MBELA naave opa li efimbo olo wa li u udite kutya oshixwepo u fye? Otashi dulika u udite ko onghalo yaAdriana. Okwa li ha kala e na oisho, a tila noke na eteelelo lasha. Adriana okwa li a monika omukifi wepolimano.

Oshihopaenenwa shimwe vali oshomulumenhu Omujapani, Kaoru, oo a li ta file oshisho ovadali vaye ovanamido ovo va li tava yahama. Okwa ti: “Omafimbo amwe, ohandi kala nda wililwa po neenghono koilonga. Mokweendelako kwefimbo, onda li nda kanifa ehalo lokulya nokanda li handi kofa nawa. Opo nee onda hovela okudiladila kutya omaupyakadi ange otaa ka dja po ashike ngeenge onda fi.”

Omulumenhu umwe Omunigeria wedina Ojebode okwa ti: “Onda li alushe nda nyika oluhodi nonda li handi lili, onghee onda li handi kongo eemhito opo ndi lidipae.” Lao linene, Ojebode, Kaoru nosho yo Adriana kava li ve likufa omwenyo. Ashike omudo keshe, ovanhu omamiliyona ohave likufa eemwenyo davo.

Ovalumenhu ovo unene have lidipaa, molwaashi vahapu vomuvo ohava kala va fya ohoni okukonga ekwafo. Jesus okwa popya kutya ovanaudu ova pumbwa omuveluli. (Lukas 5:31) Alikana ino fya ohoni okukonga ekwafo ngeenge owa polimana nowa hala okulikufa omwenyo. Vahapu ovo va kwatwa kepolimano ova mona ekwafo lopaunamiti olo la xwepopaleka onghalo yavo nova dula okulididimika. Ojebode, Kaoru nosho yo Adriana ova mona ekwafo lopaunamiti nonghalo yavo oi li xwepo paife.

Eendokotola otadi dulu okukwafela moku ku pa omiti ile di ku xunge omwenyo. Ovo ve kwetiwe kepolimano ova pumbwa eyambidido lopahole nosho yo okufilwa oshisho kovapambele vavo nokookaume kavo. Jehova Kalunga oye kaume kashili oo hatu dulu okukala tu na, oo he tu kwafele okupitila mEendjovo daye, Ombiibeli.

Ovo va polimana ova pumbwa ouhaku tau twikile nosho yo okuninga omalunduluko mokukalamwenyo kwavo. Ngeenge owa polimana, oto dulu okukala wa teelela nodjuulufi onghalamwenyo ihafifa, ngaashi Ojebode. Okwa popya a ti: “Onda teelela nodjuulifi eshi handi ka mona ewanifo laJesaja 33:24, olo la xunganeka efimbo olo kombada yedu itaku ka kala nande oumwe ta ti, ‘Aame oshingone.’” Ngaashi Ojebode, kala wa hekelekwa keudaneko laKalunga li na sha “nedu lipe” omo itamu ka kala vali “ouyehame.” (Ehololo 21:1, 4) Eudaneko olo ola kwatela mo oku ka xulifa po omauyahame aeshe, mwa kwatelwa epolimano. Ouyahame woye itau ka kala po vali. Ei “yonale itai dimbulukiwa vali, nongaashi kape na ou te i diladila momutima waye.” — Jesaja 65:17.