ũcio wa kũrutana. O na andũ maamũĩ mũno ta mũrutani. (Johana 13:13) Nĩ aarutaga andũ marĩ ikundi nene, o na mũndũ ũmwe ũmwe. Hĩndĩ ĩmwe nĩ aarĩirie kĩrĩndĩ kĩnene, thĩinĩ wa Mahunjio ma Kĩrĩma-inĩ, nginya “kĩrĩndĩ gĩkĩgegera ũrutani wake.” (Mathayo 5:1, 2; 7:28) Mwaka-inĩ wa 33 Thutha wa Kristo (T.K.), Jesu nĩ aaririe na arutwo ake erĩ marĩ njĩra-inĩ magĩthiĩ gatũũra kaarĩ hakuhĩ na Jerusalemu, “akĩmataũrĩra mohoro mothe marĩ Maandĩko-inĩ.”—Luka 24:13-15, 27, 32.

Arutwo a Jesu o nao maarĩ arutani a Kiugo kĩa Ngai. Hĩndĩ ĩmwe, Mũethiopia ũmwe nĩ aathomaga Maandĩko. Mũrutwo ũmwe wetagwo Filipu akĩmũkuhĩrĩria akĩmũũria atĩrĩ: “Ũhoro ũcio ũrathoma, nĩũkũũmenya?” Nake Mũethiopia akĩmũcokeria: “Kaĩ ingĩkĩhota kũũmenya atĩa itatongoretio nĩ mũndũ?” Filipu agĩkĩmũtaarĩria ũrĩa maandĩko macio aathomaga moigĩte.—Atũmwo 8:27-35.

O ta arutani a Bibilia a matukũ-inĩ macio ma tene, ũmũthĩ Aira a Jehova nĩ mateithagia andũ merute Bibilia thĩinĩ wa mabũrũri 239. (Mathayo 28:19, 20) Nĩ marerutanĩria gũteithia andũ makĩria ma milioni kenda gũtaũkĩrũo nĩ Bibilia. Andũ aingĩ arĩa mararutwo Bibilia matirereirũo ndini-inĩ cia Gĩkristiano. Arĩa mararutwo matiĩtagio marĩhi na marutagĩrũo mĩciĩ-inĩ kwao kana o handũ hangĩ hangĩmagĩrĩra. Andũ amwe o na nĩ marutagwo kũgerera thimũ kana video, makĩhũthĩra kompiuta kana indo ingĩ ta icio.

No waranĩrie na Mũira wa Jehova nĩguo ũmenye ũrĩa o nawe ũngĩteithĩka na mũbango ũcio. Ũngĩambĩrĩria kwĩruta no wone atĩ no ũhote gũtaũkĩrũo nĩ Bibilia na nĩ ĩrĩ “kĩguni ũhoro-inĩ wa kũrutana, na wa kũmenyithia andũ ũũru wao, na wa kũmakaania, o na wa kũmamenyeria mĩtũũrĩre ĩrĩa ĩringaine na ũthingu; nĩ getha mũndũ wa Ngai atuĩke mũkinyanĩru o gũkinyanĩra, na aikarage athagathagĩtwo kũna, nĩguo arutage wĩra ũrĩa wothe mwega.”—2 Timotheo 3:16, 17.