Tu li oludalo lomulumenhu wotete, Adam, atushe otu li oshitukulwa shoukwaneumbo umwe. Nonande oshilyo keshe shoukwaneumbo osha teelelika shi kale shi hole nosha fimaneka vakwao, kunena oshidjuu okumona ohole ya tya ngaho. Osho hasho Kalunga ketu omunahole a hala.

“Hola omukweni ngaashi u lihole mwene.” — LEVITIKUS 19:18.

“Kaleni mu hole ovatondi veni.” — MATEUS 5:44.

Dilika nghee Kalunga a yelifa kutya ohole oshike mEendjovo daye mo 1 Ovakorinto 13:4-7:

“Ohole oi na onheni nolune.”

Diladila kwaashi: Mbela oho kala u udite ngahelipi ngeenge umwe e ku ulikila onheni nolune noihe ku handukile omolwomapuko oye?

‘Ohole kai na ondubo.’

Diladila kwaashi: Mbela oho kala u udite ngahelipi ngeenge vamwe ve ku limbililwa unene, ile ve ku twila ondubo?

‘Ohole ihai lalakanene ouwa wayo vene.’

Diladila kwaashi: Mbela oho kala u udite ngahelipi ngeenge vamwe va fimaneka etaleko loye noihave ku fininikile omataleko avo?

‘Ohole ihai dimbuluka owii ye u ningilwa.’

Diladila kwaashi: Kalunga okwe lilongekida okudimina po ovo ve lidilulula nove livela ombedi. “Iha handuka alushe, nonya ihai kalelele muye.” (Epsalme 103:9) Ohatu kala twa hafa ngeenge umwe oo twa udifa nai e tu dimina po. Onghee nafye natu kale twe lilongekida okudimina po vamwe ngeenge ve tu udifa nai. — Epsalme 86:5.

“Ohole ihai hafele okuhenouyuki.”

Diladila kwaashi: Ngeenge twa ningilwa sha shii, ihatu kala tu udite nawa ngeenge vamwe va hafela okumona oixuna kwetu. Onghee nonande ove tu udifa nai, ihatu hafele okumona oixuna kwavo.

Opo tu hafele omanangeko noupuna aKalunga, otu na okukala tu hole vamwe, kashi na nee mbudi kutya ove fike peni, ova dja momuhoko ulipi ile ovomelongelokalunga lilipi. Onghedi imwe omo hatu dulu okuulika ohole omokukwafela ovo ve na omhumbwe.