Jesus okwa xupifa ovanhu ovadiinini eshi a yandja omwenyo waye u ninge oikulila. (Mateus 20:28) Nomolwaasho Ombiibeli otai popi Jesus e li Omuxupifi ile “Omukulili wounyuni.” (1 John 4: 14) Oya ti yo: “Kaku na mukwao, exupifo la kala muye, osheshi kaku nedina limwe li lili koshi yeulu, la yandjelwa ovanhu omo tu nokuxupifilwa mo.” — Oilonga 4:12.

 Jesus okwa ‘lola efyo ponhele yaaveshe’ ovo tave mu itavele. (Ovaheberi 2:9 Johannes 3:16) Konima yasho, ‘Kalunga okwe mu nyumuna koufi,’ na Jesus okwa shuna meulu e li oshishitwa shopamhepo. (Oilonga 3:15) Paife eshi e li meulu, “ota dulu yo okuxupifa shili ava tava ehene kuKalunga mokweendela muye, shaashi oku nomwenyo alushe, e va ilikanene.” — Ovaheberi 7:25.

Omolwashike twa pumbwa Jesus e tu ilikanene?

 Omolwaashi atusheni otwa nyona. (Ovaroma 3:23) Oulunde owe tu tukula ko kuKalunga notau twala mefyo. (Ovaroma 6:23) Ndele Jesus oku li onga ‘omupopili’ kukeshe oo e na eitavelo tali longo mekuliloyambo laye. (1 Johannes 2:1) Ohe tu ilikanene, ta pula Kalunga a ude omailikano etu noku dime po omatimba etu okupitila mekuliloyambo laye (Mateus 1:21; Ovaroma 8:34). Kalunga oha udu omaindilo aJesus molwaashi ohaa kala metwokumwe nehalo laYe. Kalunga okwa tuma Jesus kombada yedu opo “ounyuni u xupifwe kuye.” — Johannes 3:17.

Mbela okwiitavela muJesus osho ashike tashi ka xupififa ovanhu?

 Ahowe. Nonande otwa pumbwa eitavelo muJesus opo tu xupifwe, otwa pumbwa yo okuninga shihapu. (Oilonga 16:30, 31) Ombiibeli oya ti: “Ngaashi olutu lihe nomhepo, la fya, osho yo neitavelo lihe noilonga, ola fya.” (Jakob 2:26) Opo tu xupifwe, otwa pumbwa:

•   Okulihonga kombinga yaJehova nosho yo yaJesus. — Johannes 17:3.

•   Okukala twa itavela muvo. — Johannes 12:44; 14:1.

•   Okuulika eitavelo mokudulika koipango yavo. (Lukas 6:46; 1 Johannes 2:17) Jesus okwa ti hakeshe ou ta ti “Omwene” ta xupifwa, ndelenee oye tuu ou ta ‘longo ehalo laXe womeulu.’ — Mateus 7:21.

•   Okutwikila okuulika eitavelo nonande otashi dulika pa kale omaupyakadi. Osho Jesus okwe shi yelifa eshi a ti: “Ou te lididimike fiyo exulilo, oye ta xupifwa.”— Mateus 24:13.