Ĩĩ no mũhaka, tondũ Ngai nĩ endaga andũ macemanie hamwe nĩguo mamũthathaiye. Bibilia yugaga ũũ: “Ningĩ nĩ twĩciranagie mũndũ na ũrĩa ũngĩ nĩguo twĩkĩranage hinya harĩ kwendana na mawĩra mega, tũtegũtiga gũcemanagia hamwe.”—Ahibirania 10:24, 25.

 Jesu nĩ onanirie atĩ arũmĩrĩri ake nĩ mangĩgathondeka gĩkundi rĩrĩa aameerire ũũ: “Nĩ ũndũ ũcio andũ othe nĩ marĩmenyaga atĩ mũrĩ arutwo akwa, mwakorũo na wendo gatagatĩ-inĩ kanyu.” (Johana 13:35) Njĩra ĩrĩa nene arũmĩrĩri a Kristo mangĩonanirie wendo ũcio nayo nĩ gũcemanagia hamwe. Mangĩathondekire ciũngano nĩguo macemanagie mategũtĩrĩria nĩ ũndũ wa ũthathaiya. (1 Akorintho 16:19) Marĩ hamwe mangĩatuĩkire aarĩ na ariũ a Ithe ũmwe thĩinĩ wa thĩ yothe.—1 Petero 2:17.

Gũkorũo mũndũ arĩ wa ndini ti kũiganu

 O na gũtuĩka Bibilia nĩ yonanagia atĩ andũ nĩ magĩrĩirũo gũcemanagia nĩguo mathathaiye Ngai, ndĩrutanaga atĩ mũndũ no akenie Ngai nĩ ũndũ wa gũkorũo arĩ wa ndini tu. Nĩguo mũndũ etĩkĩrĩke maitho-inĩ ma Ngai, no mũhaka ndini ĩrĩa athiaga ĩkorũo ĩkĩagĩria ũtũũro wake wa o mũthenya. Kwa ngerekano, Bibilia yugaga ũũ: “Ũthathaiya ũrĩa mũtheru na ũtarĩ thahu maitho-inĩ ma Ngai o we Ithe witũ nĩ ũyũ: kũrũmbũyagia ciana cia ngoriai na atumia a ndigwa mathĩna-inĩ mao, na mũndũ gũikaraga atarĩ na kĩmeni kuumana na thĩ ĩno.”—Jakubu 1:27.