Ovanhu vamwe ohava mono shidjuu okukala ve hole Kalunga. Kuvo, Kalunga okwa fa e li kokule neenghono, omukwanyanya noke na ko nasha nokuli novanhu. Natu ka tale osho vamwe va popya:

• Marco wokoItaly okwa ti: “Onda li nda ilikana Kalunga a kwafele nge, ndele pefimbo opo tuu opo, onda li ndi wete e li kokule neenghono, ita dulu okupopiwa naye. Onda li handi diladila kutya Kalunga omunhu ehe na omaliudo asha.”

• Rosa wokoGuatemala okwa ti: “Nonande onda li nda hala okulongela shili Kalunga, okwa li ta monika a fa e li kokule neenghono. Onda li ndi shii oKalunga omukwanyanya, oo he tu handukile ashike. Kanda li nda itavela kutya oku na ohole.”

• Raymonde wokoCanada okwa ti: “Eshi nda li okaana, onda li nda itavela kutya Kalunga ota konenene omapuko etu, nokwe lilongekida okuhandukila ovo va wana okuhandukilwa. Lwanima, onda ka kala handi ti ke na ko nasha novanhu. Kalunga okwa li a fa omuprima oo ha unganeke ashike oinima i na sha novanhu ovo ta wilike, ndele ke na ohokwe muvo.”

Oto ti ngahelipi? Mbela Kalunga ke na ohole? Ovakriste ova kala nokupula epulo la tya ngaho oule womafelemido. MOmafelemido Opokati, oilyo ihapu yOukwakriste kaya li nokuli hai ilikana kuKalunga Omunaenghono adishe. Omolwashike mbela? Ovanhu ova li hava kala ve mu tila neenghono. Omunandjokonona Will Durant okwa ti: “Ongahelipi omulunde wongaho ta kendabala okwiilikana komupangeli mutilifa noku li kokule?”

Osha enda ngahelipi opo Kalunga a kale a talwa ko “mutilifa noku li kokule”? Ombiibeli otai hongo lela shike kombinga yaKalunga? Mbela okulihonga oshili kombinga yaKalunga otaku dulu oku ku kwafela u kale u mu hole?